الثلاثاء، 17 يناير، 2012

العرسان وأشياء أخرى


رجاله عايزه الحرق

إكتشفت إن مش العرسان الغير مناسبين بس اللى بتضايقنى ولكن
(العرسان واشياء اخرى)
وبالمناسبه ده اللى خلانى أغير إسم المدونه من عريس النجده لمذكرات موززه عانس عشان أتبحبح فى الكلام شويه 
 مش قادره أقولكم شعورى إيه وأنا بكتب البوست ده
 وإن شاء الله هايكون له سلسله كمان
 يعنى رجاله عايزه الحرق (1) ورجاله عايزه الحرق (2) ورجاله عايزه الحرق (3)
 كده يعنى
واكيد هابقى مبسوطه عشان بكرر جملة رجاله عايزه الحرق كتير
المره دى مش هاتكلم عن عرسان خلينا ناخد راحه بعد العريس 67
ونتكلم عن نوعيات من الرجاله اللى بقابلهم فى حياتى واللى انا متأكده ان كل بنت إتأخرت فى الجواز بتقابلهم
 أصل العينه الوسخه دى بتشتغل على المتأخرات فى الزواج دايما
 وفى كتير من اصحابى فوق الثلاثين  وغير متزوجات حكولى عن إنهم بيقابلوا  النوعيه دى كتير واخر قصه هى اللى إستفزتنى أكتب البوست ده بصراحه
  طبعا مش هاعمم واقول الرجاله كلها فيها الخصله دى
لأن أكيد فى واحد أو إتنين أو تلاته بالكتير من الرجاله كويسين
 المهم النوع ده من الرجاله بيكون متجوز وماعندوش نيه إنه يتجوز ومع ذلك بيحاول يثبت البنت اللى قدامه ويجرى وراها عشان يوقعها فى غرامه
 طب ليييييييييييييييييييييييييييييييييييه ؟
انا مش فاهمه
 يعنى إنت مش مكفيك المدام وعايز تعدد ؟
خلاص إتنيل اتجوز عليها طالما مش ماليه عينك
 إنما طالما إنك مش عايز تتهبب تتجوز بتلعب على المسكينه الغلبانه دى ليه ؟
 وخصوصا إن فيما يبدو الرجل بيكون حاسس إن البنت دى محتاجه لأحاسيس ومشاعر معينه لأن لسه مالهاش شريك لحياتها فا بيحس انها لقطه بالنسبه له  وصيد سهل وهاتكون ضعيفه قدامه وهاتسلم على طول
منتهى الإنتهازيه طبعا
وبعدين لما البنت غصب عنها تتخيل إن اللى بيكلمها رجل محترم
 طبعا ده لو جزمنا بموضوع الرجل ده وماكنش مجرد ذكر فى البطاقه
بتصدقه وتنجذبله يقوم الرجل يبدأ يمشى فى طريق الوطى اللى اتعود عليه من أيام ما كان شاب صغير بيثبت بنات الثانوى ويبتدى يتقل عليها ويفهمها أن مراته عنده مهمه ووولاده.....الى اخر الاسطوانه المشروخه  
طب ولما هى مهمه عندك يا لطخ كنت بتحاول تستميل البنت الغلبانه دى ليه ؟؟؟؟
 أه طبعا هانسمع جملة النداله المعهوده:
 (هو أنا ضربتها على إيديها )؟
طبعا النوع ده من الرجاله فى الأصل بيضحك على ستتين مش ست واحده اللى بيثبتها واللى متجوزها مع إنه فى قرارة نفسه بيكون متخيل هو قد إيه زوج مثالى وبيحافظ على بيته وولاده وبيتقى الله فيهم وضميره ممكن يكون مرتاح طب بالنسبه للأخت اللى إنت بتخدعها دى 
إيه أخبار ضميرك من ناحيتها ؟
مرتاح برضه ؟
ولا ده مش شغلك بقى هاتقرف نفسك بيها ليه ؟
كلبه وراحت مش بنى أدمه اصلها عندها مشاعر وأحاسيس إنت إستغلتها 
ثم إن ربنا هايحاسبك بس على مراتك وولادك لكن مش على أى حد تانى أذيته ده طبعا لو كنت تعرف ربنا من أساسه 
  بس للأسف عايزه أقولك إنت لا زوج مثالى ولا نيله ولا بتتقى الله لا فى مراتك المتأرطسه اللى قاعده فى البيت مش حاسه بحاجه ولا بتتقى الله فى البنت اللى انت خلتها تحبك  يعنى مثلا لو فرضنا إن تتطورت العلاقه بينك وبين البنت دى وقابلتها وجت مراتك إتصلت بيك وإنت معاها 
هاتقول لمراتك إنها معاك ؟ 
مش هاتقدر طبعا لأنك جبان ,طب وده يرضى ربنا ؟
طب إنت كده بتتقى الله فيها ؟ 
طب إنت كده زوج مثالى؟
طبعا هاتقول أه
عارف ليه؟
لأن مقاييس المثاليه عندك بتشكلها على أهوائك أنت مع إن لو جبنا مراتك وقلنا لها إنك على علاقه بواحده تانيه تفتكر إنها هاتكون مبسوطه ولا هاتهد الدنيا فوق دماغ اللى خلفوك ؟ يبقى إنت زوج مثالى إزاى ؟؟
ده غير إنك عشان تفهم البنت التانيه إنك مش مرتاح فى حياتك الزوجيه لأن ده طبعا منطقى ولزوم التثبيت يبقى هاتضطر أسفا إنك تبرز عيوب مراتك قدام البنت التانيه وتبين قد إيه هى مش مهتمه بيك وقد إيه مهمله فى بيتها وفى نفسها وإنها مش بتلبس ومش بتعمل يبقى إنت كده اللى بتخرج أسرار بيتك بره مع إنك ممكن تكون طول النهار بتضايق من مراتك إنها أهلها عارفين كل حاجه عندك فى البيت بس طبعا دى حاجه ودى حاجه حلال ليك وحرام عليها  مش كده ؟
هارجع وأسألك تانى إنت كده صح ؟
أنت كده زوج مثالى ؟
إنت كده بتتقى الله فى بيتك ؟
على فكره يا جماعه بالمناسبه مافيش رجل بيتخطف حكاية إن البنت خطفت الرجل من مراته دى إشتغاله كبيره أوىىىىىىىىىىىىىىىىىىىىىىىىىىىىىىىىىىىىى يعنى يا إما موروثات ثقافيه يا إما السينما المصريه والحب الضائع هما اللى بوظوا دماغنا الرجل هو اللى بيخطف مش بيتخطف ولو حصل وإتخطف بيتخطف  بمزاجه وكامل إرادته لأن هو الطرف الأقوى فى أى علاقه وبالتالى هو اللى بياخد القرارت دايما 
بس هو دايما بيحاول يلاقى شماعه يعلق عليها غلطاته وتفاهاته ونزواته وشهواته وفى الغالب بتكون الست هى الشماعه دى

الاثنين، 16 يناير، 2012

الكارثه رقم 67



أول عريس فى السنه الجديده بس بصراحه ماشفتوش وهأقولكم ليه؟
 نبتدى نحكى حكايته
  أول ما قريبتى كلمتنى فى التليفون وقالت لى إنها جايبالى عريس إكتئبت
 أصل سيرة العرسان بقت تجيبلى إكتئاب بعيد عنكوا وبالرغم من إنى أخر مره دعيت ربنا
يا إما أتجوز يا إما مايبعتليش عرسان تانى لكن برضه جالى العريس ده
 ده اكيد ابتلاء
عموما انا ماكنتش مهيئه اطلاقا بعد العريسين اللى فاتوا انى اشوف حد تانى حاليا ماهو مش كله ضرب ضرب كده عايزه اخد هدنه شويه المهم عرفت مواصفاته بس وطلبت منها انها ترحل الميعاد اللى هاشوفه فيه كمان اسبوعين عموما هى مواصفاته كالأتى:
( شاب يبلغ من العمر 37 عاما بيعمل محاسب فى النيابه والى جانب ذلك لديه تجاره يديرها, والده متوفى ووالدته كانت تعمل موجهه فى التربيه والتعليم ولكنها بالمعاش الأن وهو وحيد والدته )
بالرغم من انى لوهله توجست خيفه من( شىء معين) فى المواصفات دى  لكنى طنشت مؤقتا لحد ماشوف اخرتها المهم اقلت لقريبتى انى هاحدد لها ميعاد اشوف فيه البيه بعد اسبوعين ولكن قريبتى كلمتنى بعد يومين وقالت لى على المعلومه اللوذعيه اللى انا كنت خايفه منها أو بالأحرى عامله حسابها
هى ايييييييييييييه بقى ؟
إن مامته هاتعيش معانا بعد الجواز طبعا  
بالمناسبه الشىء بالشىء يذكر انا اتقدملى عريس بالظروف دى قبل كده  3 مرات وبرضه رفضته وكل مره كان بيتقدملى عن طريق حد شكل من اصحابى ومعارفى
كمان افتكر كويس انى فى واحد كان ناشر مشكلته فى  الجرنال وبيقول انه عايز يتجوز بس مشكلته ان ماحدش بيرضى بيه بسبب ان مامته هاتكون قاعده معاه
 هى مشكله فعلا ولكن المشكله المره دى مش فى العريس ولكن فى العروسه يعنى لو جينا طبقنا ده على تجربتى هنلاقى المشكله فيا انا مش فيه
اكيد هوعلى راسى انه بار بمامته كده وده يدل على انه رجل ومحترم فى زمن انعدمت فيه الرجوله وعلى عينى وعلى راس اللى خلفونى ماقلتش حاجه لكن انا اللى غير مناسبه لانى استحمل الظروف دى لانى مش شخصيه حموله ولا بنت بلد جدعه وتخدم
 اه مستغربين ليه انى بقول على نفسى كده ؟
رحم الله امروء  قد عرف قدر نفسه انا ماقدرشى اخدم ست كبيره فى السن
 حد هايقولى طب ماهى تقدر تخدم نفسها هاقوله طب وبعد كده لما تكبر فى السن وتبقى محتاجه رعايه زياده ؟
 واحده قالت لى قبل كده مين قال انك هاتخدميها ابنها اللى هايعمل كل حاجه ليها لانه هايكون ممتن ليكى انك على الاقل رضيتى بظروفه مش هايتعبك كمان فى خدمتها
  تخيلوا ههههههههههههههههههه
 طب بالذمه ده كلام ؟
طب اشهدوا يا رجاله ويا ستات ياللى بتقروا
هو فى رجل بيمتن ؟؟
 ههههههههههههه طب بلاش يمتن
هو فى رجل بيساعد ؟
 طبعا مش هايحصل
وانا اللى هاتدبس
طب حد ييجى يقولى : وايه يعنى ماترضى  على الاقل هاتخدى ثواب خدمتها
هارد عليكوا بسؤال معلشى استحملونى
هو انتوا لما جيتوا تتجوزوا كنتم عايزين تتجوزوا عشان تاخدوا ثواب ولا عشان تعيشوا سعداء و (بحريه ) ؟
ده غير انى من حقى اعيش فى حريه والبس اللى انا عايزاه  من غير مايكون فى رقيب عليا
 يبقى ارفض لانى انا اللى لا اصلح له ؟
ولا اقبل واشرط عليه انه يودى مامته دار مسنين؟
او اقبل واقصر فى خدمتها او ازهق و اخد ذنوب بدل ماخد ثواب؟

الجمعة، 13 يناير، 2012

نتيجة الإستفتاء

فى الحقيقه أنا كان فى دماغى كارثه من الكوارث من غير ما أعمل إستفتاء وكنت متخيله إن الكل هايعرفها ويصوت ليها على طول
 لكن بما إن ماحدش ركز معاها
 يبقى خلاص مضطره انى افصح عنها
 فى الحقيقه اسوأ عريس لعام 2011 وأعتقد الأعوام القادمه كمان هو :

الاثنين، 2 يناير، 2012

إستفتاء

زى ما عملت إستفتاء فى 2009 على أسوأ عريس هاعمل إستفتاء على أسوأ عريس برضه لعام 2011 
وإن شاء الله لو ربنا مافكش عقدتى هاعمل الإستفتاء ده كل سنه
يعنى هايكون فى 2012, و 2013 بعيد ...... بعيد  
يا لهوى هو أنا هاقعد لحد 2013  من غير جواز؟؟
:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(:(
مااااااعلينا
حد هاييجى يسألنى طب ليه مش هاتعملى إستفتاء على أفضل عريس هاقولكم ببساطه لإن لو كان فى أفضل عريس كان زمانى إتجوزته وقفلت أم المدونه دى :)

المهم بما إننا هانعمل إستفتاء بقى على 2011 يبقى أكيد هانبدأ من أول يناير 
يبقى هانبدأ بالعريس رقم 58 
عموما أنا هاسيب اللى عنده وقت من القراء يتابع ويشوف مين هو أسوأ عريس لعام 2011 وبعدين هاقول أنا البوست الجاى مين هو أسوأ عريس  .






تعليق على تعليق

(لو مستنية حد يحتويكي ويطبطب عليكي
تبقي مستنية السراب
حتي لو عمل كده في الاول
مش هيستمر
احنا في زمن لابقا حد يحتوي ولا يطبطب
دوري علي الانسان المعتدل الطيب الراااااااااجل
المتدين في غير تشدد)

ده تعليق مدام شمس النهار على البوست اللى فات وده فى الحقيقه مسأله تانيه عايزه أناقشها وعشان كده كتبت البوست ده 
فى الحقيقه الكلام ده والمواصفات دى صح جدا بس لو بختار بعقل فقط 
إنما الجواز عمره ماكان إختيار عقل بس 
الجواز لازم يكون إختيار عقل وقلب مع بعض 
ومش عايزه أسمع بقى الجمل المعتاده
1- خدى اللى يحبك وماتخديش اللى بتحبيه
2- الحب ييجى بعد الجواز 
مع انى ماجبتش سيرة حب على الإطلاق أنا بس جبت سيرة القلب ومش معنى كده إن القلب حب وبس
لأ القلب ممكن يكون ألفه
وممكن يكون قبول 
وممكن يكون تعود 
وممكن يكون راحه نفسيه  
وممكن يكون الحاجه دى اللى ملهاش إسم ومش بترضى تطلع على هيئة ألفاظ اللى لما غلبوا فيها سموها( chemistry) 
حتى دى كمان مش من حقى ؟؟
راحتى النفسيه مش من حقى ؟؟ 
الحد( الأدنى) للقبول مش من حقى ؟ 
إنى أحترم الرجل اللى قدامى مش من حقى ؟؟
لو مش من حقى يبقى يا مرحب بالعنوسه ألف مره .



الأحد، 1 يناير، 2012

فضفضه من القلب مباشرة


طبعا ماكتبتش عن العريس ال66 لأنى زهقت وطهقت من كتر الكلام وحتى ان الناس اللى بتقرأ الكلام نفسها زهقت منى وبتقول 
ايه البت دى هى فاكره نفسها إيه ؟
ماحدش عاجبها ؟ 
نجيبلها يعنى واحد من زحل ولا المريخ ؟ 
عموما انا مش هارد عليكم:(
بس عايزاكم تسألوا نفسكم سؤال واحد 
,لو العريس كويس وعدل هارفضه ليه ؟ 
وهاتريق عليه ليه ؟
غاويه اطلع القطط الفطسانه فى ولاد الناس ؟
ولا مش عايزه اتجوز ؟
والله عايزه اتجوز 
بس حد يملى عينى وقلبى مش حد سطحى وتافه او على طول فى صمت رهيب زى الأخ ال66 ؟ 
عايزه حد مامشيش معاه فى الشارع وانا مكسوفه منه او من شكله او من مظهره ,واحد ماعرفهوش بحد وانا حاطه ايدى على قلبى لاحسن يكسفنى بتافهته وعدم لباقته ,
عايزه واحد يحتوينى ويهتم بيا ويطبطب عليا
انا كده بتأمر ؟ 
أنا كده طلباتى كتير ؟ 
على فكره نسيت أقول لكم كل سنه وأنتم طيبين ويارب السنه الجايه إن شاء الله تشوفونى فى بيت العدل بكسر ال ع