الجمعة، ٦ أغسطس ٢٠١٠

عريس النجده

أنا بنت مصريه هاتم للأسف فى أكتوبر الجاى 32 سنه وطبعا للأسف لأن بصراحه لسه سينجل ,أنسه, غير متزوجه.

أنا واحده من ملايين البنات اللى إتاخر بيهم سن الجواز ولو إنى مش عارفه يعنى إيه إتاخر هو الجواز له سن معين ؟ماهو البنت ممكن تتجوز من أول ماتبلغ لحد ماتموت على كل حال أنا كمان بربط كتير بين السن والجواز وبحس انى إتأخرت شويه وصحيح إن المدونه دى مش هى المدونه الوحيده اللى إتكلمت عن الموضوع ده لكن أنامش لاقيه نفسى فى أى قصه منهم أصلى عرسانى كتير اوى وهى دى مشكلتى.

على فكره دى مش ميزة أنا كنت بتمنى يجيلى عريس واحد بس فى العمر واتجوزه وخلاص لكن يشاء السميع العليم إن تعدى عليا فى 13 سنه 55 كارثه قصدى 55 عريس و متخزنين عندى بمؤهلاتهم ووظايفهم وسنهم على الكمبيوتر أخدت الموضوع تسليه بدل مايجيلى إنهيار عصبى من اللى بشوفوا والله أنا مش بحط شروط جامده زى الناس ما بتتهمنى دايما ولا مضربه عن الجواز أكيد (عايزة اتجوز) مع احترامى لغاده عبد العال لكن المهم أتجوز مين؟ أى جوز والسلام مش مهم يكون مناسب, ولا عشان بعد شويه أبقى مطلقه وساعتها برده مش هاخلص من كلام الناس أى عريس بيتقدملى وباتكلم معاه وألاقيه مش مناسب ساعتها بحس إنى عايزة أقوله:
(كلام جمييييييل وكلام معقوووول ماقدرشى اقول حاجه عنه لكن خيال حبيبى المجهول مش لاقيه فيك حاجه منه )
على فكره أنا مش بدور على فارس الاحلام والعياذ بالله لا أناعديت المرحله دى من زمان وإتاكدت إن فارس الأحلام فى الأحلاااااام مش بيطير منها ويحط على أرض الواقع أنا عندى إستعداد أتنازل لكن معقوله الواحد يتنازل عن راحته النفسيه عن القبول وهى دى المشكله اللى بسببها رفضت معظم عرسانى أنا لو قلت الجواز كتير بس فين النفس مش هاكون بهزر هى المشكله فعلا مشكله نفس ولما اتنطط من هنا لبكرة ماحدش بيفهم يعنى ايه قبول ولما ارفض ألاقى اللى تقول قبول ايه وبتاع ايه ده دلع بنات هى يعنى لازم تقع فى غرامه وهو انا قلت إنى لازم أحبه  بس على الأقل اقبله يا جماعه ده هايبقى جوزى وهانام جنبه ازاى بس مش مهم اقبله ده ابسط حقوقى هوانا طالبه مليون جنيه مهر وزيهم شبكه؟

على فكرة تأخر سن الزواج مش بسبب الحاله الاقتصاديه ولا مغالاة الأهل فى طلباتهم الماديه من العرسان  زى مابنسمع طب ماهو فى بنات أهلهم على إستعداد للتنازل ماديا وبرده قاعدين من غير جواز,إنما بسبب مجموعه معقده من الأسباب صعب نقدر نحصرها  لأن كل واحد ليه  ظروفه أنا مثلا أغلب مشاكلى مع العرسان سببها القبول طبعا مش هاكدب وأقول إن ال55عريس كلهم ماكنتش طايقاهم لكن كان لكل واحد أسباب مختلفه وطبعا مش هاقدر أحكى عليهم كلهم أحسن كده اللى هايقرا المدونه دى هايجيلوه إنهيار عصبى زى اللى جالى.

لكن نفسى أحكى عن(الشيخ مجدى) تجربه  فريده أول مره أمر بيها  الشيخ مجدى ده هو الشيخ اللى ودونى ليه فى البيت لما خافوا انى أكون فيا حاجه مش طبيعيه او فى حد عامل ليا عمل على العلم إن هما ناس متعلمين ومثقفين لكن الله يكون فى عون البيت اللى فيه بنت فوق التلاتين ولسه مش متجوزه المهم طاوعتهم وقلت يمكن ماهو السحر ذكر فى القرأن 
قال إيه الدكتور مجدى ؟؟
شخص حالتى على إنها (مس عشق)حاجه غريبه أوى ولما سالته قال إن فى جنى تحت الأرض بيحبنى وهو اللى بيصورلى العرسان قرود عشان ماتتجوزيش غلبت أفهم فيه إنى مش بشوف العرسان قرود ولا حاجه واللى برفضهم فعلا مش مناسبين وخصوصا إنى طبيعيه ومش باكل مشابك الغسيل ولا بشد فى شعرى وبصلى ودايما بقرأ قرأن المهم قال إنى عشان الجنى يسيبنى لازم أعمل طقوس معينه وأحضر الجلسات وفعلا حضرت الجلسات من باب الفضول وفوجئت بالجنان الرسمى بقى لقيت كميه بنات كتيره جدا   وكلهم قاعدين يصرخوا وهو بيقرا أيات من القران وانا بابصلهم فى حاله ذهول وفضلت أتردد على الجلسات دى كل يوم جمعه لمدة 3 اسابيع وبعدين شفت بنت بتتشنج وووقعت على الأرض ويقولوا قال ايه دى ملبوسه وبعدين يقولوا ده خلاص طلع منها وبعدين البنت دى جت الاسبوع اللى بعديه كويسه جدا وهاديه وبتوزع بمبونى عشان الجنى طلع منها وساعتها بقى كنت قربت أصدق لحد مالقيت نفس البنت جايه الاسبوع اللى بعده تانى وبرده بتصوت كل ماتسمع القراءن وتتشنج طب ايه اللى حصل تانى يعنى ايه رجعلها هو يعنى الجنى ده بيتفسح حاجه غريبه اوى.
وقالوا بعد كده فى المايك إن الشيخ مجدى هايمشى فى وسط البنات وهايقول مين اللى بقت كويسه ومين محتاجه تكمل علاج وساعتها كان نفسى يقولى خلاص يا بنتى ماتجيش تانى حتى قدام أهلى عشان يصدقوا إنى مش فيا حاجه وكمان عشان أنا كمان أقدر أعيش حياتى عادى وإلا كل ماقابل عريس وألأقى نفسى مش طايقاه هايرجع يرن فى دماغى كلامه وأفتكر إنى فيا حاجه وبعدين أول الشيخ مجدى مابص فى عينى قلت فى سرى المعوذتين إعتقادا منى إن لو فى جنى فعلا هايمشى  لما  اقرأ القران  لحد مالشيخ مجدى يشوفنى وبعدين يرجع بعد كده بقى مش مهم واللى ساعدنى إنى ساعتها كنت لابسه نقاب عشان ماحدش يعرفنى وعشان كده ماعرفشى إنى بردد المعوذتين وفعلا قالى خلاص يا بنتى أعتقد إنك كده بقيتى كويسه بالرغم من إنى كان نفسى اقوله ساعتها مانا عارفه انى كويسه لكن بصراحه قلبى اتنطط من الفرحه إنى خلاص هاخلص من تعب الاعصاب ده  بس على فكرة الرجل ده علمنى حاجه مهمه إن النصب مش فلوس وبس ,الرجل ده ماكنشى بياخد ولا مليم لكن لما كان بيمشى فى وسط البنات كان بيمشى فى تباهى وتكبر غريب جدا وكأن إحساسه إن الناس دى كلها محتاجين له ومتلهفين عليه عشان يكلموه بيحقق له نوع من السعاده عموما دى كانت حكايتى مع الشيخ مجدى.
مش عارفه إذا كنت مصدقاه أو لأ بس عزائى الوحيد إنى لو مصدقتش نفسيتى هاتستريح وهاعيش فى هدوء أكتر وكمان إن اللى مصدقين هما اللى تعبانين لكن اللى مش مصدقين  هما اللى عايشين حياتهم فى هدوء ومن غير قلق وعشان كده قررت أعيش فى هدوء وأرمى كل ده ورايا  وأعمل بالحديث الشريف اللى بيقول (لو إجتمعت الإنس والجن على أن يضروك بشىء لن يضروك إلا بشىء قد كتبه الله لك)
وابتديت ادخل من جديد فى دوامه العرسان لحد ماقابلت اسوأ عريس لعام 2008 ودى كانت نتيجة الإستفتاء اللى عملوه فى البيت يعنى أنا يتحرق دمى وهما قاعدين يعملوا إستفتاءات.

ساعات بقول لنفسى ممكن الواحد يتنازل عن حاجات كتير لو كان قابل اللى قدامه بكل مافيه وبعيوبه قبل مميزاته.

بعد كده دخلت فى دوامه جديده وحكايه جديده (الست أم عمرو)  بس المرة دى بقى كان نصب رسمى فهمى نظمى أخدت فلوس فعلا ومش قادرة اقول الست دى كان بيتها قذر قد ايه ومش نضيف وقال إيه عايزانى لو حطه عينى على واحدأقولها وتجيبه بالسحر طبعا قلت لها لأ وعلى كل حال ماكنشى فى حد فى دماغى أصلا وبعدين بصيت لقيتها مسكت بطانيه وخبت راسها ووشها وإبتدى صوتها يتغير ويبقى صوت رجل وسألنى أسئله عن نفسى وبعدين طلبوا طلبات تانيه  لحد مازهقنا وبطلنا نروح لها.

يعنى بجد عدى عليا مواقف كتيرة سيئه ماكنتش متخيله إن الجواز صعب كده إيه العقول دى هوإيه اللى حصل ؟الرجاله مخها ضرب ولا البنات اللى دماغها كبرت زياده عن اللزوم ومبقاش يملى عينها أى رجل ؟

النجده يا خلق النجده ياهوووه فين هو عريس النجده العريس اللى هاينجدنى من الحشريين اللى سايبين مشاكلهم وبيدوروا على مشاكلى يحلوها وكأنهم مسمعوش مثل اللى بيته من قزاز مايحدفشى الناس بالطوب ,العريس اللى هاينجدنى من الجمله المعهوده اللى بسمعها على طول (هو مافيش حاجه جديده وعايزين نسمع اخبار حلوه عنك) وكأن الاخبار الحلوه بس إنى إتخطبت والباقى أخبار مالهاش لازمه,العريس اللى هاينجدنى من كيد الكايدين وحسد الحاسدين ولوم اللائمين ,العريس اللى هاينجدنى من العريس رقم 56 اللى ناوى ييجى يحرق دمى ويكمل علي الربع اللى فاضل فى عقلى ,العريس اللى هاينجدنى من جمله (خليكى قاعده)اللى بسمعها من واحده جابتلى عريس ورفضته لأسباب منطقيه جدا,العريس اللى هاينجدنى من إنى اتجوز واحد شايف انى متحررة لمجرد إنى قلت شرب الشيشه للستات مش قلة ادب وأساسا أنا مش بشرب شيشه او اللى شايف انى ملحده لمجرد إنى قلت إنى بفصل الدين عن الدنيا فى بعض الاحيان وتجاهل إنى من حفظة القران أو إن هو بيفتح إميلات الناس ويتعدى على خصوصياتهم ونسى (ولا تجسسوا),او اللى شايف إنى شخصيتى قويه ومش هايقدر يحكمنى وكأن الرجوله ماعدتشى عليه او اللى جه ولابس بدله صيفى بنص كم وكأنه خارج من فيلم عربى قديم ,او الى شايف إنه عايز يتجوز عشان مراته تعمله الشاى وهو بيذاكر للماجستير مع ان فى غلايات فى السوق واوفرله, العريس اللى هاينجدنى من الافراح اللى دمها تقيل وأضطر أروحها عشان مايقولوش إنى غيرانه,العريس اللى هاينجدنى من إقتحام بعض السفله من المتجوزين وغير المتجوزين لحياتى وكأنهم شايفين انى صيده سهله او سلعه رخيصه لمجرد انى مش معايا رجل, العريس الى هاينجدنى من بعض التعليقات الوقحه زى يا بنتى اتجوزى بقى ده حتى جسمك ليه عليكى حق,العريس اللى هاينجدنى من جمله مانتى بتحطى شروط صعبه وكأنى طلبه عزبه ومليون جنيه فى البنك مع العلم انهم مايعرفوش اى حاجه عنى او عن عرسانى,  كل ده وزياده شويه عدى عليا لحد مازهقت وطهقت وقربت اخد قرار بعدم الجواز نهائى ودى كانت قصتى وللحديث بقيه.....
الى اللقاء مع العريس رقم 56

ملحوظه:هذه المدونه ليست بمثابة اعلان زواج ولكنها مجرد فضفضه او ليستفيد منها الاخرون

8 التعليقات:

رشا (أم عبدالرحمن) يقول...

كلامك تحفة و يمس الروح و يمثل مشكلة بنات كتير أعرفهم و أعرف أخلاقهم و بيوتهم كويس وعارفة انهم مش لسة آنسات نشوفية دماغ أو عند أو إمارة. بس أنا بالوم عليكي ان عجزك يوصلك لمجدي ولا أم عمرو ولا حتى أم سحلول. بس عموما آديكي عرفتي ان كله تهييس وكلام فاضي. و الكلام المليان أن عريس النجدة جاااااااااااي و قريب ان شاء الله و صدقيني ممكن انتي كمان تكوني بالنسبة له عروسة النجدة لأن صدقيني رجالة كتير كويسين واقعين في حيرة و مشاكل كتيرة من التدوير على بنت الحلال اللي بجد وربنا يوفق كل واحد وواحدة لنصه اللي يسعده ويملا عليه دنيته و يكفيكي شر الكلام السم اللي الواحد بيسمعه و سامحيني لو كنت في يوم من الأيام من اللي بيسألوكي عن الأخبار الحلوة بشكل تلقائي. بس والله لو كنت يوم سألتك فده من حبي ليكي. ربنا يوفقك و يسعدك

مذكرات موززه عانس يقول...

ميرسى اوى يا روشا على كلامك الجميل واكيد الكلام دخل قلبك لانه حقيقى وانا اكيد مش زعلانه منك لانى عارفه انك بتطمنى عليا انا اقصد الناس الحشريه اللى بيسألوا لمجرد العلم بالشىء وعموما نفسى الناس تفهم ان الستر مش لازم يكون فى الجواز بس

ذكرى رحيل قلم يقول...

السلام عليكم

ان شاء الله يا قمرايا ربنا يرزقك بالخير والزوج الصالح اسفة في التخير عن الزيارة اصل في رمضان ببقي اجازة

كل سنة وانت طيبة عيد سعيد

مذكرات موززه عانس يقول...

ميرسى اوى يا ذكرى ولو إن حاسه إنك بتواسينى وأنا مش مضايقه لانى مش متجوزه انا بس مضايقه من تدخل الناس المستمر من غير مبرر

saifoo noor يقول...

wafaa awel marah aarah modwentek de we hasah be kol kelmah enty katbaha..bas akeed men been 53 3arees kan fehom we law 3arees wahed bas momken ytlaah m3akey fe noatah..be m3ana fe ketab esmoh (nesaa men el zahra regal men el mareekh)hawley teareeh molkhasoh en ma feesh had zay had aw bytba3 had 3ala tab3oh 3an tareaa hadotah khorfyah en el regala men kawkab el mareekh we el setat men el zahra we nateget ekhtlaf el kawkabeen kararoh ytabloh fe noaatet waset elly heya kawkab el ard..hoty dayman fe demaghek enk bent leky tab3ek we eslob tarbyah mo3ayan 3eshty 3aleh seneen we howa ragel gay men osrah tanyah akeed leh eslob we ta be3ah mokhtlfah tamamn laken el mohem fe noatah momken tetabloh feha??da el soaal we e3rafy dayman en el hayah mesh mashyah 3ala waterah wahda we en el lell we el ntha we el nahar lazmeen le estmrar el hayah..fe noatah tanyah habah eny atklem m3akey feha we heya en 3omr ma kanet kowet shakhseyt el maraah 3eeb bel 3akes laken tareatak dayman fe ezhar kowet shakhsytek heya elly ghalat kemet kowet el maraah ya wafaa kamena fe onosetha we moronetha we mada tafahomha lel omor kman mesh lazem atklem kteer 3ashan abaah kawyet el shakhsyah bel 3aks esm3ey aktar we fakry m3a nafsek haykoon hokmek 3ala el omor a3aal we asah .el ragel dayman byheb yhes be ehtyag el maraah le(we aasod el ehtyag el ma3nawey)eh el mmoshkelah(we bardoh mesh ay ragel el ragel elly haybaah shreek hayatek)we law basety ell omor sah hatlaay howa ely mehtag yhs el ehsas da y3ny howa elly mehtaglek adey dayman el ragel el ehsas da we edeholoh be hob sadaaeny 3omrek ma hatendamy we eftkrey dayman en kowetek fe onostek we da3fek el zahrey we en el hayah been el zogeen laysat be ma3rakah harbyah wala nedyah bel3aks de absat we ashal men keda bekteeeeer de hayah bytsharkoh feha by3mloha m3a ba3d we y3eshoha be helwaha we moraha we byhsodo semerha bardoh m3a ba3d..wared enhom ykhtlfoh..ytkhanaaoh we yrga3oh tany ytsalho ..lell we nahar lazem 3ashan el hayah testamer..we rabena ywafaaek laaenek fe3lan helwa men gowah mesh bas men barah bas tareatek heya elly ghalt fe el ta3beer 3an elly gowakey..

مذكرات موززه عانس يقول...

مبسوطه جدا من انك قريتى المدونه دى يا ريهام ومبسوطه اكتر من تعليقك لانه حسسنى انى كنت مش فاهماكى صح بعض الشىء او فكره ان شخصيتك غير كده مع اننا نعتبر متربيين مع بعض لكنى بكتشفك لاول مره بعد العمر ده كله وهو انك بتتطلعى كويس وارائك مش سطحيه لكن ليا بعض التعليق على كلامك اولا الكتاب اللى انتى اقترحتى انى اقرأه قريته فعلا اكتر من مره اما بخصوص قوة الشخصيه فانتى فاهمه الامور غلط بعض الشى انا عمرى ماكنت بتمنظر بقوة شخصيتى ابدا لانى فاهمه كويس من قبل ماقرأالكتاب ان ده بيضايق الرجاله جدا اللى بقولوا ده بيحصل لمجرد ان حد طلب راى فى حاجه فقلته بمنتهى الرقه والهدوء وده عشان مابقاش قاعد زى الطوبه لكن انتى عارفه الرجاله لو سكتى هايقولو دى زى الطوبه ولو اتكلمتى هايقولوا دى جريئه وعلى كل حال عمرى ماندمت ابدا على اى رجل ينقدنى فى النقطه دى ابدا لان كده المعادله مضبوطه لان لو هو شايف انه مش هايقدر يحكمنى يبقى العيب فيه هو مش فيا واكيد يبقى هو مايلزمنيش لانه مش هايملى عينى صدقينى انا برقض رجاله كتيره جدا لما بيقلولى انى ممكن اركبه وادلدل رجلى صدقينى انا عندى استعداد اتجوز رجل يكون هو الامر الناهى فى حياتى بس بحكمه واتقاء ربنا مش عشان يثبت انه رجل وخلاص والمساله بتبقى مسالة قبول فى الاول والاخر وياريت تقرى مدونتى التانيه وخصوصا (احنا بنختارهم على اساس ايه) وانتى هاتعرفى انى فاهمه الامور صح

saifoo noor يقول...

ana 3omrey ma ethamtek fe kalamey bel manzarah ya wafaa be kowet shakhsytek bel 3aks enty betet3amly be tabe3tek aktar men el lazem we sadaaeny da mesh matloob fe zamna da..ana kol el habeet awslholek enek tesm3ey aktar ma tetklmy (teshtery we ma teb3eesh)zay ma by2oloh we motaakedah en ma feesh wahda sawyah nafsyan tehb tartabet be ragel(terkaboh we tedldel regleha)laaen da mokhalef le nakoos el hayah we da ba2olholek men khelall tagrobah leyah m3akey we 3arees awel ma a3ad m3akey all shakhsytha kawyah da kan naaes nea2om nedrab fe ba3d..el regala kolhom bekhtlaf a3mrhom we mostwah skafethom we mostwahom el egtma3ey el 3elmy zay ba3d fe noatet ehtyaghom le ehsashom be ehtyag el taraf el tany lehom we 3adm taghy shakhsyet el taraf el tany 3alehom we hotely taht de 100 khat..we abl da koloh ana moaamena gedan bel esmah we el naseeb we 3ala yakeen en rabena shaylek el kheer elly hay3wadek 3an ay shea we kol shea dayek we elly haysbetlek enek fe3lan konty sah we en kol el nas de kanet mesh fahmakey sah..we bekhsoos 3adm fehmek le shakhsyty sah fe el awel aheb a2olek en mesh enty le wahdek bas sadaaeny el donyah we el ghorbah bet3lem we betghyar kteer we abl da koloh el hob elly bytla3 ahla ma gowakey we bykhaleky tetweldy lely bethbehmen gedeed

مذكرات موززه عانس يقول...

على فكره انا ماقلتش انك بتتهمينى بس بالرغم من كده مش فاهمه نقطتى اللى عاوزه اقولها بس انا فاهماكى اوى وعارفه تقصدى ايه بس حكاية انى اقعد مع العريس وافضل اتكلم واستعرض معلوماتى دى عملتها مره واحده فى حياتى وبعدين اتربيت بعدها وفهمت كويس انى اللى فاكراه بيتاخد فى صالحى هو فى الحقيقه بيتاخد ضدى لكن اللى بتكلم فيه ده بيحصل مع ناس اصحابى كتير بس انا بنقله على لسانى يعنى بتكلم بلسان بنات كتير مش لازم يكون حصلى وحكايه ان فى ستات عازه هى الى تسيطر على الحياه وتركب الرجل لأ فى بنات وستات كده فعلا اسالينى انا اللى عاوزه اقوله ياريهام ان المشكله والله مش الشخصيه القويه ولا الكلام الكتير ولا المظهر محجبه او لا بس انتى عارفه المواضيع بتبوظ عشان ربنا سبحانه وتعالى مش رايد ان الموضوع ده او غيره يتمبالرعبى كده مالهمشى نصيب قى بعض واكم من بنات بتتكلم كلام محايد وبتبقى هاديه ويخرج الرجل يقول عليها دى زى الطوبه وانا بنفسى جبت عرسان لبنات واتقال عليهم كده وسمعت ده بودانى عارفه ليه كده عشان بس ربنا مش رايد الموضوع يتم مش تفتكرى ان كل الى بقوله فى مدونتى بيبقى حصلى شخصيا وعشان كده كتبتها باسم مستعار عشان اتكلم براحتى شوفى مدونتى التانيه احسن هاتعجبك واشتركى فيها بس حاولى تكتبى عربى عشان الفرانكوا اراب رخم فى القرايه

إرسال تعليق