السبت، 31 ديسمبر، 2011

الكارثه رقم 66

على نغمه واحد ماخدوش يا بابا ...ماخدوش يا بابا ...ماخدوش يا بابا
التفاصيل فى القريب العاجل

الجمعة، 23 ديسمبر، 2011

الكارثه رقم 65


نيجى للمهم بقى الكارثه رقم 65
موضوع مريييييييييح جدا من المواضيع المحسومه ومش محتاجه لا تردد ولا استخاره
بس انا صليت استخاره عشان بس اكون مطمنه لقرارى لكن طبعا كالعاده على نغمه واحده
ماخدوش يا بابا ماخدوش يا بابا ماخدوش يا بابا
هو شاب عنده 35 سنه ويبدو 40 بيشتغل محاسب ومبرمج فى وزارة الداخليه ومطلق ولديه ولدان ,
ميعادنا كان يوم الجمعه اللى فاتت الساعه السابعه مساءا روحت انا واختى ووالست اللى بلاتنى بيه وجه هو ووالده  وصلنا قدام بابا النادى الساعه 7 الاعشره وجه هو عشان ياخدنا ويوصلنا للمكان اللى هانقعد فيه ولما شفته افتكرته هو والد العريس او عمه لانه شكله كبير جدا فى السن ومش حلو نهائى
( وانا طبعا بوصف مش بتريق)
 المهم كنت منتظره انى الاقى العريس جوه بصيت لقيت الرجل التانى اللى قاعد جوه اكبر من اللى جه يقابلنا وساعتها بصيت للست اللى جايباه وقلت لها :هو مافيش حد تانى خلاص هما دول بس ؟
ابتسمت وقالت لى :اه
طبعا ساعتها اخدت قرارى وقعدت بقى مسترخيه لان الموضوع مش محتاج تفكير ومع ذلك سمعته واتكلمت معاه فى مواضيع كتيره جدا وكنت ذوق جدا معاه لانى كنت حاسمه موقفى والحكايه مش محتاجه توتر
وطبعا كنت حريصه انى مايكونشى ردى ان مافيش قبول نهائى عشان ماجرحوش ولكن اتلككت بإنه قال لى ان طليقته احتمال تنكد عليه وتديله الولاد يعيشه معاه لما تعرف انه هايتجوز وانا بصراحه مش هاقدر اتحمل مسئوليتهم والله انا بنت ناس وحنينه مع ان  فى رجاله بقى مش بتتكسف فى المواقف اللى زى دى وتقول بالفم المليان على البنت
(مش عجبانى )
 هاقول ايه بهايم
يالا اهو خد الشروراح
الى اللقاء قريبا جدا مع العريس رقم 66
حصريا على هذه المدونه 


قلة عقل


قبل ما احكى على العريس رقم 65 احب اقول موقف لطيف جدا ليه علاقه بالجواز برضه
تخيلوا انى اكلم واحد بعد جوازه بأسبوع عشان اباركله الاقيه بيقولى
انا ياما لمحتلك انى عايزك انتى وانتى كنتى بتصودينى
 هههههههههههههه يعنى بالذمه ده وقت مناسب للكلام ده ؟؟
 عموما هو مش حد غريب ده اخو اسوأ عريس لعام 2009 و الظاهرالطينه من العجينه
 زميلى فى المهنه وبصراحه ماقدرشى انكر انه ساعدنى كتير فى دراستى
لكن مش عارفه ايه اللى هبله على الاواخر كده ؟
هو اصغر منى بسنتين تقريبا وعمرى ماكنت حطاه فى دماغى لانى كنت بنظرله على انه اخ وبصرف النظر انه اخو واحد اتقدملى قبل كده او لا
 فهو شخص غير مناسب على الاطلاق
 وبالرغم برضه من ان فى اوقات انا بستهبل فيها وبضطر اعمل عبدو العبيط واصد اللى قدامى من تحت لتحت لكن بجد انا معملتش معاه كده نهائى لانى مش فاكره انه اصلا لمحلى لحاجه وممكن يكون لمح وانا بجد ماختش بالى لانى انا من الاول بحط العلاقه فى حدود معينه لا تتخطاها وطالما عارفه انه ماينفعشى عريس يبقى هاعتبره اخ وهاتجاهل اى حاجه تصدر منه سواءا بكيفى او غصب عنى 
عموما ماقدرشى اقول غير انها قلة عقل

الجمعة، 4 نوفمبر، 2011

نهاية العريس رقم 63

اه اعتذرتله 
خلاص مش قادره اكمل
مش قادره اتجوز لمجرد انى اتجوز
ومش قادره اتجوز تحت بند انى زهقت
هاعيش معاه وهاستحمل اى ظروف حياه صعبه ازاى ؟
انا مش بحبه ومش قابله طريقته ومافيش بيننا اى حوار نهائى يبقى ازاى هاعاشره واعيش معاه عمرى كله ؟
خلاص انا على وشك اخد قرار انى ماشوفشى عرسان تانى وارفض الجواز مطلقا خلاص نصيبى كده

الأحد، 23 أكتوبر، 2011

:((((

هو ينفع اقول لحد اهتم بيا ؟؟
ايه القرف ده ؟؟
ابتديت اجيب اخرى على فكره وينعل ابوه الجواز على اللى عاوز يتجوز كل شويه هاكلمك اطمن عليكى وانتى مسافره وبعدين ولا تليفون واحد يوحد ربنا وفى نفس الوقت مرتااااااااااح ومبسوووووووووط وعجباه ده من اى وجهة نظر؟
هو يا اما يمين اوى يا شمال اوى مافيش رجل وسط ومعتدل الله يخرب بيت كده يا اما ....... يا اما باااااااااااااااااااااااااااااااارد ومنفض يفتكرنى الساعه 1 بليل ؟؟مش بيتصل يشوف الحماره اللى هايتجوزها راحت فى اى داهيه؟؟دانا اصدقائى وزملائى ولاد وبنات بيقولوا لى كلمينا لما توصلى البيت عشان بكون مسافره وعايزين يطمنوا وهو طووووووووول النهار ولا مكالمه هو مغصوب على ام الجوازه دى ولا ايه ؟؟ 
انا نفسى افهم هو انا بطلب كتيير ؟؟انا كده بدلع ؟؟

الجمعة، 14 أكتوبر، 2011

انا مش حباه ولا كرهاه

انا عارفه انى حاده جدا معاه وردودى جافه وهو قال كده 
بس انا بجد مش عارفه اكون غير كده هو طلب منى صراحة انى اخليه يحبنى لكن انا قلت لا لان الحب ده احساس يا موجود او مش موجود 
ماينفعشى اخليه يحبنى 
هو ينفع بس لو انا عايزه او لو انا بحبه وعايزاه يحبنى زى مابحبه
لكن انا مش بحبه ومش هاقدر اخليه يحبنى لان ماعنديش دافعيه لكده هو كمان مش شخصيه تعرف ازى تحبب اللى قدامها فيها كل واحد فينا مستنى التانى يعمل الخطوه الاولى وانا مش هاعمل الخطوه الاولى الا على جثتى ومش هابذل مجهود عشان احببه فيا 
مش هو الرجل ؟؟؟!!!!
وهو الطرف الاقوى فى العلاقه؟؟؟؟!!!!
يبقى خلاص يتحكم هو بقى فى العلاقه
انما بجد الرجل ده مخلوق غريب جدا يحب يكون الطرف الاقوى فى العلاقه لما يجيله مزاج ويحب يكون الطرف الاضعف لما برضه يجيله مزاج لكده وانا بقى ونعم البنات عايزه اكون الطرف الاضعف فى العلاقه ومش هاعمل حاجه نهائى ويحصل اللى يحصل


مكالمة تليفون رخمه

اه رخمه رخمه وغلسه كمان 
بالرغم من انى انا العروسه التانيه لكن برضه اتغاظت كان احساسى نفس احساس ليلى طاهر فى الفيلم لما كان صلاح ذو الفقار بيخونها معاها برضه لكن هى كانت متغاظه 
بس انا بصراحه ماكنتش متغاظه جدا لانى مش بغير عليه وعارفه كمان انه لو دور على عروسه تانيه غيرى هايكون عنده حق مش لانى وحشه بس انا متأكده انه مش مالى ايده منى وحاسس انى كرفاه 
(عشان اكون منصفه يعنى)
المهم المكالمه كانت كالأتى:
انا : اذيك 
هو:الحمد لله مبسوط انك كلمتينى (مايعرفشى يا ولداه ان المكالمه مش لله)
انا :ميرسى 
هو :اخبارك ايه 
انا :كويسه الحمد لله صحيح كنت عايزه اسألك سؤال 
هو:اتفضلى 
انا بإبتسامه بلهاء حاولت امزجها بصوتى عشان الموضوع مايقلبشى بغم:هو انا مش ماليه عينك ولا حاجه؟
هوبإستغراب: ليه بتقولى كده دا انتى تملى عين الباشا
انا بحده خفيفه:مش باين 
هو:ليه؟؟؟
انا :عشان حضرتك بتدور على عروسه تانيه
هو:ماحصلشى
انا:لا حصل بس بسبب سوء حظك طلعت انا برضه
هو: لا صدقينى ماحصلشى فهمينى ليه بتقولى كده بس
انا:واحده صحبتى كلمتنى وقالت لى انها جايبالى عريس وبعدين لما قالت لى مواصفاته طلعت انت
هو:ومين صاحبتك دى
انا:(س) بس هى واحده تانيه قريبتك اللى سألتها على عروسه ليك
هو:اسمها ايه
انا:(ص)
هو:ياااااااااااااااه فعلا ده حصل اول ماجيت من السفر بس الموضوع ده بقاله كتيييييييييييير اوى مش من قريب
انا:متأكد؟؟
هو:طبعا  وبعدين وايه اللى هايخلينى اعمل كده ؟؟ 
انا :يمكن تكون اشتكيت منى لحد وهو اللى اتبرع يدورلك على عروسه ؟
هو:حد زى مين 
انا:مامتك مثلا
هو:وليه ماما تعمل كده وهى عارفه ان فى موضوع شغال ودايما بتسألنى عليكى وبتطمن يبقى هادور فى سكه تانيه ليه من نفسها
الحكايه كلها انى طلبت الطلب ده من قريبتى وكمان كان بهزار مش جد وخلاص نسيت اللى حصل ده نهائى وبعدين ده كان قبل ماشوفك بكتير 
انا:اوكيه خلاص عموما انا كنت بتكلم عادى مش مضايقه بس مجرد انى بسأل
هو:لا كان فيه حده فى كلامك 
انا:خاااااااااااالص انا فعلا كنت بتكلم عادى عموما حصل خير 
هو: اوكيه عموما انا مش مضايق لان الموضوع ده كان سبب كويس عشان تتصلى بيا بعد ماكنتى مطنشانى (سهوكة الرجاله بقى هايبتدى)
انا بسماجه :وهارجع اطنشك تانى من جديد :)))
انتهى







الاثنين، 10 أكتوبر، 2011

مفاجأه

اتصلت بيا صديقتى وقالت لى جايبالك عريس
استنوااااااااااااااااااااااااااااااا 
ده مش عريس جديد اصبروا على ماتفهموا
قالت لى ايه بقى خير اللهم اجعله خير
ان العريس ده عنده 42 سنه وانه كان مطلق وعنده بنتين مع مراته قمت انا ضاحكه وقايله لها ايه المواصفات الغريبه دى هى افتكرت انه مش عاجبنى لكن طبعا انا كنت اقصد انه شبه مواصفات البيه رقم 63 
ااااااه هو تخيلوا !!!!!!!! هو
البيه بيدور على عروسه وهو بيكلمنى فى التليفون 
لما شموسه قالت لى انه اكيد بيشوف عرايس تانيه هو كمان ماصدقتش وكمان معلقتش على كلامها لأنى قلت ده اكيد مش مستعجل لكن فعلا طلعت فاهمه غدر الرجاله اكتر منى عموما انا ماتصلتش بيه من ساعة مااتقدملى لكن كلمته امبارح واديته اللى فيه النصيب اومال هاسكتله؟؟
هو انا مش ماليه عينه ولا ايه 
؟؟
عموما لجل بخته الاسود اهو طلعت انا برضه هههههههههههههههههه 
هم يبكى وهم يضحك 
اهو اللى حصل ده فكرنى بالنكته اللى بتقول (واحد حب يتجوز على مراته طلعت هيا)
حاسه ان مافيش عروسه فى البلد غيرى
بس للأسف الموضوع لسه شغال:((((((((

الجمعة، 7 أكتوبر، 2011

مكتئبه

ايوه مكتئبه جدا ومش عارفه اعمل ايه معقوله اتجوز عشان زهقت وتعبت من كلام الناس ؟؟
معقوله كل مبادئى اللى كنت مؤمنه بيها اضرب بيها عرض الحائط  كده ؟؟
طب اعمل ايه ما انا زهقت من العيشه لوحدى بس فى نفس الوقت حاسه انى بعد الجواز مش هاكون مع حد برضه هاكون لوحدى 
انسان غير مهتم على الاطلاق ممكن يعرف انى مسافره ومايتصلشى يطمن وصلت ولا لسه وممكن يعرف انى عيانه ومايكلمنيش يطمن عليا 
طب ده عيب يعنى؟
ده سبب كافى انى ارفض؟
طب كل الناس بيقولوا عليه طيب يعنى معقوله اتجوزه عشان بس طيب ؟ 
وكمان ميزته الوحيده دى عيب بالنسبه لى لانى انا مش بحب الرجل الطيب انا عايزه واحد حمش
ايون عايزه سى السيد
مش يعنى يزعق لى على الفاضيه والمليانه بس يكون شديد وحنين فى وقت واحد يعرف يتعامل بده امتى وبده امتى
معقوله العقليه دى خلاص مابقتشى موجوده ؟
كل الرجاله بقوا دهولات مافيش واحد فى الدنيا دى كلها ينفع لى ايه القرف ده  ؟
انا مضايقه ومش عارفه اعمل ايه ساعات بقول زهقت واتجوز بقى وخلاص بس لامتى هابقى انا كمان طوبه ومش متحمسه ماهو اكيد هو مش هايعجبه انى على طول مش متجاوبه معاه ولا يمكن هاتغير من تلقاء نفسى بعد كده؟
مش عارفه مش عارفه
 :((((

الأحد، 2 أكتوبر، 2011

أسوأ عريس لعام 2011


فاكرين أسوأ عريس لعام 2009 ؟؟
:(((((((
المحامى الللى كان خاطب قبل كده  وقالى إنه جاب جزمه لخطيبته بالشىء الفلانى ؟؟؟
أهو ده عريس لقطه بالنسبه للعريس رقم 64 
يا خبر إسود حاجه تقرف بجد 
أوسخ حاجه بقابلها فى حياتى مع العرسان إن العريس يكون جاى عشان نتعرف بس ولسه بنقول يا هادى وده يجى جايب العيله كلها فى إيده وكأنها دخله
وطبعا المعاتيه دول جايين يعاينوا البضاعه ويتفرجوا ملهاش سبب تانى ويا سلام بقى لما يكونوا كمان ناس قليلة الذوق قاعدين يتكلموا وينقدوا فى عروسه تانيه كان إتقدملها اللطخ ده وبعدين طلعت جسمها مليان يا عالم هايقولوا عليا ايه  أنا كمان لما يمشوا 
عيله بيييييييييييييييييييئه 
ده غير المصيبه الكبيره
العريس بسلامته دبلون ومن بجاحتهم مارضوش يقولوا الموضوع ده الا لما جه البيت عشان أشوفه الأول قال يعنى عمرو دياب وهاقع فى دباديبو أول ماشوفه وهاتغاضى بقى عن حكاية الدبلون دى مع انه حاجه مكعبره وملهاش لا شكل ولا منظر وكمان إسمه زكى بالإضافه لمميزاته وأنا مش بحب أسم أى رجل أخره (ى)
والجديد بقى اللى ماحدش عمله من ال63 اللى قبله إنه طلب يدخل الحمام هو طبعا من حق أى إنسان يدخل الحمام إذا إقتضت ظروفه الداخليه الى ذلك 
ولكن حبكت ...حبكت وانا رايح اشوف عروسه اطلب انى ادخل الحمام عندهم؟
ايه السماجه دى ؟؟

المهم  إضطريت أقابلهم حلو عشان خاطر اللى جايباهم واللى ياعينى إتصدمت زى زيها فى الجوازه الغابره دى عدت الليله وأنا على وشك الإنهياروبعدين إستأذنوا وأنا فى العادى بقول رأى فى التليفون لكن بالنسبه له طلبت منها تتأخر شويه عنهم ماقدرتش أستحمل أنى أستنى لحد ماتروح وعلى نغمه واحده 
ماخدوش يا بابا ......ماخدوش يابابا .....ماخدوش يابابا 
اه وكمان طلبت منها إنها تقول إنه لما يتقدم بعد كده لعرايس يبقى يمسك نفسه ومايطلبشى الحمام لحد مايبقى يروح بيتهم 
قالت لى طب صلى إستخاره قلت لها ده مش محتاج
خلاااااااااااااااااااااااااااص 
عايزه أنسى إنى إتقدم لى العريس ده 
تفتكروا ده ذنب العريس رقم 63؟؟؟؟
إن لله وإن إليه راجعون

الثلاثاء، 27 سبتمبر، 2011

العريس (63) دخل على العريس (64)

صدفه غريبه حصلت لى مره واحده قبل كده شفت برضه عريس وانا كنت داخله على قراية فاتحه وللأسف أعجبت بيه جدا وإرتحت له
أه والله إرتحتله  
بس للأسف كنت داخله على قراية فاتحه وصعب عليا الدهولل اللى كنت هاتخطب له وقلت خلاص الخيره فيما اختاره الله وإضطريت أختار الدهولل إلى إتخطبتله وادى النتيجه بس يالا الحمد لله مكتوبالى

المهم انى جالى عريس تانى:)
وهاشوفه يوم الخميس
ايون
وانا لسه بكلم العريس رقم 63 فى التليفون 
ايون 
وهو كده بقى عادى 
الغايه تبرر الوسيله ماهو عشان اتجوز وانا مبسوطه ومقتنعه لازم اعمل كده وانا عموما ماضرتشى حد ولا ايه ؟؟
ها ؟؟
ولا ايه ؟؟
فى حاجه ؟؟
حد ليه شوق فى كلمه؟؟

الاثنين، 19 سبتمبر، 2011

حاولى تحبيه

عنوان البوست ده هو نفس الجمله اللى قالتهالى المدام اللى جابت لى العريس رقم 63 بعد ما حن عليا وكلمنى فى التليفون
بجد مش فاهمه يعنى ايه الواحد يحاول يحب ؟هو الواحد هايدوس على الزرار يقوم يحب؟
هو الحب بييجى بالمحاوله ؟
دى تبقى محاوله صعبه اوى ده كأنى بزوق فى حيطه

الغريبه انى حاسه انى مش حاسه بمعنى ان كل مره بكون يا اما قرفانه او عايزه ارجع او انى متقبله بس عندى شوية تحفزات لكن المره دى لا ده ولا ده
 لا مبالاه غريبه
 و اعتقد انها عندى من العريس رقم 62 لو تلاحظوا, ومكمله معايا لحد دلوقتى ولا يمكن يكون ده يأس او شيخوخه مبكره؟ هههههههههه بجد مش عارفه ,كلمنى مرتين  او تلاته وبقفل معاه وكأن المكالمه لم تكن والغريبه انى مش بفكر فى اى حاجه قالها فى المكالمه ولو ان اللى لفت نظرى انه حابب يستميلنى والحكايه دى بتغيظنى مووووووووووووووووووووووووت
 انه يتصنع او يتكلف عكس طبيعته عشان يعلقنى بيه وانا طبعا مش تلميذه فى ثانوى عشان يدخل عليا الكلام ده مانا مدوباهم 62 قبيه ,مش مقتنعه كمان ان فى واحد عنده اربعين سنه ومخلف بنتين طولى وبيكلم واحده عندها 33 سنه لسه متخيل انى هانبهر لما يقولى انه هايلف لى تحت البيت بالعربيه وقال عايزنى اقف عشان اشاور له لالالالالا مش انا خالص
اصل هى مش قصة حب بقالها 10 سنين يعنى وكمان مش حاسه كلامه نهائى
بضايق اوى من الرجل اللى يغازل البنت او يحاول يستميلها بكلام عشان بس ياخد بونط عندها مش عشان هو حاسس الكلام ده او طالع من قلبه
شايفاكوا ياللى قاعدين قدامى بتمصمصوا فى شفايفكم وتقولوا ايه( ياختى دلع البنات ده طالع من قلبه ايه وبتاع ايه وليه مايكونشى طالع من قلبه بجد)
 هاقولكم لأن الكلام اللى طالع من القلب بيدخل القلب وانا سمعت وماحستشى مع انى سايبه نفسى خالص ولاغيه عقلى وفاتحه قلبى
عموما كفايه كلام على احاسيسى وخلينا فى المهم هو دلوقتى طالب يقابلنى لوحدنا وانا لسه مش عارفه بالرغم من ان المقابله دى هاتفيدنى كتير وهاعرف منها حاجات كتير لكن فى نفس الوقت خايفه يطلع دهوول وينط الرجل الشرقى اللى جواه ويقول
 سمحت لنفسها تقابلنى عليها اللعنه
يتبع....

الخميس، 15 سبتمبر، 2011

العريس رقم 63

قابلته يوم الثلاثاء اللى فات هو رجل فى الأربعين من عمره طبعا هاتقولوا لى اتأخر ليه فى الجواز هاقولكم ماهو ماتأخرشى :)))

طبعا هو اتجوز وطلق وعنده بنت طولى فى ثانويه عامه وانا بصراحه كنت اعرفه من قبل كده وعارفه مراته وعارفه عيلته كلها فى صلة قرابه بينا من بعيد وده اللى شجعنى اخوض التجربه رغم احساسى انها هاتفشل عشان عندى فكره جيده عن طباع مراته او طليقته  يعنى.

المهم شكله اتغير جدا عن اخر مره شفته فيها فى حاجه زادت عليه وحاجه نقصت منه اللى نقص منه شعره واللى زاد عليه كرشه دا غير انه عملاق ومش عارفه ازاى مالاحظتش الحكايه دى قبل كده ماعلينا هاقول دى شكليات فارغه هو برضه مقبول شكلا يعنى ملون مش ابيض واسود وبالرغم من ان مش ده ذوقى فى الرجاله بس قلت يا بت طنشى خالص وخلينا نشوف اخرتها 
القعده كانت لطيفه جدا وهو حد لبق وكلامه مرتب وبالرغم من كده مش فيه اى حاجه من اللى اتمناها فى فارس احلامى ماعلينا المهم هو طلب رقم تليفونى عشان نتكلم مع بعض شويه وده ريحنى نوعا ما انه مش مستعجل بقى زى الباقى وهايقرفنى وحصلت بينا اول مكالمه امبارح بس ماتكلمشى النهارده تفتكروا طفش وريحنى من مرارة الاختيار ؟؟؟؟
تفتكروا ؟؟؟ هانعرف 
يتبع.....

السبت، 6 أغسطس، 2011

العريس رقم 62


قبل مابدأ اتكلم عن العريس رقم 62 واخر انترفيو عملته لازم الاول انوه عن حاجتين اولا :ان الداهيه رقم 61 ظهر اخيرا وطلع مشكلته ان مامته كانت فى المستشفى وهو قال ايه محتاس بيها طبعا انا مش مصدقه الهجص ده بس عموما جوز صاحبتى الله يباركله ويكرمه قفل الموضوع بطريقه جامده جدا يمكن لو كنت انا مكانه ماكنتش عرفت اعمل كده
 لما الاستاذ بهاء المحترم (واعتذر عن لفظ بهاء طبعا ) قابله وقاله على ظروفه كانت ايه وبرر عدم اتصاله بيا طول المده دى كلها بإن مامته كانت فى المستشفى وهو كان مشغول معاها كان من المتوقع من جوز صاحبتى انه يرد عليه يقوله :
(معلشى خلاص الموضوع انتهى من عندها واعتبرت الموضوع كأنه لم يكن لأنك اتأخرت فى الاتصال ) 
زى مانا قلت له لأنى طبعا مش من المنطقى انى افضل مستنيه امه الى مالانهايه ولكن إتفاجئت ان صاحبتى بتتصل بيا تانى يوم وبتقولى ان جوزها قاله الاتى :
(عموما احسن انك ماتصلتش لأن هيا رجعت فى كلامها تانى وقالت ان مستقبل وظيفتك مش مضمون وايه اللى يجبرها تستحمل الظروف دى ؟وحتى مراتى قعدت تقنعها لكن هى رفضت تماما ) 
طبعا الاخ ده بيشتغل ظابط جيش صحيح لكن كان ناوى انه يطلع معاش السنه الجايه عشان عنده عيب خلقى قصدى طبى وهو قالى كده وانا طنشت قلت مش هاقف على الحاجات الصغيره دى واكبر دماغى لحد ماشوف اخرتها وبرضه عشان ماحدش يقول دى بتتأمر وبعد كل ده هو اللى إتأمر عليا بس بجد اهو خد فوق دماغه  وبقى شكله هو اللى عره تسلملى يا وليد يا جوز صحبتى
والحمد لله مش مضطره اتجوز عريس مش طايقاه 100%
ودى كانت نهاية الداهيه رقم 61 (صبرنى يارب)
ثانيا: اتقدملى 3 عرسان تيك اواى مابين العريس رقم 61 والعريس رقم 62 بس انا قلت بلاش اوجع دماغكم بيهم اصل واحد عنده 45 سنه وواحد 46 وواحد 48 وطبعا دول هاكون محتاجه اخد كارت ضمان ولازم اعرف صلاحيتهم هاتخلص امتى وعلى كل حال انا اللى مش بشوفه وبرفضه من بره بره مش بحسبه ولا ايه رأيكم ؟
المهم خلينا فى العريس رقم 62 طبعا مستغربين انى مش بشتم فيه اصله بصراحه من المواضيع الخفيفه على قلبى وكان بجد حد راقى جدا ومحترم بس برضه للضروره أحكام
عنده 39 سنه وبيشتغل مدرس كمبيوتر فى الكويت وعنده عربيه ومتيسر الحال ومنفصل وعنده بنتين من مراته طبعا ان اول ماشفته برضه قلت كالعاده بينى وبين نفسى ماخدوش يا بابا ماخدوش يا بابا ماخدوش يا بابا  وخصوصا انى وانا لابسه كعب هو جايلى عند كتفى بالضبط ولكن قلت معلشى يمكن لما اتكلم معاه يعجبنى ومش مشكله القصر دى شكليات فارغه (صبرنى يارب)
المهم ان احساسى ماتغيرشى وانا قاعده  معاه لكن سبحان الله لاحظت انه شخصيه صريحه جدا مش عارفه عشان هو انسان كويس ولا انا اللى ربنا بيحبنى ؟
المهم قالى ظروفه كلها من الالف للياء من غير مايكذب ولا يتجمل وطبعا اللى فهمته ان مراته ماضيه على ورقه انها فى حالة لو اتجوزت هايكون البنات من حقه وكمان وقت وصولهم لسن انتقال الحضانه هايكونوا برضه من حقه يعنى المهم انى هاتدبس فيهم فى كل الاحوال وبكده بقى قلب على العريس رقم 58 فاكرينه؟
والأدهى من كده انه ماعندوش شقه ولما بقوله طب ولما تتجوز ناوى تقيم فين قالى فى اى فندق والالذ انه مستعجل جدا عشان مسافر الكويت بعد العيد ويتمنى اننا نتجوز قبل مايسافر شفتوا الحلاوه مش عارفه جاب العشم ده منين اذا كنت انا محتاجه وقت عشان ابلعه هو شخصيا الاول وبعدين محتاجه وقت عشان ابلع حكاية بناته اللى هاربيهم دول ومحتاجه وقت عشان اقنع اهلى بحكاية الفندق دى دا اذا اقتنعت انا اصلا
كل ده وهو عايز كل حاجه بسرعه وبيقول ياريت نتجوز قبل مايسافر, فكر هو عايز ايه برضه مش انا عايزه ايه زيه زى كل الرجاله لكن ده مايمنعشى انه رجل محترم لأنه كان صريح من أول قعده
المهم روحت البيت والغريب انى مافكرتش فيه نهائى ولا فى كلامه ولا حاولت اخد قرار لكن برضه صليت استخاره ومش عارفه ليه مافكرتش بالرغم من انه كان مستنى رد منى وكأنى قرفت من التفكير او قرفت من العرسان مش عارفه دا انا حتى ماقلتش اى حاجه قالها ليا ليهم فى البيت وكل اللى كنت مركزه عليه انه شخصيه غير مقبوله بالنسبه لى ومعقوله هاتجوزه وهو مش مالى عينى ؟ وبدأت احمل الهم  وكأنى كنت بفكر أوافق من كتر اليأس ومر يوم والتانى واتصل الوسيط يسألهم عن رأى ولما سألونى لقيت نفسى بقول لهم هو مستعجل وانا عايزه وقت عشان ابلعه واقتنع بيه اذا كان عنده استعداد اننا نتكلم ونعمل قاعده تانيه وتالته لقيتهم بيقولوا لى:( انتى هاتعملى قاعده تانيه وتالته وبرضه مش هاوافق يبقى ملهاش لازمه انك تعطليه انه يشوف عروسه تانيه) وكمان لما عرفوا حكاية بناته وانه ماعندوش شقه هما اللى رفضوا والموضوع خلص فى لمح البصر وكمان ماتحملتش انا مسؤليته عشان مارجعشى اندم
تنفست ساعتها الصعداء بعد ماكنت حامله الهم  لأنى برضه  بقيت مش مضطره أتجوز واحد مش مالى عنيا ولا قلبى ولا حتى اندم عليه
والله ربنا كبير
 لكن كل اللى قلته(عموما انتم كده متحملين مسئولية العريس رقم 62) وكأنى بقولها لنفسى وبعفى نفسى من المسئوليه
وكفى المؤمنين شر القتال والى اللقاء مع العريس رقم 63 يارب تظبط المره دى فتكوا بعافيه:))) 

الأربعاء، 13 يوليو، 2011

نهاية الداهيه رقم 61

لما انت مش هاتتصل بتاخد رقمى ليه يا متخلف؟؟
دى الجمله اللى قلتها بعد مانتهى موضوع العريس رقم 61 بلاش  ادخل فى تفاصيل ملهاش لازمه وخلينى اجيب من الأخر لأن بصراحه ماحصلتش حاجه تضايقنى زى كل مره فى ملابسات الموضوع يعنى صاحبتى اللى بلتنى بالعريس هى وجوزها كانوا فى منتهى الادب والرقى ماحدش قالى الكلام السم اياه ده اللى بيعفرتنى ويخلينى قاعده فى الانترفيو مش على بعضى ولا اى حاجه وده طبعا لان صاحبتى دى بصرف النظر عن انها محترمه فهى عارفانى كويس ودايما بحكيلها على مواضيعى واللى بيضايقنى منها وتصرفات الناس اللى بتجبلى العرسان عشان كده هى قالت اكيد فى نفسها مافيش داعى تخسرنى عشان جوازه 
المهم  نتكلم عنه شويه هو ظابط مهندس يبلغ من العمر 40 عاما وخطب مرتين قبل كده وفك خطوبته لأسباب غير معروفه شكله معقول شبه جون ترافولتا وعيونه ملونين ولبسه معقول صحيح هو ساعات بيبقى بلدى اوى يا حسين فى طريقته فى الكلام وكمان طريقة قعدته مش شيك بس انا قلت يا واد طنش خالص دى شكليات فارغه وخلاص بأه مش هانقف على دى بأه فى حاجات اهم الواحد يهتم بيها وعشان ماحدش يقول انى بتأمر والكلام الأهبل دا اللى انتوا عارفينه 
سابونا نتكلم لوحدنا شويه وطبعا كان مستغرب أوى انى بحفظ قراءن عشان مش باين عليا
  قلت لنفسى:اااااااااااااه ابتدت التفاهه اهيه
وكأنى كنت رايحه اشوفه وانا لابسه بدلة رقص او مثلا كأن اللى بيحفظ قرأن ده لازم يكون بلحيه او نقاب لا حول ولا قوة الا بالله
المهم انا والله كنت برد بذوق ودبلوماسيه على غير العاده وفهمته ان الواحد المفروض مايخدش بالمظاهر وبعدين تجاذبنا اطراف الحديث فى مواضيع عامه وبعدين استأذنت عشان الوقت كان إتأخر روحت البيت صليت استخاره وبعدين صحبتى كلمتنى وقالت لى إنه  قال لجوزها انى جميله ولذيذه وشكلى بنت ناس  بس هو محتاج رقم التليفون عشان يكلمنى لأن الانترفيو ماكنشى كفايه عشان يحدد وانه اتحايل على جوزها لأن جوزها ماكنشى راضى انه يديله الرقم وقاله انى احتمال مارضاش وده من باب إنه يعززنى يعنى
وكأنه هايعمللى بحث حاله وحياة امه
ومع ذلك قلت يا واد طنش خالص ورضيت انها تديله الرقم وعليها من يوم الجمعه اللى بعد المقابله لحد دلوقتى لا حس ولا خبر :))
ده معناه ايييييييييييييييييييييه ؟؟
عموما مش هاشغل دماغى بواحد تافه زى ده على كل حال انا بصيت لنص الكبايه المليان وفرحت انى مش مضطره اتجوز واحد بلدى زى ده
ودى كانت نهاية العريس رقم 61 والى اللقاء مع العريس رقم 62:) 
ملحوظه :العريس ده حاجه كويسه فى (cv) بتاعتى عشان يثبت انى مش بتأمر ولا بطلع القطط الفطسانه ولا حاجه وهو اللى مش لوحده من غير ماقرب له 

الثلاثاء، 28 يونيو، 2011

الكارثه رقم (60)

طبعا انا مش متعوده دايما انى اسمى العريس كارثه الا لما يبقى كارثه بجد
ليييييييييييه بقى هاقولكم حاااااااااااااااااااااااااالا.
شاب فى الثلاثينات  اسمه مازن معاه ماجستير مش عارفه في ايه كده المهم مقبول الشكل لسه جاى من استراليا طازه وبيدور على عروسه(وش واحده مكسوفه) للأسف طلع من نصيب أختكم بمبونه .
اتوسطت احدى زميلاتى فى العمل من منطلق انها مستخسره جمالى وثقافتى و......و....الى اخر النغمه اللى انتوا عارفينها وانا حافظاها ومن منطلق طبعا انها عايزه توفق راسين فى الحلال المهم بلتنى قصدى جابته ليا فى الشغل برضه 
ملحوظه:الست دى برضه هى اللى جبتلى العريس رقم59
المهم كان يوم ماطلعتلوش شمس انا كان مودى وحش قابلها بيوم وكنت نايمه معيطه وحالتى زفت اول ماشفته فضلت قاعده ساكته وبرد على اى حد يكلمنى لكن مش ببص له ولا بوجهله كلام وهو كمان ولا بصلى ولا مره ولا وجهلى كلام لحد ماخلصت القعده على خير ومشى وانا قلت فى قرارة نفسى الحمد لله شكله ماكنشى طايقنى وده فى نظرى احسن بدل ماتكلف عناء انى احتار انى اقول اه او لأ تبقى جت من عنده وكفى المؤمنين شر القتال .
انما الكارثه انى الاقى تانى يوم زميلتى جايه تقول ان البيه بيقول ان ماما عايزه تجوزه واحده تانيه وحتى انها قالت له التانيه بتشتغل فى بنك ومتعينه لكن أنا بالعقد فى مدرسه 
يا روح مااااماااا ولما انت ماما اللى بتختار لك تتجوز مين وانت ابن ماما كنت جاى ترمى بلاك عليا ليه وتقرفنى اكتر مانا مأروفه 
لما انت ماعندكشى شخصيه عامل فيها راجل ليه وبتدور لنفسك على عروسه يا نانوس عين ماما
ودى كانت نهاية الكارثه رقم 60 
ملحوظه :على فكره عارفين اللى ضايقنى فى الموضوع ده ايه ؟؟؟؟؟؟؟
 انى كنت فاكره ان العريس رقم 60 هايكون احسن من كده وهايطلع هو ده 
يالا اهوا خد الشر وراح ولا هانرفز نفسى ولا اضايق.
الى اللقاء مع العريس رقم 61 يوم الخميس الموافق30/6/2011فى تمام الساعه السابعه ونصف مساءا بتوقيت القاهره

الجمعة، 1 أبريل، 2011

هو أخر عريس كان رقم كام؟ أه 58:)

يبقى ده بقى العريس رقم 59 مش هاضيع وقت فيه أصله برضه كان زى النسمه وماحستشى بيه لدرجة انى بكتب البوست على المدونه عدل من غير ماكتبه بره الأول وبعدين أحطه هنا أصلى هأقول أيه يعنى جديد مانتوا عارفين تعددت الأسباب والعرسان هما هما
المهم روحت شغلى زى كل يوم ولما خرجت من مكتبى عشان اجيب حاجه ورجعت تانى لقيت حضرته مشرف ,بصراحه كانوا اتنين واحد موزز والتانى فوزز ههههههههههه قصدى مش حلو بس باللغه الحديثه المتطوره الخاصه بيا المهم قعدت على المكتب وتنحت شويه كده وأول ماعرفونى بيه عرفت على طول انه عريس ومش جاى فى شغل ماهو خلاص بقى بقيت خبره أومئت برأسى إيمائه خفيفه وإبتسمت إبتسامه بارده ه ه ه ه ه ه وسكتت وروحت قايمه بعد التعارف بتلات قايق بالظبط وخرجت بره ولما رجعت كان مشى حمدت ربنا وإستهبلت لحد ماجت زميلتى تكلمنى وأول ما نادتنى بره فهمت طبعا وعلى قد ماكنت متغاظه منها ومن مجايبها حمدت ربنا انها برضه مش قالتلى عشان مبقاش متوتره وطبعا على نغمه واحده ماخدوش يا بابا ماخدوش يابابا ماخدوش يا بابا
الى اللقاء مع العريس رقم60

السبت، 15 يناير، 2011

15خطوة تؤهلك للقب "عانس"

هو فى كده؟؟؟؟؟؟؟؟؟؟؟؟

فكرت أكتب كل اللى عايزه أقوله فى تعليق على البوست اللى فات لكن لقتنى مفروسه ومتغاظه جدا وأنا بأرد على مدام شمس النهار قلت لازم أكتب بوست كامل أعبر فيه عن غضبى.

 من زمان وأنا كنت عايزه أكتب بوست عن المشهد ده من الفيلم بس نسيت وإفتكرت دلوقتى لما دخلت وعلقت عليه  ولو إنى أصلا كنت حاطه الفيديو عشان العريس اللى فى الفيلم ده فى شبه كبير بينه وبين( الكارثه رقم 58) مش فى الشكل طبعا لكن فى المضمون لكن مايضرش أعلق عليه برضه أهم كلهم عاهات زى بعض .

المشهد ده بيقول حاجات كتير قوى يعنى فى الأول البيه ده أول مادخل البيت كان منمق  وراقى وبياكل بالشوكه والسكينه وبيمسح شفايفه بمنتهى الرقه ومافيش فيه غلطه وعزمها على العشاء وراح محل فخم كمان يعنى أكيد مش بخيل وبيتكلم بكل رقه ورومانسيه وبعد كده ظهر على حقيقته بصوته العالى وأفكاره المتخلفه  البعيده كل البعد عن الرقى زى النوعيه التيييييييييييت اللى بتورد عليا.

لكن على مين هى هنا كانت أذكى منه أوى من كتر الللى شافته وعدى عليها بقى عندها خبره زى حالاتى وعشان كده حاولت تستخدم البادى لانجوتش وتحط  إديها فوق إيده عشان تبقى إيديها هى اللى فوق وتكون هى اللى مسيطره عشان لو ماتضايقشى من ده يبقى ممكن يكون رجل بيثق فى نفسه ومش فارق معاه وهو متأكد إنه مسيطر حتى لو إيديه تحت إيديها وبقول ممكن لأن ده مش قاطع فما كان من الغبى غير إنه طلع إيديه هو فوق عشان يحس إن هو اللى مسيطر يعنى ماسمحلهاش إنها حتى تحط إيديها فوق إيده والحركه دى تدل على ان هو رجل مسيطر وديكتاتور وأظن ده بان بعد كده لما طلب منها انها تديه مرتبها بالكامل وتفرش الشقه بالكامل وانه لازم يعرف كل كبيره وصغيره فى البيت وتبيع عربيتها يعنى يحرمها من أى إستقلاليه.

أوعوا تقولوا ده هبل لأ كل حاجه مهما كانت صغيره بتدل على شخصية العريس زى مثلا لما يكون رايح يتقدم وهو لابس صندل ده يترفض من على الباب أنا مكلفشى خاطرى اصلا ادخل اقابله يعنى هاتقوله يعنى إيه صندل هو ده معناها إنه وحش هاقولكم أه أنا أعنس ولا أتجوز رجل لابس صندل ده بيدل على حاجات كتيييييييييير جدا فيه شخصيته

هى حركه صغيره بيعملوها بعض البنات اللى بقى عندهم خبره من كتر ما مر عليهم من عاهات زى مثلا لما بنت بتسأل رجل إذا كان معندوش مشكله إن مراته هى اللى تسوق وهو يقعد جنبها هو إمتحان صغير ومش هاتعرف منه حاجات كتير ونتايجه كمان مش هاتكون قاطعه وأكيد الجوازه مش هاتبوظ عشانه لكن ساعات بيدى إنطباعات معينه للبنت وأكيد بتتأكد منها بعدين. 
أنا شخصيا بحس إن الرجل اللى بيضايق إن الست هى اللى تسوق وهو يقعد جنبها بحس إنه مش بيثق فى نفسه كفايه وكأن سواقتها هاتنقص من إحساسه برجولته وإن الرجل لو ماكنش عنده مشكله إن مراته تسوق بحس إنه بيثق فى نفسه وممكن يكون شخصيه قويه كمان ومش فارق معاه إن مراته تسوق ومتأكد إن ده مش هاينقص من رجولته فى شىء ومش معنى إنها هاتسوق العربيه يبقى هى اللى هاتسوق الحياه كلها وهاتكون هى القائد.

عموما نرجع للفيلم تانى الأستاذ المحترم اللى بيقول يا حبيبتى وإسمحيلى أقولك يا حبيبتى أوففففففففففففففففففففففففففففففففففففففف جمله سخيفه بسمعها من عرسان كتير وأخرهم الكارثه رقم 58 وكل شويه يقول حبيبتى ويعتذر عنها حبيبتى ويعتذر حاجه تقرف بجد لما هو شايف إنه مايصحش يقولها بيقولها ليه وعموما هو بطل يعمل كده من ساعة ماطلبت منه إنه يإما يقولها ومايعتذرشى يإما مايقولهاش أصلا.
أوففففففففففففففففففففففففففف كلهم صنف واحد
ماعلينا
الأستاذ المحترم عايزها  تفرش الشقه بالكامل و تلتزم بالحجاب وتبيع عربيتها وتعمل شغل البيت لوحدها وياخد مرتبها كله وتخدم مامته لما تيجى تزورهم من غير مايفكر فى البهيمه اللى هايتجوزها وطلباتها وإحتياجاتها وده كله قصاد إنه هايكون جوزها وكأنه بيمن عليها إنه هايتجوزها وبيعتبر ده فى حد ذاته شرف هايمنحه ليها وكفايه عليها  تشيل إسمه بجد مش فاهمه الناس دى عايشه فى الدنيا إزاى وبتفكر إزاى معقوله فى ناس بالعقليه المتخلفه دى.
وطبعا هى لما حاولت تربيه طلعت سيجاره من شنطتها ومش كده وبس دى قامت عشان تولعها من (رجل) وهى متأكده فى قرارة نفسها إن الشخصيه دى بالعقليه دى ماينفعشى معاها التصرف ده وأكيد هايصدم لكن هى قالت لنفسها إن الجوازه كده كده بايظه والله بتفكرنى بالبنطلون الجينس الضيق اللى لبسته وأنا رايحه أقابل الكارثه رقم 58 للمره للتانيه مع علمى إنه بيحب الإلتزام  يوم ماكتبت بوست
 (وقعته سووووووووودا)كنت ساعتها برضه بايعه القضيه.
إلى اللقاء مع العريس رقم 59

الأحد، 9 يناير، 2011

السبت، 8 يناير، 2011

نداء لكل المدونين



ياساده يا مدونين:

إيه بقى ولا كأنى كتبت بوست ولا حاجه ولا حد يعلق على بوست (نهاية العريس رقم 58 )ولا حد يحتفل معايا بإنه مشى فى ستين سلامه

ماحدش قراه ولا ايه؟

مانتوا كل شويه تدخلوا وتسألوا عملتى إيه ؟

دلوقتى خلاص الكل نفضلى معناه ايه السكوت ده كان عاجبكم ولا ايه ؟

لسه حاسين انى بتأمر ؟

ماهو حاجه من الاتنين يا ما قريتوا البوست ومالقتوش حاجه تقولوها غير مصمصة شفايفكم وطبعا دى مش هاتنفع تنكتب 

يا اما شايفين انى بتامر ومالكوش نفس تعلقوا لانكم زهقانين منى 

ناقشونى من فضلكم دى بقت قضية رأى عام

الاثنين، 3 يناير، 2011

نهاية العريس رقم 58


بصراحه مش رضيت أكمل اللى حصل المره اللى فاتت لحد ماعرف انا نفسى الموضوع هايخلص على إيه
تانى مقابله كانت لطيفه اكتر من أول مقابله وحسيت بقبول أكتر والحمدلله والرجل كان ذوق معايا وكلامه معقول لدرجة إنى عملت تعديل فجائى فى الخطه الحربيه اللى كنت عاملاها وإضطريت أتعامل برقه وماكنتش هجوميه على الاطلاق وفعلا تجاذبنا أطراف الحديث ومرت المقابله التانيه بسلام وده طبعا لأن ماتكلمناش فيما يخص الشغل لأننا لو كنا إتكلمنا فيه كنت أكيد هادى كرسى فى الكلوب وأقلب الترابيزه وأقوم لكن هو إقترح أن نأجل كلام فى مسألة الشغل لحد مانعرف بعض أكتر وافقت أنا على الرأى ده لسببين
 أولا عشان فعلا أدى نفسى فرصه تانيه أعرفه كويس عشان حكمى عليه يكون سليم
والسبب التانى إنى أستجيب لرغبته عشان يعرف إنى شاطره وبسمع الكلام وده عشان أعلمه إنى ممكن أكون بشتغل لكن برضه زوجه صالحه وبسمع الكلام وخصوصا إنه كان متجوز واحده مش بتشتغل ومع ذلك كانت قرفاه فى الدخول والخروج ده طبعا حسب كلامه
 المهم مرت المقابله التانيه بسلام وفى أخرها إتفقنا إن يكون فى بينا كلام فى التليفون وفعلا حصل وتكررت مكالمتنا التليفونيه بس حسيت بقى فى الوقت ده إن العلاقه بينا بقت عامله زى الحرب البارده يعنى موضوع الشغل اللى هو أساس المشكله مؤجل وهو كلامه كله محاولات إرضاء ليا حسيت إنه بيحاول يستميلنى عشان أعجب به وأتنازل عن موضوع الشغل لكن على مين؟
طبعا مش عايزه أطول فى الكلام لكن اللى إكتشفته خلال المكالمات دى عدة مفاجأت ساره كالأتى
 إنه ماطلقشى ولكن إتخلع وإنها رافعه عليه 6 قضايا فى ستة محاكم مختلفه وبتتصل فى التليفون من أرقام غريبه وتفضل تدعى عليه وساعات بتتصل وتطلب تسمع صوت الولاد طبعا دى كانت عدة صدمات بالنسبه لى يعنى إيه اللى يخلى ست تتصرف بالحرقه دى وتعمل العمايل دى  وترفع كمية القضايا دى وتخلع جوزها وتسيب ولادها وترجع تسأل عليهم تانى وكأنها مش سايباهم بإرادتها  الا اذا كان جوزها ده رجل ............

ولا بلاش أشغل مخى  واتسرع فى الاستنتاج لاحسن فى بعض الناس شايفه إن تشغيل المخ الزياده عن اللزوم ده هو السبب فى قعادى من غير جواز وكأن اللى لغوا عقلهم واتجوزا عايشين سعداء على كل حال أنا قلت يا واد طنش خالص وسكت لحد ماشوف اخرتها وانا عارفه انى ممكن اتاكد من الكلام ده بكذا طريقه.

لكن المشكله بقى  ان كل مكالمتنا كانت بتدور حوالين حاجه واحده بس هى( الولاد )وان كل اللى شاغل باله فى الجواز هاعامل ولاده واهله ازاى ودايما بيفكر فى ولاده وفى نفسه وفى احتياجاته هو وبس
اوكيه من حقه يفكر فى نفسه وولاده ويسأل هل هاكون حنينه عليهم ولا لا بس السؤال بقى هنا
 انا فين من ده كله ؟
احتياجاتى ورغباتى وطموحاتى مش شاغله باله على الإطلاق؟
 وعلى كل حال انا ريحت قلبه وباله جدا من ناحية الموضوع ده واكدته له بدل المره الف مره انى هاكون لولاده مرات اب قاسيه جدا وهاعملهم معامله زى الزفت وهاخليهم هما اللى يعملوا شغل البيت كله ومش هأكلهم ولا أشربهم مش عارفه قلقان ليه بقى؟
المهم( أخر )مكالمه بينى وبينه كانت يوم الثلاثاء اللى فات فتح موضوع الشغل والدراسه تانى وطلب منى انى اقول رأى النهائى فى الموضوع ده طبعا بعد كل اللى قلته فوق كان ممكن اعمل ايه واحد بظروفه المهببه دى وقضايا ومحاكم وولاد وكل القلق ده ولقى واحده بنت ناس كويسين ومتدينه وعلى قدر معقول من الجمال ومثقفه وراضيه بظروفه كلها واكدته له بدل المره الف انى فى الاول والاخر بعامل ربنا واكيد هاتقى ربنا فى ولادك بعد ده كله عايز كمان اسيب الشغل والدراسه واتفرغ ليه هو والولاد ده ايه الجبروت ده اول ماسألنى السؤال ده لقيت حياتى المستقبليه بتمر معاه زى شريط السينما وبمجرد ماتخيلت مشهد سينمائى من حياتى معاه بعد سنه مثلا لقتنى قاعده فى البيت بربى ولاده والبيه بيرجع الساعه 10 بليل من شغله يعنى عايز ياكل وينام وانا لا شغل ولا دراسه ولا اى حاجه يعنى مجرد داده ايه العيشه دى بقى مش المفروض يخيرنى ويسبنى براحتى عشان على الاقل يحسسنى انى زوجه لها كيان ومش مجرد داده وليه مش بيقول لنفسه مثلا كده كده مش هاتعرف توفق بين شغلها والولاد وهاتسيب الشغل لوحدها ؟حتى الدبلومه اللى هاخلصها فى شهر 5 مش عايزنى اكملها يعنى من الاخر هادخل معتقل جوانتينامو لقيت نفسى بقول لاااااااااااااااااااااااااااااااااااااااااااااااااااااااااااااااااااااااااااااااااااااااااا
وعلى نغمه واحده ماخدوش يا بابا ماخدوش يا بابا ماخدوش يابابا
الى اللقاء فى البوست الجاى من مستشفى العباسيه قبل ماينقلوها