العريس (63) دخل على العريس (64)

صدفه غريبه حصلت لى مره واحده قبل كده شفت برضه عريس وانا كنت داخله على قراية فاتحه وللأسف أعجبت بيه جدا وإرتحت له

أه والله إرتحتله  

بس للأسف كنت داخله على قراية فاتحه وصعب عليا الدهولل اللى كنت هاتخطب له وقلت خلاص الخيره فيما اختاره الله وإضطريت أختار الدهولل إلى إتخطبتله وادى النتيجه بس يالا الحمد لله مكتوبالى

المهم انى جالى عريس تانى:)

وهاشوفه يوم الخميس

ايون

وانا لسه بكلم العريس رقم 63 فى التليفون 

ايون 

وهو كده بقى عادى 

الغايه تبرر الوسيله ماهو عشان اتجوز وانا مبسوطه ومقتنعه لازم اعمل كده وانا عموما ماضرتشى حد ولا ايه ؟؟

ها ؟؟

ولا ايه ؟؟

فى حاجه ؟؟

حد ليه شوق فى كلمه؟؟

حاولى تحبيه

عنوان البوست ده هو نفس الجمله اللى قالتهالى المدام اللى جابت لى العريس رقم 63 بعد ما حن عليا وكلمنى فى التليفون

بجد مش فاهمه يعنى ايه الواحد يحاول يحب ؟هو الواحد هايدوس على الزرار يقوم يحب؟

هو الحب بييجى بالمحاوله ؟

دى تبقى محاوله صعبه اوى ده كأنى بزوق فى حيطه

الغريبه انى حاسه انى مش حاسه بمعنى ان كل مره بكون يا اما قرفانه او عايزه ارجع او انى متقبله بس عندى شوية تحفزات لكن المره دى لا ده ولا ده

 لا مبالاه غريبه

 و اعتقد انها عندى من العريس رقم 62 لو تلاحظوا, ومكمله معايا لحد دلوقتى ولا يمكن يكون ده يأس او شيخوخه مبكره؟ هههههههههه بجد مش عارفه ,كلمنى مرتين  او تلاته وبقفل معاه وكأن المكالمه لم تكن والغريبه انى مش بفكر فى اى حاجه قالها فى المكالمه ولو ان اللى لفت نظرى انه حابب يستميلنى والحكايه دى بتغيظنى مووووووووووووووووووووووووت

 انه يتصنع او يتكلف عكس طبيعته عشان يعلقنى بيه وانا طبعا مش تلميذه فى ثانوى عشان يدخل عليا الكلام ده مانا مدوباهم 62 قبيه ,مش مقتنعه كمان ان فى واحد عنده اربعين سنه ومخلف بنتين طولى وبيكلم واحده عندها 33 سنه لسه متخيل انى هانبهر لما يقولى انه هايلف لى تحت البيت بالعربيه وقال عايزنى اقف عشان اشاور له لالالالالا مش انا خالص

اصل هى مش قصة حب بقالها 10 سنين يعنى وكمان مش حاسه كلامه نهائى

بضايق اوى من الرجل اللى يغازل البنت او يحاول يستميلها بكلام عشان بس ياخد بونط عندها مش عشان هو حاسس الكلام ده او طالع من قلبه

شايفاكوا ياللى قاعدين قدامى بتمصمصوا فى شفايفكم وتقولوا ايه( ياختى دلع البنات ده طالع من قلبه ايه وبتاع ايه وليه مايكونشى طالع من قلبه بجد)

 هاقولكم لأن الكلام اللى طالع من القلب بيدخل القلب وانا سمعت وماحستشى مع انى سايبه نفسى خالص ولاغيه عقلى وفاتحه قلبى

عموما كفايه كلام على احاسيسى وخلينا فى المهم هو دلوقتى طالب يقابلنى لوحدنا وانا لسه مش عارفه بالرغم من ان المقابله دى هاتفيدنى كتير وهاعرف منها حاجات كتير لكن فى نفس الوقت خايفه يطلع دهوول وينط الرجل الشرقى اللى جواه ويقول

 سمحت لنفسها تقابلنى عليها اللعنه

يتبع....

العريس رقم 63

قابلته يوم الثلاثاء اللى فات هو رجل فى الأربعين من عمره طبعا هاتقولوا لى اتأخر ليه فى الجواز هاقولكم ماهو ماتأخرشى :)))

طبعا هو اتجوز وطلق وعنده بنت طولى فى ثانويه عامه وانا بصراحه كنت اعرفه من قبل كده وعارفه مراته وعارفه عيلته كلها فى صلة قرابه بينا من بعيد وده اللى شجعنى اخوض التجربه رغم احساسى انها هاتفشل عشان عندى فكره جيده عن طباع مراته او طليقته  يعنى.

المهم شكله اتغير جدا عن اخر مره شفته فيها فى حاجه زادت عليه وحاجه نقصت منه اللى نقص منه شعره واللى زاد عليه كرشه دا غير انه عملاق ومش عارفه ازاى مالاحظتش الحكايه دى قبل كده ماعلينا هاقول دى شكليات فارغه هو برضه مقبول شكلا يعنى ملون مش ابيض واسود وبالرغم من ان مش ده ذوقى فى الرجاله بس قلت يا بت طنشى خالص وخلينا نشوف اخرتها 

القعده كانت لطيفه جدا وهو حد لبق وكلامه مرتب وبالرغم من كده مش فيه اى حاجه من اللى اتمناها فى فارس احلامى ماعلينا المهم هو طلب رقم تليفونى عشان نتكلم مع بعض شويه وده ريحنى نوعا ما انه مش مستعجل بقى زى الباقى وهايقرفنى وحصلت بينا اول مكالمه امبارح بس ماتكلمشى النهارده تفتكروا طفش وريحنى من مرارة الاختيار ؟؟؟؟

تفتكروا ؟؟؟ هانعرف 

يتبع.....

العريس رقم 62

قبل مابدأ اتكلم عن العريس رقم 62 واخر انترفيو عملته لازم الاول انوه عن حاجتين اولا :ان الداهيه رقم 61 ظهر اخيرا وطلع مشكلته ان مامته كانت فى المستشفى وهو قال ايه محتاس بيها طبعا انا مش مصدقه الهجص ده بس عموما جوز صاحبتى الله يباركله ويكرمه قفل الموضوع بطريقه جامده جدا يمكن لو كنت انا مكانه ماكنتش عرفت اعمل كده

 لما الاستاذ بهاء المحترم (واعتذر عن لفظ بهاء طبعا ) قابله وقاله على ظروفه كانت ايه وبرر عدم اتصاله بيا طول المده دى كلها بإن مامته كانت فى المستشفى وهو كان مشغول معاها كان من المتوقع من جوز صاحبتى انه يرد عليه يقوله :

(معلشى خلاص الموضوع انتهى من عندها واعتبرت الموضوع كأنه لم يكن لأنك اتأخرت فى الاتصال ) 

زى مانا قلت له لأنى طبعا مش من المنطقى انى افضل مستنيه امه الى مالانهايه ولكن إتفاجئت ان صاحبتى بتتصل بيا تانى يوم وبتقولى ان جوزها قاله الاتى :

(عموما احسن انك ماتصلتش لأن هيا رجعت فى كلامها تانى وقالت ان مستقبل وظيفتك مش مضمون وايه اللى يجبرها تستحمل الظروف دى ؟وحتى مراتى قعدت تقنعها لكن هى رفضت تماما ) 

طبعا الاخ ده بيشتغل ظابط جيش صحيح لكن كان ناوى انه يطلع معاش السنه الجايه عشان عنده عيب خلقى قصدى طبى وهو قالى كده وانا طنشت قلت مش هاقف على الحاجات الصغيره دى واكبر دماغى لحد ماشوف اخرتها وبرضه عشان ماحدش يقول دى بتتأمر وبعد كل ده هو اللى إتأمر عليا بس بجد اهو خد فوق دماغه  وبقى شكله هو اللى عره تسلملى يا وليد يا جوز صحبتى

والحمد لله مش مضطره اتجوز عريس مش طايقاه 100%

ودى كانت نهاية الداهيه رقم 61 (صبرنى يارب)

ثانيا: اتقدملى 3 عرسان تيك اواى مابين العريس رقم 61 والعريس رقم 62 بس انا قلت بلاش اوجع دماغكم بيهم اصل واحد عنده 45 سنه وواحد 46 وواحد 48 وطبعا دول هاكون محتاجه اخد كارت ضمان ولازم اعرف صلاحيتهم هاتخلص امتى وعلى كل حال انا اللى مش بشوفه وبرفضه من بره بره مش بحسبه ولا ايه رأيكم ؟

المهم خلينا فى العريس رقم 62 طبعا مستغربين انى مش بشتم فيه اصله بصراحه من المواضيع الخفيفه على قلبى وكان بجد حد راقى جدا ومحترم بس برضه للضروره أحكام

عنده 39 سنه وبيشتغل مدرس كمبيوتر فى الكويت وعنده عربيه ومتيسر الحال ومنفصل وعنده بنتين من مراته طبعا ان اول ماشفته برضه قلت كالعاده بينى وبين نفسى ماخدوش يا بابا ماخدوش يا بابا ماخدوش يا بابا  وخصوصا انى وانا لابسه كعب هو جايلى عند كتفى بالضبط ولكن قلت معلشى يمكن لما اتكلم معاه يعجبنى ومش مشكله القصر دى شكليات فارغه (صبرنى يارب)

المهم ان احساسى ماتغيرشى وانا قاعده  معاه لكن سبحان الله لاحظت انه شخصيه صريحه جدا مش عارفه عشان هو انسان كويس ولا انا اللى ربنا بيحبنى ؟

المهم قالى ظروفه كلها من الالف للياء من غير مايكذب ولا يتجمل وطبعا اللى فهمته ان مراته ماضيه على ورقه انها فى حالة لو اتجوزت هايكون البنات من حقه وكمان وقت وصولهم لسن انتقال الحضانه هايكونوا برضه من حقه يعنى المهم انى هاتدبس فيهم فى كل الاحوال وبكده بقى قلب على العريس رقم 58 فاكرينه؟

والأدهى من كده انه ماعندوش شقه ولما بقوله طب ولما تتجوز ناوى تقيم فين قالى فى اى فندق والالذ انه مستعجل جدا عشان مسافر الكويت بعد العيد ويتمنى اننا نتجوز قبل مايسافر شفتوا الحلاوه مش عارفه جاب العشم ده منين اذا كنت انا محتاجه وقت عشان ابلعه هو شخصيا الاول وبعدين محتاجه وقت عشان ابلع حكاية بناته اللى هاربيهم دول ومحتاجه وقت عشان اقنع اهلى بحكاية الفندق دى دا اذا اقتنعت انا اصلا

كل ده وهو عايز كل حاجه بسرعه وبيقول ياريت نتجوز قبل مايسافر, فكر هو عايز ايه برضه مش انا عايزه ايه زيه زى كل الرجاله لكن ده مايمنعشى انه رجل محترم لأنه كان صريح من أول قعده

المهم روحت البيت والغريب انى مافكرتش فيه نهائى ولا فى كلامه ولا حاولت اخد قرار لكن برضه صليت استخاره ومش عارفه ليه مافكرتش بالرغم من انه كان مستنى رد منى وكأنى قرفت من التفكير او قرفت من العرسان مش عارفه دا انا حتى ماقلتش اى حاجه قالها ليا ليهم فى البيت وكل اللى كنت مركزه عليه انه شخصيه غير مقبوله بالنسبه لى ومعقوله هاتجوزه وهو مش مالى عينى ؟ وبدأت احمل الهم  وكأنى كنت بفكر أوافق من كتر اليأس ومر يوم والتانى واتصل الوسيط يسألهم عن رأى ولما سألونى لقيت نفسى بقول لهم هو مستعجل وانا عايزه وقت عشان ابلعه واقتنع بيه اذا كان عنده استعداد اننا نتكلم ونعمل قاعده تانيه وتالته لقيتهم بيقولوا لى:( انتى هاتعملى قاعده تانيه وتالته وبرضه مش هاوافق يبقى ملهاش لازمه انك تعطليه انه يشوف عروسه تانيه) وكمان لما عرفوا حكاية بناته وانه ماعندوش شقه هما اللى رفضوا والموضوع خلص فى لمح البصر وكمان ماتحملتش انا مسؤليته عشان مارجعشى اندم

تنفست ساعتها الصعداء بعد ماكنت حامله الهم  لأنى برضه  بقيت مش مضطره أتجوز واحد مش مالى عنيا ولا قلبى ولا حتى اندم عليه

والله ربنا كبير

 لكن كل اللى قلته(عموما انتم كده متحملين مسئولية العريس رقم 62) وكأنى بقولها لنفسى وبعفى نفسى من المسئوليه

وكفى المؤمنين شر القتال والى اللقاء مع العريس رقم 63 يارب تظبط المره دى فتكوا بعافيه:))) 

نهاية الداهيه رقم 61

لما انت مش هاتتصل بتاخد رقمى ليه يا متخلف؟؟

دى الجمله اللى قلتها بعد مانتهى موضوع العريس رقم 61 بلاش  ادخل فى تفاصيل ملهاش لازمه وخلينى اجيب من الأخر لأن بصراحه ماحصلتش حاجه تضايقنى زى كل مره فى ملابسات الموضوع يعنى صاحبتى اللى بلتنى بالعريس هى وجوزها كانوا فى منتهى الادب والرقى ماحدش قالى الكلام السم اياه ده اللى بيعفرتنى ويخلينى قاعده فى الانترفيو مش على بعضى ولا اى حاجه وده طبعا لان صاحبتى دى بصرف النظر عن انها محترمه فهى عارفانى كويس ودايما بحكيلها على مواضيعى واللى بيضايقنى منها وتصرفات الناس اللى بتجبلى العرسان عشان كده هى قالت اكيد فى نفسها مافيش داعى تخسرنى عشان جوازه 

المهم  نتكلم عنه شويه هو ظابط مهندس يبلغ من العمر 40 عاما وخطب مرتين قبل كده وفك خطوبته لأسباب غير معروفه شكله معقول شبه جون ترافولتا وعيونه ملونين ولبسه معقول صحيح هو ساعات بيبقى بلدى اوى يا حسين فى طريقته فى الكلام وكمان طريقة قعدته مش شيك بس انا قلت يا واد طنش خالص دى شكليات فارغه وخلاص بأه مش هانقف على دى بأه فى حاجات اهم الواحد يهتم بيها وعشان ماحدش يقول انى بتأمر والكلام الأهبل دا اللى انتوا عارفينه 

سابونا نتكلم لوحدنا شويه وطبعا كان مستغرب أوى انى بحفظ قراءن عشان مش باين عليا

  قلت لنفسى:اااااااااااااه ابتدت التفاهه اهيه

وكأنى كنت رايحه اشوفه وانا لابسه بدلة رقص او مثلا كأن اللى بيحفظ قرأن ده لازم يكون بلحيه او نقاب لا حول ولا قوة الا بالله

المهم انا والله كنت برد بذوق ودبلوماسيه على غير العاده وفهمته ان الواحد المفروض مايخدش بالمظاهر وبعدين تجاذبنا اطراف الحديث فى مواضيع عامه وبعدين استأذنت عشان الوقت كان إتأخر روحت البيت صليت استخاره وبعدين صحبتى كلمتنى وقالت لى إنه  قال لجوزها انى جميله ولذيذه وشكلى بنت ناس  بس هو محتاج رقم التليفون عشان يكلمنى لأن الانترفيو ماكنشى كفايه عشان يحدد وانه اتحايل على جوزها لأن جوزها ماكنشى راضى انه يديله الرقم وقاله انى احتمال مارضاش وده من باب إنه يعززنى يعنى

وكأنه هايعمللى بحث حاله وحياة امه

ومع ذلك قلت يا واد طنش خالص ورضيت انها تديله الرقم وعليها من يوم الجمعه اللى بعد المقابله لحد دلوقتى لا حس ولا خبر :))

ده معناه ايييييييييييييييييييييه ؟؟

عموما مش هاشغل دماغى بواحد تافه زى ده على كل حال انا بصيت لنص الكبايه المليان وفرحت انى مش مضطره اتجوز واحد بلدى زى ده

ودى كانت نهاية العريس رقم 61 والى اللقاء مع العريس رقم 62:) 

ملحوظه :العريس ده حاجه كويسه فى (cv) بتاعتى عشان يثبت انى مش بتأمر ولا بطلع القطط الفطسانه ولا حاجه وهو اللى مش لوحده من غير ماقرب له 

الكارثه رقم (60)

طبعا انا مش متعوده دايما انى اسمى العريس كارثه الا لما يبقى كارثه بجد

ليييييييييييه بقى هاقولكم حاااااااااااااااااااااااااالا.

شاب فى الثلاثينات  اسمه مازن معاه ماجستير مش عارفه في ايه كده المهم مقبول الشكل لسه جاى من استراليا طازه وبيدور على عروسه(وش واحده مكسوفه) للأسف طلع من نصيب أختكم بمبونه .

اتوسطت احدى زميلاتى فى العمل من منطلق انها مستخسره جمالى وثقافتى و......و....الى اخر النغمه اللى انتوا عارفينها وانا حافظاها ومن منطلق طبعا انها عايزه توفق راسين فى الحلال المهم بلتنى قصدى جابته ليا فى الشغل برضه 

ملحوظه:الست دى برضه هى اللى جبتلى العريس رقم59

المهم كان يوم ماطلعتلوش شمس انا كان مودى وحش قابلها بيوم وكنت نايمه معيطه وحالتى زفت اول ماشفته فضلت قاعده ساكته وبرد على اى حد يكلمنى لكن مش ببص له ولا بوجهله كلام وهو كمان ولا بصلى ولا مره ولا وجهلى كلام لحد ماخلصت القعده على خير ومشى وانا قلت فى قرارة نفسى الحمد لله شكله ماكنشى طايقنى وده فى نظرى احسن بدل ماتكلف عناء انى احتار انى اقول اه او لأ تبقى جت من عنده وكفى المؤمنين شر القتال .

انما الكارثه انى الاقى تانى يوم زميلتى جايه تقول ان البيه بيقول ان ماما عايزه تجوزه واحده تانيه وحتى انها قالت له التانيه بتشتغل فى بنك ومتعينه لكن أنا بالعقد فى مدرسه 

يا روح مااااماااا ولما انت ماما اللى بتختار لك تتجوز مين وانت ابن ماما كنت جاى ترمى بلاك عليا ليه وتقرفنى اكتر مانا مأروفه 

لما انت ماعندكشى شخصيه عامل فيها راجل ليه وبتدور لنفسك على عروسه يا نانوس عين ماما

ودى كانت نهاية الكارثه رقم 60 

ملحوظه :على فكره عارفين اللى ضايقنى فى الموضوع ده ايه ؟؟؟؟؟؟؟

 انى كنت فاكره ان العريس رقم 60 هايكون احسن من كده وهايطلع هو ده 

يالا اهوا خد الشر وراح ولا هانرفز نفسى ولا اضايق.
الى اللقاء مع العريس رقم 61 يوم الخميس الموافق30/6/2011فى تمام الساعه السابعه ونصف مساءا بتوقيت القاهره

هو أخر عريس كان رقم كام؟ أه 58:)

يبقى ده بقى العريس رقم 59 مش هاضيع وقت فيه أصله برضه كان زى النسمه وماحستشى بيه لدرجة انى بكتب البوست على المدونه عدل من غير ماكتبه بره الأول وبعدين أحطه هنا أصلى هأقول أيه يعنى جديد مانتوا عارفين تعددت الأسباب والعرسان هما هما

المهم روحت شغلى زى كل يوم ولما خرجت من مكتبى عشان اجيب حاجه ورجعت تانى لقيت حضرته مشرف ,بصراحه كانوا اتنين واحد موزز والتانى فوزز ههههههههههه قصدى مش حلو بس باللغه الحديثه المتطوره الخاصه بيا المهم قعدت على المكتب وتنحت شويه كده وأول ماعرفونى بيه عرفت على طول انه عريس ومش جاى فى شغل ماهو خلاص بقى بقيت خبره أومئت برأسى إيمائه خفيفه وإبتسمت إبتسامه بارده ه ه ه ه ه ه وسكتت وروحت قايمه بعد التعارف بتلات قايق بالظبط وخرجت بره ولما رجعت كان مشى حمدت ربنا وإستهبلت لحد ماجت زميلتى تكلمنى وأول ما نادتنى بره فهمت طبعا وعلى قد ماكنت متغاظه منها ومن مجايبها حمدت ربنا انها برضه مش قالتلى عشان مبقاش متوتره وطبعا على نغمه واحده ماخدوش يا بابا ماخدوش يابابا ماخدوش يا بابا

الى اللقاء مع العريس رقم60

15خطوة تؤهلك للقب "عانس"

15 خطوه تؤهلك للقب عانس