الخميس، ٦ نوفمبر ٢٠١٤

العريس رقم 81

والله مانا عارفه اتلخبطت فى العد ولا ايه ! :( 
حاسة انى سقطت اعداد فى النص 
نهايته
اهو وكسة جديدة من ضمن الوكسات مش هتفرق كتير
,انا حتى بقيت ادون من غير نفس عشان التوثيق بس ليس اكثر
وبالنسبة للاخت اللى سألتنى فى التعليقات اذا كنت اتجوزت ولا لا احب اقولك لا لسه قاعدة زى خيبتى اصل الرجالة ماتت وهو انا لو اتجوزت كنت هادخل هنا تانى اعد؟؟

المهم الاخ رقم 81 جالى عن طريق ناس معرفة ظابط فى الجيش وعنده فيما يقرب من 45 سنه وكان متجوز مذيعه مشهورة وطلقها وخلف منها ولد حاطينه فى مدرسة داخلى طبعا الموضوع ده كان عليه علامات استفهام بس بينى وبين نفسى خمنت ان الولد ذو احتياجات خاصة وقد كان فعلا انه طلع كده
المهم الاخ رقم 81 جه ودخلت شفت وشه اتقفلت كالعاده شكله سنه كبير جدا ودمه يلطش جدا جدا ولما قعدت اتكلمت معاه اتقفلت من شخصيته زيادة ومش هقول على نغمة واحدة ماخدوش يابابا لانى ماليش نفس اهزر :/ 
اللذيذ فى الموضوع بقى ان الست اللى جيباه ماكنتش شافتنى اصلا وجاية عن طريق حد تانى يعرفنى ولما جابته وجت وشافتنى لقيتها بتغمز اختى وبتوشوشها ولما مشيوا بسأل اختى بقولها كانت بتقولك ايه قالتلى كانت بتقوللى : ايه ده ؟ دى حلوة !! انا على فكرة مشفتوش قبل مااجيبه اصله صاحب جوزى وهو اللى يعرفه :/
على طول باعت الراجل فى ثانيه :)
 وبغض النظر عن اى حاجه هو اصلا مش مالى عينى ولو هو مالى عينى مكنتش عملت حساب لكلام الست
 وبرضه البيت كله كان مش عاجبه صاحبنا رقم 81 وده بيحسسنى بالثقة ان رأيى فى محله 
تمت 
الى القاء مع كارثة جديدة 

1 التعليقات:

walaa tulip rose يقول...

العدد في الليمون
القعدة مفيش احسن منها اسألي مجرب ،،، للاسف مبقاش في رجالة بجد كلهم اشباه رجال
،، ولو الواحدة اطلتشط في مخها وقالت اهي جوازة والسلام مفيش كام شهر ويبان علي اصله وتلاقيها تقول لا الطلاق ارحم ،،، المصيبه بقي في اللي بعد كده ونعد م الاول ؟؟ يظهر خلاص كلنا هنعد بس ،،،،،
تحياتي لك وامنياتي برجل بجد وتبطلي عد

إرسال تعليق