الخميس، 30 ديسمبر، 2010

أنا كده وإن كان عاجب


جه اليوم الموعود وكان المفروض نتقابل فى تمام الساعه السابعه مساءا إتعمدت إن كل حاجه هاعملها فى اليوم ده تكون بمزاجى بما إنى بايعه القضيه ومش هاممنى الموضوع يمشى ولا لأ لبست اللى على مزاجى وحطيت مكياج على مزاجى و روحت براحتى وفى الميعاد اللى على مزاجى  يعنى من الأخر عايزه أوصل رسالة 
(أنا كده وإن كان عاجب)
وقعدت ووصل البيه وأول ماشفنى وشه إتقلب شكلى أكيد نرفزه قلت فى بالى 
(هو إنت لسه شفت حاجه إستنى عليا )
وبعدين قعدنا لوحدنا بعيد عن العيله وأول ماقعدت حطيت رجل على رجل أصلى عارفه إن الحركه دى بتضايق بعض العرسان بس العرسان الدهولات بس اللى شايفين إن ده بينم عن شخصيه منحله أو غير ملتزمه أو أو أو مع إن الحكايه كلها إنى برتاح فى القعده دى بس لكن هاقول إيه بقى فى السطحيه وضيق الأفق المهم إبتدينا نتجاذب أطراف الحديث.
يتبع ....     

الأحد، 19 ديسمبر، 2010

وقعته سووووووووووووووودا


وقعته سوووووووووووووودا 

رد العريس وقال عجبانى  ومرتاح لها وكان عنده رغبه إن يكون فى قاعده تانيه مع بعض عشان نعرف بعد أكتر وأنا يومها روحت صليت إستخاره كالعاده وكنت بجد ناويه أقول لأ بالثلث وبعدين بصراحه لما فكرت قلت يا بت يا بمبمونه بلاش تتسرعى مش مدلوقه على الجواز إنما عشان بس ماندمشى فى يوم من الأيام  ويطلع حد كويس وكمان عشان ماحدش يلومنى ولا يعتب عليا ويمكن أكون فاهماه غلط.

 ورجعت فى كلامى ورديت أنا كمان وقلت أوكيه نتقابل تانى بس بينى وبين نفسى قررت إنه لو أنا فاهماه فعلا غلط على إعتبار إنه ده رأيه لكن فى الأخر هايخيرنى ومش هايجبرنى أسيب شغلى ودراستى يبقى كفى المؤمنين شر القتال.

لكن بقى لو هايكون ده شرطه عشان يتجوزنى على أعتبار برضه إنه بيمن عليا لم هايتجوزنى وبيقدم لى خدمه يبقى وقعته سووووووووودا ومش خساره فيه والله إنى أقعد معاه عشان أعلمه الأدب بس.

وماحدش هايرحمه من إيدى وأى حد فيكوا متعاطف معاه مايعرفوش عشان يلحق يحذروه وينفد بجلده .

ميعاد المقابله يوم الثلاثاء الموافق 21/12/2010 وابقوا ورونى هاتحذروه إزاى.
للحديث بقيه

السبت، 18 ديسمبر، 2010

الكارثه رقم 58


الكارثه رقم 58

فى البدايه أحب أنوه انا عملت المدونه  دى ليه ؟

مش عشان  تشتهر أو تتعمل كتاب أو مسلسل زى مدونة عايزه أتجوز و لكن عشان لما أكبر فى السن عن كده أو حتى لما أعنس وماتجوزشى الناس تبقى عارفه أنا ماتجوزتش ليه وأشهدهم على نوعية العرسان اللى كانت بتجيلى ويحكموا هما وعشان لما يجيلى ضغط أو سكر الناس ماتسألشى جالها ليه ويبقى كل شىء على يدكوا وساعتها تبقوا متأكدين إن الحال اللى هابقى فيه هايبقى أحسن حال وقعاد الخزانه ولا جوازة الندامه زى مابيقولوا.

عموما يالا بقى مع بعض نشوف حكاية العريس رقم 58 أو سورى الكارثه رقم 58 وطبعا أنا إتفقت معاكوا إنى مش هاقول كارثه إلا لما يثبت عدم جدارته مانا كمان مش غاويه تهزيق فى الناس .

نقطه ومن أول السطر

فى الحقيقه بعد أزمة الجواز دى بقيت حاسه إن الرجاله مهما كان فيهم من عيوب بيتخيلوا إنهم برضه لقطه مهما حصل على إعتبار إن البنات مش لاقيه جواز وخصوصا لما تكون بنت فوق التلاتين زى يبقى أكيد هاتريل لما تلاقى عريس ومش هاتصدق نفسها وهاتقول أه ه ه ه ه ه بالثلث قبل مايطير
 ليه أنا مش فاهمه و بقماره إيه مش عارفه؟

طبعا دى بدايه مشرقه بالأمل أوى تعرفكوا العريس رقم 58 كان عامل إزاى وبداية القصيده كفر زى مابيقولوا

خلاص هاحكى والله عارفه انكوا زهقتوا

الحكايه من الأول إن إتصلت بينا واحده صاحبتنا وقالت على العريس ده ظروفه كالأتى شاب عنده 38 سنه ورئيس حسابات فى شركة إستيراد وتصدير ومستوى مادى كويس ومن عيله كبيره  ومتدين
يا سلام إيه كل ده المميزات دى طبعا الناس إتعودت تقول المميزات فى الأول وتسيب المصايب لبعدين وعشان كده عرفت بعدين إنه كان متجوز ومخلف ولدين والمصيبه الأكبر بقى إن الولدين معاه يعنى اللى هاتتجوزه هاتدبس فى تربيتهم.

طبعا بعضكوا هايقول وانتى ذنبك إيه تشيلى الهم ده لأ ده عريس مش مناسب خالص
 طبعا الناس اللى هاتقول كده هما نفسهم الناس اللى بينقدونى وبيقولوا لى لازم تتنازلى يا بمبونه شويه ده العمر بيجرى يا حبيبتى
هاقولكوا إذا كان كده مااااااااااااشى
أدينى بتنازل ورضيت بإنى أقعد معاه يمكن يطلع هو ده 
وجه اليوم الموعود وتوجهت إلى النادى بصحبة أختى الكبيره لمقابلة البيه وعمل دراسة حاله.
شكلا :مووز بالنسبه لبنات كتيره لكن مقبول بالنسبه لى على إعتبار إنى مش بفضل أوى الشعر البنى والبياض والعيون الخضرا على كل حال دى شكليات فارغه.
مضمونا:بيعرف يقول كلمتين على بعض مش زى الدهولات اللى سبقوه.
وكانت القعده كويسه جدا وانا بقى اتربيت واتعلمت انى مابقاش قاعده زى الطوبه وفى نفس الوقت ارد ردود دبلوماسيه ماتتخادشى عليا وكلوه كان تمام لحد ما اتقالت الجمله اللى قصمت ظهر البعير واللى بينت البيه رقم58 بيفكر إزاى
 ورأيه فى شغل المرأه إنه حرام وإن أحسن لها تقعد فى البيت تربى الولاد وده طبعا يديكوا إنطباع هايل عنه وعن أفكاره و عن سبب رغبته فى الجواز يعنى البيه عايز يتجوز بيبى سيتر بس عشان الولاد
أنا شخصيا مش ضد إنى أربى الولاد و أتقى الله فيهم وأكون حنينه عليهم أكتر من مامتهم اللى رمتهم إنما أكون زوجه أولا لرجل يحترمنى ويحترم رغباتى وعلى الأقل يحسسنى إنى مش مجرد بيبى سيتر للولاد وإنى فى الأول زوجه ليه ومن حقى أمارس كل اللى الحاجات اللى بحبها من شغل ودراسه وإنى هاساهم فى تربية الولاد لكن من حقى تكون لى إهتماماتى الخاصه , بصراحه اللى زيه المفروض يسكت خالص ومايشترطشى عليا المفروض يحمد ربنا إنى رضيت بظروفه ورضيت أقعد معاه
بجد مش عارفه الرجل بيفكر إزاى يعنى الرجل اللى عنده40 سنه بيبقى مشترط برضه إنه يتجوز بنت فى العشرينات والوحش بيشترط إنه يتجوز بنت حلوه بمنتهى البجاحه يمكن من باب تحسين النسل والاخ ده اللى عنده ولدين وعايز يتجوز واحده حلوه وصغيره  ومن عيله وماتكونشى بتشتغل وكأنه مش شايف إن فى عيوب ومش مضطر يتنازل مش عارفه بجد ليه إحنا اللى مضطرين نتنازل ومش عارفه إيه الجبروت اللى فى الرجل ده
وللحديث بقيه.....

الاثنين، 6 ديسمبر، 2010

هدنه مابين عريس وعريس


هدنه مابين عريس وعريس


بصراحه ماقدرشى أنكر إنى بتنفس الصعداء كل ما إنتهى موضوع جواز مش عشان الموضوع مش بيبقى عاجبنى بس وإنما عشان ساعات بحس إن جزء منى مش عايز يتجوز ونفسى أعيش فى حريه وكلمة حريه مش بعنى بيها إنى عايزه أمشى على حل شعرى لكن إنما مايبقاش عليا قيود يعنى أكيد لما أتجوز كل حاجه هاعملها أكيد هاتبقى وفقا لمزاج البيه.

,كل مابشوف أصحابى مخنوقين إزاى بحس إنى فى نعمه يعنى لما بشوف اللى جوزها بيحدد لها تتفرج على إيه فى التلفزيون وماتتفرجشى على إيه ولما بشوف اللى جوزها مانعها تخرج مع أصحابها نهائى واللى جوزها  قفلها الأكونت الخاص بيها على الفيس بوك واللى جوزها مانعها تمارس أنشطتها الطبيعيه اللى بتحبها واللى جوزها شارط عليها تلبس عبايات أو نقاب أو إسدال أو اللى جوزها مانعها تعمل حواجبها وغيرهم كتير لما بشوف ده كله بسأل نفسى لو ربنا وعدنى بجوز من النوعيه دى هاتبقى حياتى شكلها إيه وهاستحمل الخنقه دى إزاى وأنا بطبيعتى مش بستحمل الخنقه دى ومش بحب حد يجبرنى على حاجه يبقى الحياه هاتبقى شكلها إيه

صحيح هو مش كل الرجاله كده إنما دعونا لا نغفل أنا الرجل هو الطرف الأقوى فى العلاقه يعنى مهما إدعى إنه ديموقراطى فهو فى قمة الديكتاتوريه ومهما إدعى إنه متحضر فهو فى فى قمة التخلف وعلى فكره مش بعمم بس النماذج دى موجوده عشان كده خايفه على حريتى من الجواز أصل مش شرط شريك حياتى يكون رجل متفهم ومثقف ويحتوينى ويرفع منى ويخلينى أحسن ممكن أوى يكون عقد وكلاكيعو وبيدور على واحده يطلع عقده عليها يبقى ساعتها إيه الحل بصراحه بحس إن ربنا عالم بحالى وعارف إنى فى حاجات مش ممكن أستحملها وربنا بييدى كل واحد على قد طاقته وعلى حسب اللى يقدر يستحمله.

عموما كنت فاكره إنى هأقعد كتير لحد ماستنى العريس رقم 85 أصل الأيام اللى فاتت دى كان عندى فترة كساد بس الفتره دى عموما بتعدى على كل بنت إنما الفرق بين العريس رقم 57 والعريس رقم 85 ماكنشى كبير وهاشوفه بكره إن شاء الله.
هاااااااااااااااااا يا مسهل 
,يا إما هاجى أتكلم عن الكارثه رقم 85 ويبقى طبق الأصل العلقه الأولانيه وعلى نغمه واحده ماخدوش يا بابا ماخدوش يا بابا ماخدوش يا بابا.

أو هايطلع مناسب جدا ويبقى كفى المؤمنين شر القتال  وإتمخترى يا حلوه يا زينه ومبروك عليكى عريسك الخفه ماحلاه شوال وجنبه أوفه.

أو يطلع موضوع خنييييييييييييييييييييييييييييييييييييييييييييييييق من المواضيع التقيله اللى على قلبى اللى لازم أدى فيها لنفسى فرصه تانيه.

يالا تصبحوا على خير هاضطر أأقوم أنام بقى عشان أجهز للإنترفيو بتاع بكره

السبت، 4 ديسمبر، 2010

سبحان مغير الأحوال


سبحان مغير الأحوال

حكاية العريس رقم 57  أو أخر عريس إتقدملى يعنى دى فكرتنى بأول عريس إتقدملى أو أول عريس دخل البيت  على إعتبار إن أول عريس إترفض من بره بره.

كنت زمان عامله طقم لمقابلة العرسان بس فستان حيادى مايديش إنطباع بأى حاجه عن شخصيتى وساعات كنت بلبس حسب أخلاق وحسب ماسمعت عنه قدملى عشان ماينقضنيش من أولها لكن دلوقتى بصراحه بقيت أطنش وألبس أى حاجه برتاح فيها وخلاص بصرف النظر عن رأى العر يس.

وبخصوص الميك اب زمان ودلوقتى بحط ميك اب خفيف ده ماتغيرشى وطبعا عشان مايخرجش العريس يقول إنى عامله زى عروسة المولد.

زمان كنت بصمم إن العريس ييجى لحد البيت ومش أنا اللى أروح له فى مكان عام أو ماشابه ده على إعتبار يعنى إن هو اللى ييجى لحد عندى أرننه منى لكن دلوقتى بقيت ممكن أشوف العريس فى أى مكان أفضل عندى من البيت وده طبعا مش عشان بقيت مش لاقيه زى مابعض الناس ممكن تفتكر أو خايفه فرصى فى الجواز تقل والكلام الأهبل ده لأ طبعا لكن بقيت أفضل بصراحه المقابلات تبقى بره عشان لاقيت إن العريس ساعات بيبقى دمه يلطش لكن بأضطر أكمل القعده عشان الرجل فى بيتنا ومايصحش أقوم وأسيبه لكن بقى لما أكون أناو هو بره البيت ساعتها لما أتخنق وأستأذن ماتبقاش قلة ذوق منى ولو إن بعض أصحابى كانوا بيقوموا ويسيبوا القعده لما بيلاقوا الموضوع مش جايب همه لكن طبعا أنا بنت ذوق ومش ممكن أعمل كده لكن ممكن أغلس بطرق تانيه(((((:

وكمان زمان بقى كنت بتعمد أدخل الصالون متأخره برضه برستيج لكن دلوقتى بقيت عايزه أخلص أنا لسه هاستنى؟

يعنى بصراحه مقابلات العرسان زمان مش زى دلوقتى  فى حاجات حاجات 
فعلا سبحان مغير الأحوال .

إلى اللقاء مع العريس رقم 85 ومش هاقول الكارثه رقم 58 عشان حراااام الرجل لسه ماعملشى حاجه يستاهل عليها نقول عليه كارثه