الخميس، 6 نوفمبر، 2014

العريس رقم 81

والله مانا عارفه اتلخبطت فى العد ولا ايه ! :( 
حاسة انى سقطت اعداد فى النص 
نهايته
اهو وكسة جديدة من ضمن الوكسات مش هتفرق كتير
,انا حتى بقيت ادون من غير نفس عشان التوثيق بس ليس اكثر
وبالنسبة للاخت اللى سألتنى فى التعليقات اذا كنت اتجوزت ولا لا احب اقولك لا لسه قاعدة زى خيبتى اصل الرجالة ماتت وهو انا لو اتجوزت كنت هادخل هنا تانى اعد؟؟

المهم الاخ رقم 81 جالى عن طريق ناس معرفة ظابط فى الجيش وعنده فيما يقرب من 45 سنه وكان متجوز مذيعه مشهورة وطلقها وخلف منها ولد حاطينه فى مدرسة داخلى طبعا الموضوع ده كان عليه علامات استفهام بس بينى وبين نفسى خمنت ان الولد ذو احتياجات خاصة وقد كان فعلا انه طلع كده
المهم الاخ رقم 81 جه ودخلت شفت وشه اتقفلت كالعاده شكله سنه كبير جدا ودمه يلطش جدا جدا ولما قعدت اتكلمت معاه اتقفلت من شخصيته زيادة ومش هقول على نغمة واحدة ماخدوش يابابا لانى ماليش نفس اهزر :/ 
اللذيذ فى الموضوع بقى ان الست اللى جيباه ماكنتش شافتنى اصلا وجاية عن طريق حد تانى يعرفنى ولما جابته وجت وشافتنى لقيتها بتغمز اختى وبتوشوشها ولما مشيوا بسأل اختى بقولها كانت بتقولك ايه قالتلى كانت بتقوللى : ايه ده ؟ دى حلوة !! انا على فكرة مشفتوش قبل مااجيبه اصله صاحب جوزى وهو اللى يعرفه :/
على طول باعت الراجل فى ثانيه :)
 وبغض النظر عن اى حاجه هو اصلا مش مالى عينى ولو هو مالى عينى مكنتش عملت حساب لكلام الست
 وبرضه البيت كله كان مش عاجبه صاحبنا رقم 81 وده بيحسسنى بالثقة ان رأيى فى محله 
تمت 
الى القاء مع كارثة جديدة 

الخميس، 17 أبريل، 2014

الكارثة رقم 80

ايوه مش هبطل عد طول مابتجيلى العاهات دى
 وايوه عاهات
 ماهو لما واحد يفضل يتمسكن لحد مايتمكن عشان يطلع عين امى بعد كده يبقى عاهه وستين عاهه
 بيتعامل بذوق بس عشان الموضوع ماشى انما لما رفضت كشر عن انيابه وكأن الرفض والقبول مش من حقى
حاجه وسخه جدا جدا
رجاله كسر ووقيع وفرز تالت حقيقى وعشان كده احنا قاعدين من غير جواز 
البيه رقم 80 عنده 42 سنه ومحاسب ومن قها
  من اول مااتعرضت عليا صورته تنحت لانه طبعا واضح انه مش ستايلى خالص ومحدش بقى يقولى مش مهم الستايل اصلك بقى عندك 35 سنه ولازم تتنازلى
 لا مش هتنازل على فكره عشان اخد لقب مدام واللى مش عاجبه يولع
مفيش قبول اعمل ايه يعنى ؟؟
مش راجل هعاشره وهنام جنبه يعنى حتى الحد الادنى من القبول مش من حقى ؟؟ عموما انا بدافع ليه اصلا ياكشى يولع الكل 
المهم انى بعد ماشفت صورته كنت مقررة انى ارفض وبعدين قعدت اقول لنفسى بلاش احسن اندم خلينى اشوفه الاول يمكن يكون لبسه ومظهره كده بس لكن لما يتكلم يطلع مقبول ودمه خفيف
المهم رضيت اقابله وياريتنى مارضيت :/
حد دمه يلطش جدا وقاعد يقول نكت بايخه وبنت كلب وبعدين لما قالى اقولك شعر ؟؟
قلتله لو على نفس مستوى النكت بلاش :)
برضه مسمعش الكلام وفضل يقولى فى شعر سخيف ورخم جدا وميعرفش ان الشعر ده هو اللى هيجيب اجل الموضوع :/  
المهم ان القعده عدت وانا قمت روحت البيت وانا عارفه ان الانطباعات الاولى تدوم اكيد وانى اكيد مش هغير رأيى  وخصوصا بعد اللى شفته بس برضه مقدرتش اخد الخطوة دى واقول لأ للأسف :( 
ملحوظة :عارفه انى بحكى بسرعه لأن خلاص مبقاش عندى خلق للحكاوى الممله دى وزهقت الموضوع مبقاش يضحك خالص وزاد عن حده
معرفش الرجالة الكويسه راحت فين ؟؟؟ 
اكيد اتجوزوا الستات الوحشه وندموا وابتدوا يلعبوا علينا احنا البنات اللى فاتهم القطر دلوقتى بما ان فى حملة موسعه من الرجالة المتجوزين للاستفراد بالعوانس امثالنا ! :)
المهم نرجع لموضوعنا تانى  لما سألونى عن رأيى اضطريت انى اقولهم انى عايزة رقم تليفونه عشان نتكلم ونعرف بعض اكتر بالرغم انى عارفه انى هدفع تمن ده لانى هضطر اسمع نكته البايخه وشعره السخيف كل يوم :/ 
ملحوظة :ازاى واحده ممكن تتجوز واحد شايفاه دمه تقيل ؟؟؟ :) 
المهم انى فعلا فضلت اتكلم معاه لمدة اسبوع وكان اوسخ اسبوع الحقيقة كل يوم شعر ونكت ورسايل وغلطات املائية فى الرسايل لما اتقرفت من عيشتى
المهم انى كنت بتعامل بذوق اوى معاه وماحاولتش ابقى قليلة الذوق وخصوصا انى كنت حاسه انه شارينى واللى بلتنى بيه فهمتنى انه ممكن يجراله حاجه لو انا رفضت 
اضطريت انى ابقى لطيفه على غير العادة مع النوعيه دى
واتعامل كويس المهم ان واضح جدا ان الست اللى جابتهولى ماكنتش تعرفه كويس لانه اظهر الوش اللطيف بس :)
وجه اليوم الموعود انى هبعتله رساله واقوله انى بعتذرله ومضطره ارفض واحسس على كلامى بقدر الامكان عشان مضايقهوش وطبعا قلت النشيد بتاع كل مره
 (ممكن يكون انت حد كويس وانا حد كويس بس مش لايقين على بعض يعنى انت ممكن يكون عندك تشيرت شيك وبنطلون شيك بس مش لايقين على بعض نفس الحكاية انا وانت مش حاسه ان فى بينا انسجام خالص انا اسفه وربنا يوعدك باللى احسن منى ) 
وهنا حدثت الطامة الكبرى على رأى عادل امام فى مسرحية الواد سيد الشغال الزبيبة اللى وشه اختفت والنور اللى فى وشه انطفى !!!
لقيته بعتلى رساله فى منتهى قلة الذوق لا تتناسب نهائى مع ذوقه فى كلامه معايا ومع احترامه اللى الست فلقتنى بيه !!
وفضل يقولى انا عقلى اكبر من عقلك وحاجات كتير غريبه 
المهم انى على قد مااتنرفزت من كلامه واتغاظت لكن فرحت لانه اثبتلى بالدليل القاطع انه شخصيه زباله :)
انا فضلت ماسكة نفسى ومش عايزة اقل ادبى عليه عشان عامله حساب للست اللى جيباه
 بس خرجت عن شعورى لما كلمتنى وقالتلى انه قلها ان حصل بينا سوء تفاهم وقفلنا السكه بطريقه مش لطيفه مع بعض اضطريت انى اقولها لطيفه دى تبقى امه !!! :)
وقلتلها انه قل ادبه عليا وبعتلى رساله قليلة الذوق عشان قلتله كل شىء قسمة ونصيب وعرفتها انى مش عايزاه يكلمنى تانى نهاىئ وعملت لرقمه بلوك 
فوجئت بعد يومين انه بيكلمنى من رقم غريب وبيقولى انه اسف ومكنتش اقصد وانتى فهمتى انى بتمسكن لحد مااتمكن :)
الغريبه انى مصرحتش بكده بس هو طبعا فاهم ان ده طبعه وعشان كده فهم انى قفشته وطلب منى فرصه تانيه عشان يثبتلى فيها حسن نيته وطبعا انا مكنتش موافقه بس بعد اعتذارات ومحايلات رهيبه اضطريت انى اخده على قد عقله وخصوصا انه حلفنى برحمة ابويا وعرفته ان بعد اسبوع لو مكلمتكش يبقى اعتبر ان الموضوع منتهى لكن هو معجبهوش وقالى طيب ممكن اكلمك الاسبوع ده ؟؟ طبعا ايقنت ساعتها انى هقع فريسة للشعر الخزعبلى والنكت اللوذعيه من جديد وانا خلاص مرارتى الصغيرة لا تتحمل:) قمت رفضت وقلتله لأ انا هكلمك بعد اسبوع من غير ضغوط منك رد عليا وقالى يبقى مش هتتكلمى :/ طيب ولما انت عارف انى مش هتكلم اومال طالب منى فرصه ليه ؟؟؟ 
المهم بعد اخد ورد انتهينا على انى هكلمه بعد اسبوع ولو متصلتش يبقى كل شىء قسمة ونصيب بعد اسبوع بعتلى رساله قد شبر على الموبايل :)
برضه بيتحايل ويعرفنى انه فهمنى وعرف انا بحب ايه وبكره ايه وانه افضل حد ليا 
لو كان فهم كان عرف انى مش قابلاه طبعا !! 
وبكده خد الشر وراح :)
استمارة6 
الى اللقاء (قريبا جدا )مع الكارثة رقم  81 :)

الأحد، 1 ديسمبر، 2013

الكارثه رقم 79

قرفت وزهقت من كتر العد مش هتكلم عنه كتير
 عريس لقطه بس مفيش قبول
 ومفيش حضور 
ومفيش شخصيه 
ومفيش حاجات كتير اوى
 العريس ده اكدلى حاجه مهمه اوى
 ان الرجاله الكويسه اتجوزوا ستات مش مالييين عنيهم وبيقرفوا  البنات اللى متجوزوش 
 وان الرجاله الكسر هما اللى فاضلين
 مع احترامى لكل الرجاله اللى هتقرا البوست ده 
فتكم بعافيه :(

الأربعاء، 2 أكتوبر، 2013

الكارثه رقم 78



ولا اسرع من كده ولا فى الاحلام
 الموضوع باختصار شديد انتهى بسرعة البرق بعد ماكنت حامله همه 
نبتدى من الاول بقى ومش هطول عشان خلقى ابتدى يضيق من الحديث عن الكوارث وبدونهم  كالعاده مش اكتر
 المهم هاتفتنى احدى صديقات اختى وقالت لنا العريس رقم 78 يبلغ من العمر 42 عاما كان معهد خدمه اجتماعيه واشتغل اخصائى اجتماعى فتره بس اخد اجازه او ساب الشغل مش عارفه وسافر امريكا يشتغل هناك والمفروض انه ماسك محطة بنزين هناك
 وبغض النظر ان انى بتضايق اوى من الناس اللى بيجولى من بره لانى مش هبقى عارفه عنهم حاجه نهائى ولا عارفه متجوزين هناك او لأ ولا عارفه بيشربوا خمره ولا لأ ولا عارفه بتوع نسوان او لأ 
لكن مش هى دى المشكله 
وبغض النظر برضه عن انه انتخب مرسى مرتين وانا اللى ينتخب مرسى مرتين بشك دايما فى قدراته العقليه 
بس برضه مش هى دى المشكله 
وبغض النظر عن انى لما قعدت معاه محستش براحه نهائى 
لكن مش هى دى المشكله
 وبغض النظر عن انى لسه منزلتش باحلامى لمستوى انى اتجوز واحد بيشتغل فى محطة بنزين
 لكن برضه مش هى دى المشكله
 المشكله ان البيه بيتعامل بتناكه غير عاديه وكأنه احمد عز او عمرو دياب !!!!
 وبيتكلم على البلاد اللى راحها وزارها بمنتهى الألاطه وبالرغم اننا مقعدناش مع بعض كتير عشان مرارتى مبقتش تستحمل واضطريت انى اكح عشان اختى تستأذن من الجلسه الغبره دى من غير انا ماتحرج (على حسب مااتفقت معاها)
الا انى روحت هاديه جدا ومسالمه مش عارفه ليه وصليت استخاره ليلا قبل ماانام ونمت فى هدوء من غير مااقول حاجه وانا مسلمه امرى لله عدى يوم واتنين وتلاته واختى ماردتش عليا قلت بركه يا جامع تلاقيها جت من عنده بعد مااتخنق منى بعد نقاشنا السياسى وعرف انى فلول وانتخبت شفيق :)
لكن المفاجأه العجيبه انه جوز صديقة اختى نهى الموضوع من نفسه على اعتبار انى مردتش عليه وفهم من نفسه انى رافضه بالرغم ان احنا كمان كنا مستنيين رده هو الاول قلت الحمد لله جت من عند ربنا ومبقتش مضطره انى افكر واكتئب واتحير 
والى اللقاء مع الكارثه 79 ويارب اكلمهم 100 :)

الثلاثاء، 14 مايو، 2013

الكارثه رقم 77

خلاااااااااص
 بقيت بدون الكوارث لمجرد التدوين بس عشان متلخبطشى فى العد مش اكتر
 انما مبقتشى بدون بمزاج بالتفاصيل زى زمان
 زهقت 
ومبقاش عندى مراره
 حاسه ان خلاص الرجاله خلصت حاجه تقرف حقيقى 
وعشان كده مش هاطول فى البوست ده لانى مليت من الحكى:(
الكارثه رقم 77 كان عايش فى السودان معرفشى بيشتغل ايه 
وبعدين رجع مصر فى الظروف المهببه دى وفتح شركه للتجاره وبرضه مهتمتش اعرف تجارة ايه 
وعنده 39 سنه وكان متجوز واحده اهله فرضوها عليه وبعدين طلعت بالاضافه الا انه مبيحبهاش انها مريضه نفسيا واتطلقوا من غير ما يبقى بينهم اولاد لسبب بسيط انه كان بينزل اجازاته فى ايام مينفعشى يحصل بينهم علاقه عشان ماتحملشى منه وده طبعا على حسب كلامه 
ولما قعدت معاه على نغمه واحده ماخدوش يا بابا مخدوش يا بابا مخدوش يا بابا
ملحوظه : اللى جابتلى العريس رقم 76 هى نفسها اللى جابتلى العريس رقم 77
ومش هاحط صوره للبوست :)

السبت، 6 أبريل، 2013

الكارثه رقم 76






انا عارفه انى منقطعه بقالى كتير وفى ناس بتسألنى زهقتى من كتر العد ولا لسه بتعدى؟؟
 فى الحقيقه انا لسه بأعد:(
 ايييييييييييييييه الأمر لله 
هاعمل ايه ادى الله وادى حكمته 
ماكنتش اتخيل ابدا وانا مراهقه انى هاعقد لحد ماوصل لهذه السن العتيقه من غير جواز
 ماعلينا خلينا فى المهم
 فى الحقيقه السبب اللى خلانى اتكلم عن العريس رقم 76 ان جالى العريس رقم 77 :D
 فاضطريت انى اتكلم عن العريس رقم 76 عشان الترتيب 
 مافيش داعى اتكلم عن الصدفه السيئه اللى جمعتنى بصديقه من ايام  الكليه فى الشارع ومشفتهاش بقالى كتير واخدت رقم تليفونى الجديد ولقيتها بتكلمنى تانى يوم ومُصره انى ازورها فى الشغل !!
وكل مايبوظ ميعاد الاقيها بتتصل تحدد غيره!!
طبعا من خلال خبرتى الزواجيه حسيت ان الموضوع فيه إن 
وعشان كده مستميته انى اروحلها الشغل مش البيت كمان
 روحت جايبه من الاخرو قايله ليها بصياعه هاتى من الاخر شكله اييييييييييييييه ؟
راحت ضاحكه وقايلالى انه شكله معقول 
وانه عنده 39  سنه وزميلها فى الشغل واخلاقه طيبه وعنده شقه وجاهز
 قلت وماله اروح ابص بصه
 بغض النظر عن انها كانت مصممه اروح فى يوم معين على مزاج البيه عشان فى بنت زميلتهم كانت واخده اجازه فى اليوم ده ومش عايزينها تشوفنى عشان هاتفهم الموضوع وهى لسه مش متجوزه !!
وبغض النظر برضه عن انى صممت اروح فى اليوم اللى على مزاج امى انا ومش مهم  حضرته لسبب بسيط انى مش مضطره اتنازل واعمل للبيه خدمه وانى انا كمان عندى شغل ومش فاضياله 
المهم انى روحت وياريتنى ماروحت طبق الاصل العلقه اللى فاتت ومن الجوازات اللى لما برفضها مش بعجب الناس وبينقدونى وخصوصا الكبار منهم 
مافيش اى نوع من انواع القبول ادينى جبت من الاخر اصلى لسه هاقول اصله شكله فلاح وطريقته مش شيك وانه مش انيق ؟؟؟!!!
لا وعلى ايه ده كله
 ماحنا متفقين انه ممكن يكون اكتر من كده واقبله واحبه كمان
 لكن بصراحه انا جبت من الاخر مافيش قبول نهااااااائى لدرجة ان صاحبتى بتقولى طب شوفيه تانى واقعدى معاه فضلت اتحايل عليها انى ماجيش هنا تانى ومشفوش تانى وكأنها هاتدينى حقنه شرجيه :D
ومع ذلك لما روحت صليت استخاره وكالعاده محلمتش بحاجه وعشان كده اتخذت قرارى وعلى نغمه واحده مخدوش يا بابا مخدوش يا بابا
والى اللقاء مع الكارثه رقم 77

الخميس، 15 نوفمبر، 2012

عبده العبيط

فى الحقيقه عايزه اتكلم عن الرجاله اللى بين البينين يعنى ماقدرشى اقول عليهم عرسان لانهم ماجوش البيت بشكل رسمى وكمان ماقدرشى اقول عليهم معجبين لانهم فعلا كانوا عايزين يتجوزونى بس انا فعلا رفضت بذوق لانى متأكده ان الموضوع لايستحق حتى اعطاء فرصه للحديث
فى اوقات كتير جدا بسمع تلميحات صريحه بالرغبه فى الجواز 
ولكن بضطر اعمل عبده العبيط عشان متأكده انه ماينفعشى نهائى
 وخصوصا لما الموضوع ييجى عن طريقى انا مش عن طريق البيت بحس انى خفيييفه فى انى اخد قرار بالرفض 
وانا متأكده ان مافيش حد هايراجعنى فى قرارى او يبكتنى او يقولى رفضتى ليه ويبدأ فى سرد مميزات البيه 
المشكله بقى ان فى نوع من الرجاله غريب جدا مش بيرضى يستوعب انى رافضاه الا لما يتقاله فى وشه انه مش عاجبنى 
طبعا انا عمرى ماقلتها بس قلت كلام كتير يدى نفس المعنى بس برضه ماوصلتش وافضل الف وادور واجى يمين وشمال واجيب كلمه من الشرق وكلمه من الغرب عشان افهمه انه ماينفعشى بس مافيش فايده ومثال حى على ده اخينا.ز)
  اللى فضل يقنعنى بالجواز منه وانى اديله فرصه ولما اقوله الجمله المشهوره بتاعتى اللى متعوده دايما ارفض بيها واعتذر بذوق (ممكن يكون انت واحد كويس وانا واحده كويسه بس للاسف مش لايقين على بعض  :(
يرد يقولى :( قولى  على طول انى مش عاجبك وانى مافييش حاجه من فارس احلامك ) :)
سبحان الله طب ماهو فعلا دى الحقيقه 
بس هو انا لازم اقول كده ؟ 
ماتفهم يا اخى لوحدك 
المشكله انه مش فاهم انى عايزه حد يقتحمنى ويهزنى من جوه
 ويبطل كل وسائلى الدفاعيه وساعتها لا هسأل بقى فى كرشه ولا قرشه 
والأخ (م.ز) بقى متخيل انى لو اديته فرصه هايعرف يقتحمنى :)
هو الاقتحام ده هايبقى له معنى لو كان مفتعل؟
 ثما هايقتحمنى ازاى ومن شروط الاقتحام بالنسبه لى انه ييجى فجأه ومن غير سابق انذار ؟
 وهو مستنى الاذن عشان يقتحمنى :(  
على فكره انا بتكلم عن الاقتحام وليس الحب 
  


راحه نفسيه

ماقدرشى انكر انى فى راحه نفسيه رهيبه وانا من غير عرسان وتفكير وتردد
 وبالنسبه للعريس الامريكانى رقم 74 
موجود برضه بس للاسف مش عارفين نلاقى بعض ونتجاذب اطراف الحديث بسبب فرق التوقيت بين مصر وامريكا :)
الليل عنى نهار والنهار عنده ليل واحنا الاتنين بنشتغل
اييييييييييييييه الحل ؟؟
حاسه ان هاتيجى عليا سنه 2025 وانا بقول انى مش قادره الاقى وقت اتكلم فيه مع العريس رقم 74 بسبب فرق التوقيت 
وممكن اتجوز واخلف وهو عندى على الفيس بس مش لاقيين وقت نتكلم 
حاجه مثيره للسخريه اوى ان جوازه تبوظ بسبب فرق التوقيت 
عموما انا هاستمتع بالراحه النفسيه اللى بين عريس وعريس دى لأطرق عالم الرجال وأتحدث عنهم قليلا بشكل عام من غير مايدخلوا تحت نطاق كوارثى