الأربعاء، 2 أكتوبر، 2013

الكارثه رقم 78



ولا اسرع من كده ولا فى الاحلام
 الموضوع باختصار شديد انتهى بسرعة البرق بعد ماكنت حامله همه 
نبتدى من الاول بقى ومش هطول عشان خلقى ابتدى يضيق من الحديث عن الكوارث وبدونهم  كالعاده مش اكتر
 المهم هاتفتنى احدى صديقات اختى وقالت لنا العريس رقم 78 يبلغ من العمر 42 عاما كان معهد خدمه اجتماعيه واشتغل اخصائى اجتماعى فتره بس اخد اجازه او ساب الشغل مش عارفه وسافر امريكا يشتغل هناك والمفروض انه ماسك محطة بنزين هناك
 وبغض النظر ان انى بتضايق اوى من الناس اللى بيجولى من بره لانى مش هبقى عارفه عنهم حاجه نهائى ولا عارفه متجوزين هناك او لأ ولا عارفه بيشربوا خمره ولا لأ ولا عارفه بتوع نسوان او لأ 
لكن مش هى دى المشكله 
وبغض النظر برضه عن انه انتخب مرسى مرتين وانا اللى ينتخب مرسى مرتين بشك دايما فى قدراته العقليه 
بس برضه مش هى دى المشكله 
وبغض النظر عن انى لما قعدت معاه محستش براحه نهائى 
لكن مش هى دى المشكله
 وبغض النظر عن انى لسه منزلتش باحلامى لمستوى انى اتجوز واحد بيشتغل فى محطة بنزين
 لكن برضه مش هى دى المشكله
 المشكله ان البيه بيتعامل بتناكه غير عاديه وكأنه احمد عز او عمرو دياب !!!!
 وبيتكلم على البلاد اللى راحها وزارها بمنتهى الألاطه وبالرغم اننا مقعدناش مع بعض كتير عشان مرارتى مبقتش تستحمل واضطريت انى اكح عشان اختى تستأذن من الجلسه الغبره دى من غير انا ماتحرج (على حسب مااتفقت معاها)
الا انى روحت هاديه جدا ومسالمه مش عارفه ليه وصليت استخاره ليلا قبل ماانام ونمت فى هدوء من غير مااقول حاجه وانا مسلمه امرى لله عدى يوم واتنين وتلاته واختى ماردتش عليا قلت بركه يا جامع تلاقيها جت من عنده بعد مااتخنق منى بعد نقاشنا السياسى وعرف انى فلول وانتخبت شفيق :)
لكن المفاجأه العجيبه انه جوز صديقة اختى نهى الموضوع من نفسه على اعتبار انى مردتش عليه وفهم من نفسه انى رافضه بالرغم ان احنا كمان كنا مستنيين رده هو الاول قلت الحمد لله جت من عند ربنا ومبقتش مضطره انى افكر واكتئب واتحير 
والى اللقاء مع الكارثه 79 ويارب اكلمهم 100 :)

4 التعليقات:

P A S H A يقول...

وحشتنا كوارثك ،، أسلوبك هايل جداً على فكرة في السرد مميز وبسيط وتلقائي وفيه نبرة سخرية محببة - مش مجاملة والله العظيم - ولغتك العربية جيدة ليه ما بتحاوليش تستغلي المدونة في موضوعات تانية إلى جانب الكوارث ؟؟
كتابة قصص أو خواطر إن شالله حتى وصفات طبيخ !
الكتابة الخفيفة الممتعة بقت نادرة وسط هذا الكم من الرخامة
آسف للإطالة وحمداً لله على السلامة وربنا ييسر لك الخير إن شاء الله
خالص احترامي

شمس النهار يقول...

شوفي الرجالة اللي مسافرين بره ان شاء الله في بلاد ادغال افريقيا بيبقا جاي وفاهم انه عريس لقطة لا يقاااااوم :)
والنصيب لسه ماجاش
ربنا يكرمك بعريس يريح قلبك ويهنيكي

مذكرات موززه عانس يقول...

سعادة الباشا :
انا فعلا عندى مدونه تانيه بس بشخصيتى الحقيقيه بس حابه يكونوا الاتنين منفصلين عن بعض عشان هنا بقول حاجات شخصيه ومش عايزه حد يناقشنى فيها بره المدونه
فهمتنى ؟ :)



شموسه:
لحد امتى هتفضلى تقولى النصيب مجاش ؟ ربنا يديكى طولة العمر بقى :)

P A S H A يقول...

طيب قولي أول خمستاشر حرف من اسم المدونة التانية واحنا هانعرفها لوحدنا
D :D:

إرسال تعليق