الخميس، 15 نوفمبر، 2012

عبده العبيط

فى الحقيقه عايزه اتكلم عن الرجاله اللى بين البينين يعنى ماقدرشى اقول عليهم عرسان لانهم ماجوش البيت بشكل رسمى وكمان ماقدرشى اقول عليهم معجبين لانهم فعلا كانوا عايزين يتجوزونى بس انا فعلا رفضت بذوق لانى متأكده ان الموضوع لايستحق حتى اعطاء فرصه للحديث
فى اوقات كتير جدا بسمع تلميحات صريحه بالرغبه فى الجواز 
ولكن بضطر اعمل عبده العبيط عشان متأكده انه ماينفعشى نهائى
 وخصوصا لما الموضوع ييجى عن طريقى انا مش عن طريق البيت بحس انى خفيييفه فى انى اخد قرار بالرفض 
وانا متأكده ان مافيش حد هايراجعنى فى قرارى او يبكتنى او يقولى رفضتى ليه ويبدأ فى سرد مميزات البيه 
المشكله بقى ان فى نوع من الرجاله غريب جدا مش بيرضى يستوعب انى رافضاه الا لما يتقاله فى وشه انه مش عاجبنى 
طبعا انا عمرى ماقلتها بس قلت كلام كتير يدى نفس المعنى بس برضه ماوصلتش وافضل الف وادور واجى يمين وشمال واجيب كلمه من الشرق وكلمه من الغرب عشان افهمه انه ماينفعشى بس مافيش فايده ومثال حى على ده اخينا.ز)
  اللى فضل يقنعنى بالجواز منه وانى اديله فرصه ولما اقوله الجمله المشهوره بتاعتى اللى متعوده دايما ارفض بيها واعتذر بذوق (ممكن يكون انت واحد كويس وانا واحده كويسه بس للاسف مش لايقين على بعض  :(
يرد يقولى :( قولى  على طول انى مش عاجبك وانى مافييش حاجه من فارس احلامك ) :)
سبحان الله طب ماهو فعلا دى الحقيقه 
بس هو انا لازم اقول كده ؟ 
ماتفهم يا اخى لوحدك 
المشكله انه مش فاهم انى عايزه حد يقتحمنى ويهزنى من جوه
 ويبطل كل وسائلى الدفاعيه وساعتها لا هسأل بقى فى كرشه ولا قرشه 
والأخ (م.ز) بقى متخيل انى لو اديته فرصه هايعرف يقتحمنى :)
هو الاقتحام ده هايبقى له معنى لو كان مفتعل؟
 ثما هايقتحمنى ازاى ومن شروط الاقتحام بالنسبه لى انه ييجى فجأه ومن غير سابق انذار ؟
 وهو مستنى الاذن عشان يقتحمنى :(  
على فكره انا بتكلم عن الاقتحام وليس الحب 
  


راحه نفسيه

ماقدرشى انكر انى فى راحه نفسيه رهيبه وانا من غير عرسان وتفكير وتردد
 وبالنسبه للعريس الامريكانى رقم 74 
موجود برضه بس للاسف مش عارفين نلاقى بعض ونتجاذب اطراف الحديث بسبب فرق التوقيت بين مصر وامريكا :)
الليل عنى نهار والنهار عنده ليل واحنا الاتنين بنشتغل
اييييييييييييييه الحل ؟؟
حاسه ان هاتيجى عليا سنه 2025 وانا بقول انى مش قادره الاقى وقت اتكلم فيه مع العريس رقم 74 بسبب فرق التوقيت 
وممكن اتجوز واخلف وهو عندى على الفيس بس مش لاقيين وقت نتكلم 
حاجه مثيره للسخريه اوى ان جوازه تبوظ بسبب فرق التوقيت 
عموما انا هاستمتع بالراحه النفسيه اللى بين عريس وعريس دى لأطرق عالم الرجال وأتحدث عنهم قليلا بشكل عام من غير مايدخلوا تحت نطاق كوارثى

الثلاثاء، 6 نوفمبر، 2012

ابن صاحبه (نهاية العريس رقم 75)




انا ورد عليا ابن امه واتخطبت مره لابن اخته عشان كانت امه ميته
 لكن ابن صاحبه دى غريبه اوى !!
الاستاذ تامر طلع كان بيتلقن كل الاسئله اللى بيسألهالى من صديقه احمد قريب طنط منال اللى لئحت عليا العريس 
احمد( بعيد عننا وعن السامعين) مراته خانته وسمحت لنفسى اتكلم عنه لان كده كده مافيش حد يعرف احمد مين ومراته مين بس اللى حصل انها عرفت راجل غيره وهو متعقد من ساعتها وبيسقط كل عقده على تامر وصديق تامر الانتيم 
وتامر راح حكاله على كل كلامنا 
ودايما معاه الريبورت بتاع كلامنا اول بأول 
وبالمناسبه احمد اللى اتحمق وكلم طنط منال فى التليفون وقالها رد تامر ووصفلها وهو متضايق الرساله اللى بعتها انها رساله قذره :D
وايوه هى رساله قذره لانى قلت له فيها انك مش راجل
 وده لسبب بسيط
 انى ماقدرشى اكون غير ذوق او قليلة الادب
 انما قليلة الذوق دى عمرى ماكنت كده
 وتامر اتبلى عليا وتقريبا قال انى قليلة الذوق 
فاضطريت ادافع عن نفسى بقلة الادب بما انى مش بعرف ابقى قليلة الذوق :D

يالا خد الشر وراح
  ومن ساعتها بقى وانا قافله تليفونى عشان انا جبانه وبخاف حد يشتمنى وعشان كده بشتم واجرى :)

متضايقه لانى عصرت على نفسى لمونه عشان اعامله كويس بالرغم انى مش طايقاه ومجهودى ده كله مابانشى :)

شايفه ناس متضايقه انى بعت الرساله دى وحاسه كمان ان فى ناس مش عايزه تعلق عندى باستفاضه عشان كلامى مش عاجبهم 
عموما ده مش الطبيعى بتاعى وال73 اللى فاتوا يشهدوا :)
وبقول 73 عشان لسه ال74 بيتكلم على الفيس من امريكا
 وبنعرف بعض بسرعة السلحفاه
 لما بنوفق وقت يناسب امريكا ومصر
وكل مايكلمنى مش بيتكلم عن نفسه ولكن مش بيجيب سيرة حاجه غير انه ساق مش عارفه كام كيلو من ولايه لولايه :(
صبرنى يارب!  
مش هاقول يتبع....
 ولكن الى اللقاء مع العريس رقم 74 مضطره انى اتكلم عن ال74 بعد ال75 وابوظ الترتيب 
منك لله يا تامر :(

الاثنين، 5 نوفمبر، 2012

تابع الكارثه رقم 75




 
بعد ماقفلت السكه معاه كنت متنرفزه اوى وقعدت اقول لنفسى هو منرفزنى دلوقتى وحاططنى فى مود مهبب اومال لما يتجوزنى هايعمل معايا ايه ؟
كمان عايز ياحد ضمانات لكل حاجه ومش عايز يدينى اى ضمانات لاى حاجه 
مع انى اصلا ماطلبتش ضمانات
 وساعتها ضحكت اوى لانى افتكرت الحته دى من الفيلم وحسيت انه هو عامل زى حسين الامام لما سألته سوسن بدر طب انت بقى هاتقدملى ايه ؟
قالها : هابقى جوزك !!!!! 

وكأنه بيمن عليا مثلا او ان ال74 واحد اللى قبله اتمسحوا بأستيكه وكنت انا بقى قاعده مستنيه حضرته ييجى يلمنى
المهم بعد ما اتفقنا تانى يوم انه هايتكلم ماتكلمشى فضلت ادعى ربنا انه هو اللى يقول لأ عشان الزن اللى على ودنى وعشان ماحدش يقولى انتى بتتأمرى
 وفعلا ماتكلمشى ولكن ليلا قلت اتصل واعمل اللى عليا لاحسن يكون زعل ماهو برضه لازم اكون زوق بالرغم من اى حاجه
قام ماردش عليا انبسطت زياده وقلت ياما انت كريم يارب :) معقوله يكون زعل وطهق وزهق وغار فى  داهيه ؟ 
المهم قلت بلاش اقاطع
 وتانى يوم جانى الخبر اليقين ان صاحبه كلم طنط منال الوسيطه بيننا وقالها ان كل شىء قسمه ونصيب ولحد كده كان قشطه
( بالرغم من انى اتضايقت انه فى كلامنا مع بعض وعدنى انه لما رأيه يبقى بالسلب او بالايجاب هايقولوا ليا انا فى وشى مش لحد تانى وانا وعدته بنفس الشىء) وكان الموضوع ممكن ينتهى ولكن اللى خلانى اكشر عن انيابى انه اتبلى عليا وقال انى قلت حاجات ماحصلشى انى قلتها زى انى سألته عن مرتبه ودى اخر حاجه ممكن اتكلم فيها وقال انه لما سألنى عن مرتبى مش رديت اقوله مع ان الجهه اللى بشتغل فيها معروف مرتباتها وكمان انا مش قليلة الذوق عشان اقوله وانت مالك
 ده غير انى ماعنديش مشاكل اقول مرتبى اصلا لأى حد 
وقال انى قلت له :فيه حد يتصل فى وقت زى ده ؟ وده ماحصلشى 
المهم ان عفاريتى طلعت وكل قلة الذوق اللى حوشتها طول الايام اللى فاتت  واظهرت بدلا منها ادبا واخلاقا عاليه
 ظهرت كلها مره واحده بس على هيئة قلة ادب :)

 ماحستشى غير وانا ببعتله رساله مكتوب فيها الاتى :
 (المفروض انك وعدتنى كا (راجل ) انك لما يكون ليك تعليق بالسلب او بالايجاب عليا تقولى فى وشى وانا كمان وعدتك تقوم برضه توصل ردك بل ونقدك ليا عن طريق صاحبك اللى كلم طنط منال ؟ 
عموما انا مش مستغربه نهائى من كده لأن الشخص اللى يبقى كداب وبيتبلى عليا ويقول كلام ماحصلشى من السهل عليه يقول اى حاجه وعموما انت اصلا معجبتنيش من الاول وماكنتش قبلاك وهما اللى ضغطوا عليا عشان اشوفك مره تانيه وكنت بطلبها من ربنا انك تقول انت لأ عشان اخلص منك وعموما انا الكسبانه انى مش مضطره اتجوز واحد عايز باصص لفلوسى ومرتبى من قبل مانتجوز) :D
يتبع .....

السبت، 3 نوفمبر، 2012

تابع الكارثه رقم 75






انا كنت وقفت لحد فييييييييييييييييين ؟ 
مممممممممم اه
 لحد مامشى واخد رقم التليفون 
فوت يوم مكلمنيش مش عارفه ليه
 وكلمنى تانى يوم ومكالمته كانت مفاجأه زى القضا المستعجل كده :(
مش قابلاه لدرجة انى ماكنتش قابله اسمع صوته فى التليفون
 بس والله كلمته بمنتهى الذوق 
اصل انا عندى ميزه مهما كنت متضايقه من العريس برضه بعامله بذوق
 المهم فضلنا نتكلم وبرضه بنتحاور فى نفس ال3 مواضيع اياهم
 1- الشغل
 2- النقاب
 3- مصروف البيت اللى هساهم فيه :((
المهم فضلنا نتكلم لحد ماجبتلوا من الاخر لانه زهأنى فى عيشتى ورديت عليه فى ال3 حاجات رد نهائى
 بخصوص الشغل قلت انى مش هاسيبه الا لما احس انه جاى على حساب بيتى وبخصوص النقاب مش هالبسه ابدا لانى بكرهه ومش مؤمنه بيه ثم انى مش شايفه انى رائعة الجمال لدرجة انى البسه وهو مش فرض اصلا 
وبخصوص مصروف البيت دى حريه شخصيه واعتقد ان من حقى اساهم او لأ 
ثم انا ملزمه منك والمفروض تصرف عليا واللى ليك عندى انى مش ارهقك بطلبات فوق مستوى الماديات بتاعتك
 ولو عايزه حاجه غاليه اجيبها انا من مرتبى
 الاقيه بيرد يقولى خلاص الست طالما مش هتساهم فى مصروف البيت تبقى تقعد من الشغل احسن !!!!
انا نفسى افهم كل حاجه فى الجوازه عايز يضمنها قبل مايتجوز ليه ؟!
 يضمن انه لو قالى سيبى الشغل هاسيبه وانى لو قالى البس النقاب هالبسه وانى هشارك فى مصروف البيت 
وانا فى عقل بالى كان نفسى اقوله وانت وحياة امك ايه ضمانتك ليا ؟
يعنى ممكن انت كمان تضمنلى ان كرشك ده تنزله بعد الجواز ؟ 
ولا انك تكون طموح ؟
ولا انك ماتشتمنيش او ماتزعقليش او ماتمدش ايدك عليا او ماتتجوزشى عليا؟ 
ومش طايقاك ومع ذلك ماحاولتش اخد منك اى ضمانات لاى حاجه وانت قاعد تتشرط عليا ؟
بقمارة ايه يا روح ستك؟
عموما كل ده كان فى بالى وماخرجشى منه ولكن بس اللى قلته 
انا كمان من حقى اعرف اذا كنت هاتنفذلى اللى انا عايزاه ولا لأ ؟
يقوم يقولى (انا الراجل انتى اللى لازم تسمعى كلامى واكون انا اللى مسيطر )
راجل شرقى مصرى بكل الاوبشن بتاعته ولسه بورقته بمخه المليس ههههههههههههههه
ودهولل لدرجة انه حتى مش بيحاول يخبى ده او يصطنع انه متحضر او حتى يمثل لحد مالجوازه تتم زى بعضهم
 بس عموما انا عرفت سبب كل ده ايه ؟      
المهم ان عند الحديث عن مصروف البيت  ابتدا صوتى يعلى وابقى حاده فى كلامى وهو قالى بمنتهى الفلح بكسر الفاء انتى بتزعقى كده ليه ؟
فكرت اجيب ضلفها واقوله اه بزعق لانك مستفز وبعدين قلت يابت عيب استنى شويه يمكن يزهأ هو لوحده ويغور وخلينى انا برضه مؤدبه :)
رديت عليه بمنتهى الادب  والرقى وقلت له مش بزعق ولا حاجه انا بعلى صوتى عشان انت حواليك زحمه ايه رأيك لو نقفل دلوقتى ونكمل بكره عشان انا شايفاك تنشنت يقوم يرد عليا الجلانف يقولى (انا لسه ماخلصتش كلامى )!
قلت له بمنتهى الادب والرقى برضه (على غير العاده) : طب اتفضل خلص كلامك يقوم يرد بقلة ذوق ويقولى ( يعنى ايه هاكلم نفسى ؟!
اتكيت على سنانى وقلت له بهدوء 
(طب انت مش عاجبك كده ولا عاجبك كده ؟ ايه الحل ؟
راح قالى خلاص نكمل كلام بكره حسيت من كلامه انه عايز يقفل بس مشكلته انه هو اللى ياخد القرار :)
عشان هو الرجل :)
 زى مافضل طول المكالمه يقولى انا الرجل ... انا الرجل ولازم اكون مسيطر 
(عينه من المجتمع الذكورى المتخلف اللى متخيل ان الراجل راجل بصوته العالى وسيطرته مش احتوائه ورقيه وتحمله المسؤليه 
وبكده خلصت المكالمه وفضل جوايا سؤالين 
ليه هو عايز يضمن كل حاجه كده وليه بيركز على حاجات مش وقتها خالص نتكلم فيها ؟!
عرفت الرد على السؤالين دول مش منه ولكن من اللى بلتنى بيه 
اصلها كانت المكالمه الاولى والاخيره الحمد لله :)
يتبع .....

الاثنين، 29 أكتوبر، 2012

تابع الكارثه رقم 75



وجه العريس بالسلامه هو والست الواسطه 
ولبست وحطيت احمر واخضر بالرغم من ان ماكنشى ليا نفس 
بس كنت داخله مش متحفزه نهائى واعصابى هاديه على غير العادى فى المواقف اللى زى دى 
وكمان كنت حريصه انى اكون مصليه استخاره
 المهم دخلت سلمت عليه وقعدت وفضلت افصص فيه من فوق لتحت 
واكتشفت كمان بالاضافه لمميزاته انه مش بيعرف يلبس
 بس عموما دى تتصلح
 شكليات فارغه 
المهم طبعا كنت بطله من بطلات الفيلم الساقط بتاع كل مره وهو انهم يدخلوا يعملوا اى حاجه جوه عشان يسيبونا لوحدنا
دخلوا كلهم اتكركبوا فى اوضه واحده وسابونا نتكلم مع بعض
 طبعا مش هاقدر افتكر الكلام حرفى لكن مضمون الكلام لا يبشر بأى خير
 زى انه ابتدأ يطرق الخطوط الحمراء اللى موجوده فى حياتى واللى عادة مش ممكن اتنازل عنها ابدا 
زى الشغل والنقاب والمشاركه فى مصروف البيت
 طبعا كان رأيى فى الشغل والدراسه انى مش ممكن اسيب الشغل ولا الماجستير لانى عملت مجهود كبير ومش ممكن يضيع على الفاضى
 ولما تطرقنا للنقاب كنت بدافع عن وجهتين نظر وهى انه مش فرض ده اولا
 وثانيا انى مستحمله الحجاب وانا مش بحبه بس عشان ارضى ربنا كمان هالبس نقاب؟! مستحيل طبعا
 وخصوصا كمان انى شايفه نفسى ملتزمه ومش ملفته
 وبخصوص مصروف البيت طبعا انا شايفه ان الست من حقها يكون لها مرتبها وفلوسها الخاصه حبت تشارك فى المصروف ماشى ماحبتش الرجل مايجبرهاش على ده لانها ملزمه منه 
وهو شايف انها لو مش هتساعد يبقى تقعد فى البيت احسن 
مش فاهمه رجل ايه ده اللى بيبصى لفلوس مراته من قبل مايتجوزها؟!
 المشكله ان هو ده عقلى وهى دى شخصيتى وماقدرشى ابدا اتنازل عن افكارى وامثل عشان اتجوز لانى ببساطه اكيد فى وقت معين هبان على حقيقتى ومش هارضى اسيب الشغل طول مانا مقتنعه انى مش جايه عليه ومش هاقدر اسيب دراستى ومش هارضى انى انتقب ومش هارضى انى اشارك فى مصروف البيت لانه هو اللى طلب وده ماكنشى بالتراضى بينه وبينى وهاتبقى الحياه جحيم
ده غير انى مش قادره افهم هو جايب العشم ده منين؟!
يعنى هو ايه اصلا فى حياتى ولا ايه معزته عشان ارضى انى اسيب شغلى ودراستى واتنقب
 يعنى من الاخر اتدفن بالحيا 
ثما لو هو عايز واحده مش بتشتغل اصلا ومنقبه طب اللى حدفوه عليا حدفوه ليه ؟هو انا ناقصه بلاوى ؟
ماهو كفايه ال74 اللى قبله :(
المهم لما لقلانى قلبت على الوش التانى وقلت له لو انت حاطط انى اسيب الشغل والنقاب شرط للجواز يبقى اسفه مش انا اللى انفعلك وكده الموضوع انتهى
 حس انى قلبت الترابيزه فجأه واديت كرسى فى الكلوب 
والجوازه باظت ... الجوازه باظت
 على رأى عادل امام فى عريس من جهة امنيه :D
  فارجع لم نفسه تانى وقالى لأ انا ماقصدشى كده احنا بس بندردش 
وكأنه عايز يقوللى )ايه يا شيخه هو انتى الواحد مايعرفشى يهزر معاكى ؟ :D
ناس تخاف ماتختشيش :(
بس القعده خلصت وهو استأذن بس قبل مايمشى اخد رقم تليفونى للتواصل تانى
لكن عامة انا مش متفائله وحاسه ان الكلام تانى مالوش اى 30 لازمه لان ارائه المبدئيه زفت
يتبع ....
ا

الخميس، 25 أكتوبر، 2012

تابع الكارثه رقم 75

هاييجى واقعد معاه تالت يوم العيد 
يمكن اللى ماحصلشى من اول قعده يحصل تانى قعده :(

الاثنين، 22 أكتوبر، 2012

أسوأ انواع الكوارث


ذات مومنت لما ييجى عريس زى مابيقول الكتاب ( لقطه) وكل اللى حواليا عاجبهم وانا مش قابله امه :D
بحس ان عندى (مس العشق) على رأى الشيخ مجدى  :)

 
 انا مش مبسوطه :(
 وزهقت بقى انى مش لاقيه اللى فى خيالى :(
مع انى طلباتى مش كتير ومش خياليه 
بس هى عامله زى السهل الممتنع 
يعنى لو كنت عايزه زكيبة فلوس 
كنت زمانى متجوزه ومعايا 10 
ولو كنت عايزه اتجوز موزز
 كان زمانى دلوقتى برضه متجوزه ومعايا 10 
ولو كنت بدور على مركز
 كان زمانى برضه متجوزه ومعايا 10
 ولو كنت بدور على مستوى اجتماعى 
كان زمانى دلوقتى برضه متجوزه ومعايا 10
 ولو كنت بدور على شهادات
 كان زمانى برضه متجوزه ومعايا 10
 لكن انا مش بدور على كل ده
 انا عايزه واحد يكون ببساطه
 زيى
 بالرغم من انى من حقى اتجوز واحد احسن منى كمان بس انا بقول يبقى زيى
 فى مستوايا المادى والاجتماعى والشكلى والموضوعى والثقافى
 واقبله 
بس
 ده كتير عليا ؟
 طب بلاش زيى يبقى اقل منى بس اكون قبلاه بكل عيوبه ونقاط ضعفه 
انما الكارثه رقم 75 هى اوسخ انواع الكوارث بالنسبه لى يا جدعان
 حد مش حاسمه قرارى بشأنه يعنى لا قادره اقول لأ ولا قادره اقول اه
 نفسى اقول لأ
 لانى اول ماشفته معجبنيش ومقبلتوش لا شكله ولا لبسه ولا كرشه ولا شخصيتهحد مالوش حضور نهائى
على فكره انا مش تافهه 
عشان بقول كرشه وشكله انا عمرى ماركزت على الشكل بس لو كنت قبلته كنت شفته اجمل رجل فى الدنيا وكنت قلت كرشه ده عز
 انما انا مقبلتوش
 هو كل حاجه فيه بعد كده كويسه
 ( باختصارمحاسب فى شركة بترول ومن عيله كويسه ووالده كان لواء طيار وامه مديره مش فاكره فين وعنده 34 سنه وعنده عربيه وعماره وارض وطيب ومؤدب ومحترم ) 
 وده اللى مخلينى متردده :(
وخايفه اندم 
 وده بقى اوسخ انواع العرسان
 واكيد هاخد لى كام يوم نكد وعياط ودعاء لربنا واستخاره انه يخلينى اخد قرار ماندمشى عليه
 ده غير مشنة اللمون اللى هافضل اعصرها على نفسى طبعا كل مايكلمنى فى التليفون لحد ماخد قرار 
الامر لله 
يتبع ..

الخميس، 18 أكتوبر، 2012

الفقى لما يسعد

طبعا هى حصلت معايا اكتر من مره ان عريس يدخل على عريس
وفى الحقيقه انا مش باعتبر ده عيب او حرام 
اه 
الغايه تبرر الوسيله 
وطالما الغايه انى اتجوز واتستر يبقى 
ليييييه لأ ؟
وعموما ماحدش من الاتنين هاينجرح لو رفضته 
انا اصلى الرجاله مش بتصعب عليا اصلا 
اللى بينجرحوا ويتشحتفوا هما  البنات يا عينى   
 المهم ان العريس رقم 75 دخل على العريس رقم 74
 هاعمل ايه
 الامر لله 
ولو انى مش بعرف اركز فى حاجتين فى وقت واحد بس مضطره للاسف لسبب بسيط لان عقبال ما استنى موضوع العريس رقم 74 يخلص الاول وبعدين ابدأ فى غيره يبقى ربنا يدينى طول العم
ر ده احنا لسه اصلا محددناش ميعاد عشان نقدر نتقابل على النت وندردش
  هو قاعد فى امريكا وانا قاعده فى مصر وفرق التوقيت بين اكلاهوما ومصر 9 ساعات وعقبال مانظبط معاد يراعى فروق التوقيت هايكون جالى الضغط 
عموما هو مصر بضم الميم انه يتكلم انجليزى لحد دلوقتى مش عارفه ليه بس عموما بكره انا هاخليه بيتكلم عربى لبلب ولا بتوع بولاق 
اما بالنسبه للعريس رقم 75 هاقابله بكره:D
يتبع .....

الاثنين، 15 أكتوبر، 2012

الكارثه رقم 74

بسم الله الرحمن الرحيم 
ندخل بقى على الكارثه رقم 74
 النهارده بالصلاة عالنبى بعتلى شاب مصرى مقيم فى امريكا طلب اضافه على الفيس :D
ايون جواز بالمراسله :D
 هى جديده ومش حصلت لى قبل كده بس كل ده فى اطار حملة (يارب اكملهم 100 ) يمكن ادخل موسوعة جينيس 
بس طبعا لو عجبنى كلامه هاينزل نتجوز جواز عادى حاكم انا مش من اللى بيلبسوا فساتين الفرح فى المطار والجو البيئه ده 
يا مسهللللللللللللللللللللللللللللللللل
يتبع ....  

السبت، 13 أكتوبر، 2012

تابع الكارثه رقم 73








احنا كنا وقفنا فييييييييييييييين ؟
اه سلمنا ومشينا واتفقنا على ميعاد
 جه بقى اليوم الموعود وروحت للنادى انا واختى وزميلتى فى الشغل 
( منها لله اللى مدحتلى فيه )
 اتفاجئت بحاجه غريبه اوى ماكنتش متوقعاها انه جه وجاب مامته واخته معاه وكأنه بيقولى هو ده مستوايا ودى اختى والست دى امى :D
المهم اتصدمت فى مظهرهم وطريقة لبسهم ولكن فى الاول والاخر ده مستواهم والفقر مش عيب 
ولو انه غنى وعنده عربيه اخر موديل ومع ذلك مش قادر يجيب لمامته لبس شيك تحضر بيه المقابله وجايه بعباية البيت !!!!!!!

حسيت للحظه وكأنه قاصد بس ليييييييييييييه
 مش قادره افسر
 ,المهم داريت صدمتى وسلمت بمنتهى الادب ماهو انا اصلى اتعلمت انى مهما اكون قرفانه من ام العريس لكن لازم برضه اعامله هو واهله بأدب بما انى اكيد اكيد مش هاشفهم تانى :D

المهم سبناهم بقى وقعدنا لوحدنا وقعدنا نتكلم انا وهو لحد ماحسيت انه صعب عليه انى امشى متردده وقالى يخلينى اخد قرار فورى برفضه :)

1- جواز متعه من (مغربيه) (يعنى حتى مش ايطاليه او كنديه مش عشان الجنسيه واكل العيش )


2- علاقات غير شرعيه ( وتبريره اصلى انا ماقدرتش امسك نفسى )


3- اخواته كلهم دبلوووووون يعنى (مضحاش عشانهم ولا حاجه دى الشهاده الاساسيه فى العيله )

4- لابس بنطلون مقطع مش مناسب لسن الاربعين مطلقا

5- بحب الست اللى مهتميه بنفسها على طول عشان منظرى قدام الناسوالكرير اللى بشتغل فيه (ديوس )

6- حبيتك اول ماشفتك وحسيت انك كتير عليا

انا فعلا كتير عليك :D

انتهت المقابله وسلمت بأدب ومشيت وانا متأكده انى مش موافقه نهائى 
لان مافيش اى سبب يخلى الجوازه تمشى غير انى زهقت من القعده
 وللاسف ده من نوعية العرسان اللى الواحد يفضل العنوسه عنهم 
لاادب و لا اخلاق و لا عيله ولا مستوى ولا ثقافه ولا تعليم ولا شخصيه 
يبقى ليييييييييييييييييييييييييه؟
الكارثه الكبيره بقى انه تانى يوم وقبل ما أرد عليه لقيت طنط منال بتكلمنى وبتقول انه اشتكى ليها من ان احنا اتمنظرنا عليهم ههههههههههههههههههههههههههههههههههههههههههههههههههههه
طبعا اسلوب مفهوم انه عايز يسبق لانه متأكد انى هارفضه
  وانا واخده على المبادره دى لما بيكون العريس متأكد من الرفض بس كرامته وارمه حبتين 
وعلى نغمه واحده ماخدوش يابابا ماخدوش يا بابا ماخدوش يا بابا
الى اللقاء مع العريس رقم 74

الخميس، 11 أكتوبر، 2012

الكارثه رقم 73




عدت فترة الكساد وابتدى معدل عرسانى يرجع لمستواه الطبيعى بدليل انى قبل ما ارفض الكارثه رقم 73 جات لى الكارثه رقم 74 
 الحمد لله الذى لا يحمد على مكروه سواه:(
 بالرغم من انى بحس فى فترات الكساد انى خلاص عنست رسمى ومش هايتقدم لى عرسان تانى خالص
 لكن فى نفس الوقت بيكون وقت تحفه بالنسبه لى انى اخد هدنه من الأرف والنكد والتفكير والحيره 
المهم نرجع لموضوعنا
 ايه بقى حكاية العريس رقم 73 ؟
بقى العريس ده من نوعية العرسان اللى ذكرتهم قبل كده وقلت انهم مفضلين بالنسبه لى جدا يعنى من النوعيه اللى البنت تقول فيها لأ وهى مقتنعه تماما ان ضل الحيطه احسن من ضله وان العنوسه ارحم بكتييييييير
فى يوم من الايام زارنا الاخ ده فى الشغل وانا ماكنتش موجوده بسبب انه عايز يرشح نفسه فى انتخابات مجلس الشعب الجاى وعندنا فى الشغل فيه كتله تصويتيه جيده الى حد ما وهو على اتم الاستعداد يساعد اى حد وانه نفسه يعمل ندوات تعرفه بالناس الموجوده عندنا
 لاقوه زمايلى  داخل من الباب طول وعرض وعضلات وشياكه واناقه ووسامه ولباقه واى باد واى فون وبلو ايز
 هبل ستات المكتب واتخدعوا فيه وقالوا ده عريس لقطه لبومبونه 
وخصوصا انه طلع بيدور على عروسه كمان وده من حظ اهلى المنيل طبعا لانه بعد مادخل كشف الهيئه واتعمل له دراسه حاله ابتت التجارب انه لا لقطه ولا نيله 
المهم اتصلوا بيا عشان اجى اشوفه وهما بيمدحوا ومبهورين من المستوى الفظيع ومن العريس اللقطه
 قلتلهم لأ لأنى ماكنشى ليا نفس ومابحبش حد ينزلنى من البيت عنوه
 قلت لهم خلوه ييجى بكره 
المهم رحت بكره ده ودخلت مكتبى عادى وقعدت اشتغل
 وبعد شويه لقيت واحده من زملائى داخله وداخل معاها البيه:(
 عباره عن باب متحرك وشكله معقول الى حد ما حييته وقعد هو وزميلتى فى المكتب معاياعشان نتعرف فضل يتكلم ويعرفنى بنفسه و عرفت انه عنده 40 سنه وقعد فى ايطاليا 12 سنه وبعدين منها لكندا قعد 4 سنين وانه كان بودى جارد لعدة شخصيات مشهوره وقعد يعدهم لى ويتمنظر بإنه يعرف تامر حسنى ومحمد حسان ويبص يشوف تعبيرات وشى على امل انى اكون مبهوره يلاقينى منتهى البرود
 وقالى ان عنده شركة حراسه فى كندا بس هايصفيها ويرجع مصر على طول
وانه من عيله بسيطه وعمل نفسه بنفسه وانه مامته كانت بتبيع موز على ناصية الشارع وانه مش بيتكسف انه يقول كده لحد
 وان ده مش يعيبه
 وعرفت كمان انه دبلوم زراعه وشبه كان عايز يفهمنى انه ضحى عشان اخواته
وكمان قال انه عايز يساعد الناس مش عايز يضحك عليهم وياخد منهم اصوات وبعد كده ينفضلهم وطبعا انا استغليت الموضوع ده فى انى اقوله على حاله انسانيه تخصنى وانى اتمنى انه يساعدها عشان اختبره ولكنه قالى اه ... اه ... طبعا .... طبعا بصوت متقطع وانهى الحديث بسرعه وكأنه حس انى زنقته وده كان مؤشر سىء بالنوسبه لى طبعا 
بس انا قلت يا واد طنش خالص اما نشوف اخرتها مع
 ها ها ها هاى
 قال العريس اللقطه :)
 ده غير ان المعلومات البسيطه اللى قالها لا تعطى انطباع جيد على الاطلاق وحسيت ان الموضوع اغلبه مساوىء ولكن برضه مااخدتش قرار وقلت اصبر عشان
( الثلاث اسباب المعتاده)
1- عشان ماحدش يقول انى بتأمر وفى سبيل السبب ده بحرق دمى كتير
2-عشان انا نفسى ماندمشى 
3-عشان يمكن يطلع ( هو ده )
المهم مشى واتفقنا على اننا نتقابل مقابله عائليه بعيد عن الشغل عشان نتعرف ببعض اكتر وعلى قد ماهو ماشى مبهور بيا وعجبته على قد مانا كنت مخنوقه منه ومن موضوعه من اللى خلفوه :)..... يتبع



الخميس، 4 أكتوبر، 2012

الكارثه رقم 72





السؤال بقى انا ليه تخليت عن كسلى وسارعت بإنى ادخل على المدونه اكتب البوست ده بتاع العريس رقم 72 ؟
عشان طبعا الحق اخلص الكلام عن العريس رقم 72 قبل مااتكلم عن العريس رقم 73 :)
اااه هما بقوا كده 73 :)
(يارب اوصل لل 100 وادخل موسوعة جينس )
اهو ابقى طلعت بحاجه من حرقة الدم دى
المهم بلاش نسبق الاحداث خلينا فى الكارثه رقم 72 الاول 
رجل يبلغ من العمر 37 عام ,وسيم ,شيك,طيب,مقدم بحرى ....
. مممممممممم تفتكروا بس كده ؟
 ماكنشى حد غلب:)
 ماهو لازم الناس تحلى البضاعه فى الاول وبعد كده نبتدى ندخل فى المصايب
 بس انا خلاص بقيت اجيب من الاخر واقول للوسيط هاااااااااا فين المصيبه ؟
طلعت طبق الاصل العلقه اللى فاتت
 ارمل وعنده بنت وولد صغيرين وعايز يتجوز بسرعه رهيبه طبعا عشان الداده اللى جابتهاله مامى تحلق تربى العيال
 وتتمرمط وتتبهدل وتشيل الهم ومتلاقيش وقت عندها لحياتها الشخصيه وتحقيق ذاتها 

طبعا فى حد لطتشيف اوى من الجمهور هاييجى يقولى اكسبى ثواب:)
 اوك انا مش هاقولكم الكلمه الاعتراضيه ايااها ولكن هاسألكم السؤال المعهود
 (انتم لما جيتوا تتجوزوا كنتوا عايزين تكسبوا ثواب ولا تعيشوا سعداء ؟
وطبعا هاييجى حد لطتشششيف تانى غير الاولانى هايقولى ماهو لو ولادك كنتى هاتربيهم ؟
برضه هارد رد مختلف عن الكلمه الاعتراضيه وهاقول (لو ولادى :))
المهم انا وقفت فيييييييين اه عند العيال 
فى العادى بقى الرجل بيدحلب ويفضل يقول انى انا عايز اتجوز مش عايز داده لولادى وانا اللى محتاج استقر و هاجيب داده ...و.. ..و...وكثير من  الكلام اللى بيتمحلسوا بيه ويتمسكنوا لحد مايتمكنوا
 وبعد كده شيلى الليله يا حلوه ولكن الاخ ده كان صريح من البدايه
 يحسب له انه ممثلشى ومعاشى الدور عليا 
اول ماقعد على الكرسى وقبل مايرغى عن نفسه  طلع لى بمنتهى البراءه صور ولاده الاتنين وكأنه بيقولى (انتى جايه عشان دووول )
طبعا ماهو لو عايز يتجوزنى عشانه كان عرفنى بنفسه الاول انما هو معندوش وقت يخبى ويمثل
 بيجيب من الاخر على طول لسبب بسيط انه مقدم بحرى وشغله 4 ايام خارج البلد المقيم فيها و3 ايام فى بيته 
وولاده عاملين له ازمه لانه مش بيعرف يسيبهم مع مين ؟؟ 
وده معناه انى هاكون النانى اللى جابتهالوا الست الوالده
 وكمان الالذ انه مش هيشاركنى فى تربيتهم لا ده هايسيبنى 4 ايام فى الاسبوع اشرب المر وطظ بقى فى شغلى ودراستى العليا وخلينى قاعده ابنى فى غير ملكى لحد ماالتعاسه تجيب اخرى 
طبعا المستقبل الاسود ده مر قدامى زى شريط السينما وانا قاعده معاه وانا على نغمه  
واحده ماخدوش يا بابا ماخدوش يا بابا ماخدوش يابابا
البوست لحد كده خلص 
بس عايزه اقول ملحوظه صغيره 
انا معنديش مشكله اتجوز واحد مطلق او ارمل واربى له عياله ولكن لازم اقبله هو فى الاول عشان استحمل عشانه اى حاجه وكمان لازم يتجوزنى عشان هو عايزنى مش عشان ولاده

فترة كسااااد !





طبعا المدونه وحشتنى جدا والكتابه فيها وحشتنى جدا

 بس اعمل ايه ؟

 مش متعوده اكتب فيها غير لما يبقى فيه عرسان قصدى كوارث

,ماهو انا هافضل اقول على عرسانى كوارث لحد ماالاقى حد عدل ينفع يتقال عليه عريس

 وبالمناسبه انا كان عندى فترة كساد بعد العريس رقم  72  لحد العريس رقم 73

هاتقولوا لى ايه ده ؟

انتى هاتحمرئى ؟

 اخر واحد كان العريس رقم 70 يبقى الجاى رقم 71

هاقولكم ماكنشى يتعز ,بصراحه انا مضطررره اسفه انى ماكتبشى عن العريس رقم 71 لانه قريبى وشخصيه بحترمها جدا

( ورجل كوباره)وبما انى لازم اعمل حساب (لفرق السن وفرق الطول وفرق العيال )

 فا مش هاقدر اصنفه تحت مسمى كارثه والحدق يفهم بقى (وش بيغمز)

المهم انى لازم ادى طبعا العريس قصدى الكارثه رقم 72 حقها واكتب عنها فى بوست  لوحدها لانها كارثه من النوع التقيل التقيل اوى

وعشان كده هاقفل البوست ده على كده واكتب بوست تانى عن الكارثه رقم 72

الخميس، 12 أبريل، 2012

الكارثه رقم 70



جفلتهم 70 الحمد لله
 وبرضه على نغمه واحده
 ماخدوش يا بابا ,ماخدوش ياباب ,ماخدوش يا بابا 
وبالمناسبه الجديد بقى
 ماخودهاش يابابا, ماخودهاش يا بابا ,ماخودهاش يابابا 
الحكايه من الاول بقى
اكشن 70 مره 
كنت عند واحده صحبتى فى البيت وكان عندها واحده صحبتها بتاخد معاها الشاى وباختصار شديد عشان بقيت اتخنق من كلام الستات ده بتاع عندك كام سنه وليه ماتجوزتيش والهبل ده 
 هاجيب من الاخر
 قالت لى على الكارثه رقم 70
 شاب فى الاربعين من عمره مطلق كالعاده (حسب اخر موضه فى عرسانى) وعنده بنت ومدير فندق مشهور ومستواه المادى مرتفع جدا (وزى القمر) على حسب كلامها اللى اتأكدت بعد كده انه كله فشر
 المهم سبب الطلاق انه اتجوز واحده اصغر منه فى السن بكتير وكانت طمعانه فيه ده على حسب تعبيرها
 وكانت عايزه تعمل مشاريع وكل شويه تزن عليه انه يعمل مشاريع وهى اللى تديرها لانها كانت بتدير مشاريع لخالها قبل الجواز
 فلما زهق من زنها طلقها :)))
طبعا بالرغم من عدم اقتناعى ان مراته اصلا ماديه وطمعانه فيه ولكن وافقت انى اشوفه من منطلق (ادينى بتفرج ) 
ولما جه اليوم الموعود و حطيت احمر واخضر وروحت عشان اشوف البيه اكتشفت انه شخصيه عاديه جدا واقل من العادى ولا زى القمر ولا حاجه ده غير ان البيه قاعد بياكل لبانه وبيهزر هزار تقيييييييييييييييييييييييييييييييييييييييييييييييييييييل مووووووووووووووووووووووووووت وبيتكلم بتناكه غريبه كأنه فاكر نفسه لقطه مثلا ده غير انه ماكلفشى خاطره يطلب لنا حاجه طول القعده ناهيكم عن المكان الحقير اللى قال نتقابل فيه واكيد انا طبعا بعلق على الموضع ده مش عشان انا محرومه فيروز ولا بيبسى ولكن فيه حاجه اسمها ذوق البيه ماسمعشى عنها 
المهم انى بعد محادثات كتير حصلت بينا اكتشف البيه انى مشغوله جدا بدراستى وشغلى وتدريبى و رياضتى وانشطتى وعشان كده قالى انتى مشغوله جدا ومش عندك وقت وطبعا انا ماكنتش قاصده افهمه كده بس انا مجرد برد على اسئلتهم وتحقيقاتهم وكأنى انا مش من حقى اسأل انا كمان بس ابوس ايدى وش وضهر عشان هو اتقدملى 
واضح جدا انه متعقد من الست المشغوله اللى عندها مشاريع واللذيذ انه قال كده فعلا وعبر عن ده فى القعده وخد الشر وراح الحمد لله وكانت دى نهاية الكارثه رقم 70 

وبخصوص انى بقول عليه كارثه بغض النظر عن مميزاته اللى قلتها فوق
فهو اخطأ فهم مراته لما تخيل انها طمعانه فيه (بفرض ان ده سبب الطلاق) لان الست اللى بتتعود على الشغل مش بتعرف تبطل وهى مش قالت له هات فلوس فى ايدى عشان بقول عليها ماديه 
ولكن هى بس محتاجه تدير مشروع زى ماهى متعوده وعايزه تحقق من خلاله ذاتها 
وثانيا وهو الاهم انه اخطأ فهمى انا الأخرى لما عرف انى مشغوله جدا لانى لو ارتبطت بيه اكيد هايكون له وقت وهاتكون له الأولويه 
لكن ده طبعا فى حالة لو كان( رجل ) 
مش بيتشدق باللبانه وكان عنده ذوق وشياكه 
عموما انا مبسوطه جدا
 لانى قلت قبل كده اخف العرسان على قلبى اللى مواضيعهم مش بتاخد وقت وبتكون محسومه من الاول 
والى اللقاء مع العريس رقم 71 

الأحد، 4 مارس، 2012

الكارثه بالقوى رقم 69


عارفين الحافظ مش فاهم ؟
 هو ده العريس رقم 69 :) 
حافظ مش فاهم
 خريج علوم وجايب مجموع كبير فى الثانويه العامه وعامل ماجستير وبيخلص فى االدكتوراه وبيشغل فى مركز البحوث
 لكن اجاركم الله طبق الاصل العلقه اللى فاتت
 دهولل جدا 
مش بيعرف يقول كلمتين على بعض واللى يضحك ان صاحبتى قبل ماتجيبه فهمته انى مش بحب الدهولات وحاول وهو قاعد معايا انه مايبقاش دهولل فا كانت النتيجه انه بقى دهولل اكترهههههههههههههههههههههههههههههه 
برضه بحكى الحكايه من قدام لورا
 نحكيها من الاول بقى
 الاستاذ ده يبلغ من العمر 34 عاما مطلق ولديه ولد وبنت وليس لديه شقه 
وعنده ام قنبله ذريه بشهادة الكل منفصله عن جوزها بعد ماطق منها ومن طبعها حكاية الاستاذ رقم 69 بقى انه كان قاعد مع مراته فى شقتها لانه مش عنده شقه وكان حماه وحماته جيرانهم هو طبعا بيقول انهم كانوا بيتدخلوا فى كل حاجه بينهم  لكن بقى صاحبتى حبيبتى قالت لى معلومات اكتر لما بلتنى بيه زى انه حماه فى خناقه من الخناقات ضربه بالقلم
 بصراحه كل ظروفه ماكنتشى فارقه معايا قد حكاية القلم اللى كلوا ده 
يعنى معقوله يكون هفأ للدرجه دى؟؟
 انه ينضرب من حماه ويسكت
؟؟
 وطبعا ده يتنافى مع مواصفات الغضنفر اللى انا عايزاه 
عموما انا شفته اول مره وحسيت انه تحت بند (مش منفر) ولكن ظروفه كلها وحشه زى ماعرفتهم والموضوع مافيهوش ميزه واحده المهم انا طنشت وقعدت قاعده كمان يمكن فى حاجات تظهر تشجعنى ولكن كلامه معايا صدمنى جدا انه مش عارف يقول كلمتين على بعض ومش فالح غير فى التسبيل لا واللذيذ انه طلع عضو فى حزب النور ولما بقوله طب يعنى انت ليه مش مربى دقنك وسألته اذا كان عايز مراته تلبس اسدال قالى لا اصلى مش سلفى اوى ؟؟؟!!!
مش عارفه يعنى مش سلفى اوى وسلفى نصن نص؟؟
  هايتخلى عن انتمائه السياسى والدينى عشان الجوازه تمشى ؟
وبعدين يطلع عين امى بعد كده بقى :)
المهم روحت البيت وعلى نغمه واحده ماخدوش يا بابا ماخدوش يا بابا ماخدوش يا بابا

الخميس، 23 فبراير، 2012

الكارثه رقم 69

مضطره اقوم البس واحط احمر واخضر واروح اشوف الكارثه رقم 69 :(:(
يارب عينى على ابتلاءاتك

الأربعاء، 22 فبراير، 2012

الكارثه رقم 69



ليه هادخل على الكارثه رقم 69 ؟
انا ماتلخبطش فى الحساب ولا حاجه انا عارفه ان اخر عريس كان رقم 67 والمفروض انى احكى حكاية العريس رقم 68 قبل ماأحكى على رقم 69 
ولكن للأسف خساره أجيب سيرة الدهولل رقم 68 
وخصوصا انى ماشفتوش وكان بالنسبه لى شبح 
لسبب بسيط جدا لأن حضرته ماجاش أصلا وبعتلى المحروسه أخته تشوفنى
 على إعتبار انها عارفه ذوقه وعارفه ايه اللى يعجبه وايه اللى مايعجبوش
 مش بالذمه ده هبل ؟
يعنى ولنفرض إنى مانزلتش لأخته من زور لأى سبب من الاسباب
 يبقى ده معناه إنه هو كمان مش هايقبلنى ؟
 طب لو فرضنا انى عجبت أخته برضه لأى سبب من الأسباب
 ده معناه إنى هاعجبه هو كمان وهايتقبلنى زوجه ؟؟؟؟!!!!
مش بالذمه أنا بتعامل مع أشكال عالم متخلفين ؟
يعنى من أولها دهولل ومش عارف يختار لنفسه وباعت أخته تنقيله هى 
يارب يولع فى كل الرجاله المتخلفين الأغبياء
أظن مالكوش حق بعد كده تقولوا بقى انى بتأمر
يتبع....

الثلاثاء، 17 يناير، 2012

العرسان وأشياء أخرى


رجاله عايزه الحرق

إكتشفت إن مش العرسان الغير مناسبين بس اللى بتضايقنى ولكن
(العرسان واشياء اخرى)
وبالمناسبه ده اللى خلانى أغير إسم المدونه من عريس النجده لمذكرات موززه عانس عشان أتبحبح فى الكلام شويه 
 مش قادره أقولكم شعورى إيه وأنا بكتب البوست ده
 وإن شاء الله هايكون له سلسله كمان
 يعنى رجاله عايزه الحرق (1) ورجاله عايزه الحرق (2) ورجاله عايزه الحرق (3)
 كده يعنى
واكيد هابقى مبسوطه عشان بكرر جملة رجاله عايزه الحرق كتير
المره دى مش هاتكلم عن عرسان خلينا ناخد راحه بعد العريس 67
ونتكلم عن نوعيات من الرجاله اللى بقابلهم فى حياتى واللى انا متأكده ان كل بنت إتأخرت فى الجواز بتقابلهم
 أصل العينه الوسخه دى بتشتغل على المتأخرات فى الزواج دايما
 وفى كتير من اصحابى فوق الثلاثين  وغير متزوجات حكولى عن إنهم بيقابلوا  النوعيه دى كتير واخر قصه هى اللى إستفزتنى أكتب البوست ده بصراحه
  طبعا مش هاعمم واقول الرجاله كلها فيها الخصله دى
لأن أكيد فى واحد أو إتنين أو تلاته بالكتير من الرجاله كويسين
 المهم النوع ده من الرجاله بيكون متجوز وماعندوش نيه إنه يتجوز ومع ذلك بيحاول يثبت البنت اللى قدامه ويجرى وراها عشان يوقعها فى غرامه
 طب ليييييييييييييييييييييييييييييييييييه ؟
انا مش فاهمه
 يعنى إنت مش مكفيك المدام وعايز تعدد ؟
خلاص إتنيل اتجوز عليها طالما مش ماليه عينك
 إنما طالما إنك مش عايز تتهبب تتجوز بتلعب على المسكينه الغلبانه دى ليه ؟
 وخصوصا إن فيما يبدو الرجل بيكون حاسس إن البنت دى محتاجه لأحاسيس ومشاعر معينه لأن لسه مالهاش شريك لحياتها فا بيحس انها لقطه بالنسبه له  وصيد سهل وهاتكون ضعيفه قدامه وهاتسلم على طول
منتهى الإنتهازيه طبعا
وبعدين لما البنت غصب عنها تتخيل إن اللى بيكلمها رجل محترم
 طبعا ده لو جزمنا بموضوع الرجل ده وماكنش مجرد ذكر فى البطاقه
بتصدقه وتنجذبله يقوم الرجل يبدأ يمشى فى طريق الوطى اللى اتعود عليه من أيام ما كان شاب صغير بيثبت بنات الثانوى ويبتدى يتقل عليها ويفهمها أن مراته عنده مهمه ووولاده.....الى اخر الاسطوانه المشروخه  
طب ولما هى مهمه عندك يا لطخ كنت بتحاول تستميل البنت الغلبانه دى ليه ؟؟؟؟
 أه طبعا هانسمع جملة النداله المعهوده:
 (هو أنا ضربتها على إيديها )؟
طبعا النوع ده من الرجاله فى الأصل بيضحك على ستتين مش ست واحده اللى بيثبتها واللى متجوزها مع إنه فى قرارة نفسه بيكون متخيل هو قد إيه زوج مثالى وبيحافظ على بيته وولاده وبيتقى الله فيهم وضميره ممكن يكون مرتاح طب بالنسبه للأخت اللى إنت بتخدعها دى 
إيه أخبار ضميرك من ناحيتها ؟
مرتاح برضه ؟
ولا ده مش شغلك بقى هاتقرف نفسك بيها ليه ؟
كلبه وراحت مش بنى أدمه اصلها عندها مشاعر وأحاسيس إنت إستغلتها 
ثم إن ربنا هايحاسبك بس على مراتك وولادك لكن مش على أى حد تانى أذيته ده طبعا لو كنت تعرف ربنا من أساسه 
  بس للأسف عايزه أقولك إنت لا زوج مثالى ولا نيله ولا بتتقى الله لا فى مراتك المتأرطسه اللى قاعده فى البيت مش حاسه بحاجه ولا بتتقى الله فى البنت اللى انت خلتها تحبك  يعنى مثلا لو فرضنا إن تتطورت العلاقه بينك وبين البنت دى وقابلتها وجت مراتك إتصلت بيك وإنت معاها 
هاتقول لمراتك إنها معاك ؟ 
مش هاتقدر طبعا لأنك جبان ,طب وده يرضى ربنا ؟
طب إنت كده بتتقى الله فيها ؟ 
طب إنت كده زوج مثالى؟
طبعا هاتقول أه
عارف ليه؟
لأن مقاييس المثاليه عندك بتشكلها على أهوائك أنت مع إن لو جبنا مراتك وقلنا لها إنك على علاقه بواحده تانيه تفتكر إنها هاتكون مبسوطه ولا هاتهد الدنيا فوق دماغ اللى خلفوك ؟ يبقى إنت زوج مثالى إزاى ؟؟
ده غير إنك عشان تفهم البنت التانيه إنك مش مرتاح فى حياتك الزوجيه لأن ده طبعا منطقى ولزوم التثبيت يبقى هاتضطر أسفا إنك تبرز عيوب مراتك قدام البنت التانيه وتبين قد إيه هى مش مهتمه بيك وقد إيه مهمله فى بيتها وفى نفسها وإنها مش بتلبس ومش بتعمل يبقى إنت كده اللى بتخرج أسرار بيتك بره مع إنك ممكن تكون طول النهار بتضايق من مراتك إنها أهلها عارفين كل حاجه عندك فى البيت بس طبعا دى حاجه ودى حاجه حلال ليك وحرام عليها  مش كده ؟
هارجع وأسألك تانى إنت كده صح ؟
أنت كده زوج مثالى ؟
إنت كده بتتقى الله فى بيتك ؟
على فكره يا جماعه بالمناسبه مافيش رجل بيتخطف حكاية إن البنت خطفت الرجل من مراته دى إشتغاله كبيره أوىىىىىىىىىىىىىىىىىىىىىىىىىىىىىىىىىىىىى يعنى يا إما موروثات ثقافيه يا إما السينما المصريه والحب الضائع هما اللى بوظوا دماغنا الرجل هو اللى بيخطف مش بيتخطف ولو حصل وإتخطف بيتخطف  بمزاجه وكامل إرادته لأن هو الطرف الأقوى فى أى علاقه وبالتالى هو اللى بياخد القرارت دايما 
بس هو دايما بيحاول يلاقى شماعه يعلق عليها غلطاته وتفاهاته ونزواته وشهواته وفى الغالب بتكون الست هى الشماعه دى