السبت، 15 يناير، 2011

هو فى كده؟؟؟؟؟؟؟؟؟؟؟؟

فكرت أكتب كل اللى عايزه أقوله فى تعليق على البوست اللى فات لكن لقتنى مفروسه ومتغاظه جدا وأنا بأرد على مدام شمس النهار قلت لازم أكتب بوست كامل أعبر فيه عن غضبى.

 من زمان وأنا كنت عايزه أكتب بوست عن المشهد ده من الفيلم بس نسيت وإفتكرت دلوقتى لما دخلت وعلقت عليه  ولو إنى أصلا كنت حاطه الفيديو عشان العريس اللى فى الفيلم ده فى شبه كبير بينه وبين( الكارثه رقم 58) مش فى الشكل طبعا لكن فى المضمون لكن مايضرش أعلق عليه برضه أهم كلهم عاهات زى بعض .

المشهد ده بيقول حاجات كتير قوى يعنى فى الأول البيه ده أول مادخل البيت كان منمق  وراقى وبياكل بالشوكه والسكينه وبيمسح شفايفه بمنتهى الرقه ومافيش فيه غلطه وعزمها على العشاء وراح محل فخم كمان يعنى أكيد مش بخيل وبيتكلم بكل رقه ورومانسيه وبعد كده ظهر على حقيقته بصوته العالى وأفكاره المتخلفه  البعيده كل البعد عن الرقى زى النوعيه التيييييييييييت اللى بتورد عليا.

لكن على مين هى هنا كانت أذكى منه أوى من كتر الللى شافته وعدى عليها بقى عندها خبره زى حالاتى وعشان كده حاولت تستخدم البادى لانجوتش وتحط  إديها فوق إيده عشان تبقى إيديها هى اللى فوق وتكون هى اللى مسيطره عشان لو ماتضايقشى من ده يبقى ممكن يكون رجل بيثق فى نفسه ومش فارق معاه وهو متأكد إنه مسيطر حتى لو إيديه تحت إيديها وبقول ممكن لأن ده مش قاطع فما كان من الغبى غير إنه طلع إيديه هو فوق عشان يحس إن هو اللى مسيطر يعنى ماسمحلهاش إنها حتى تحط إيديها فوق إيده والحركه دى تدل على ان هو رجل مسيطر وديكتاتور وأظن ده بان بعد كده لما طلب منها انها تديه مرتبها بالكامل وتفرش الشقه بالكامل وانه لازم يعرف كل كبيره وصغيره فى البيت وتبيع عربيتها يعنى يحرمها من أى إستقلاليه.

أوعوا تقولوا ده هبل لأ كل حاجه مهما كانت صغيره بتدل على شخصية العريس زى مثلا لما يكون رايح يتقدم وهو لابس صندل ده يترفض من على الباب أنا مكلفشى خاطرى اصلا ادخل اقابله يعنى هاتقوله يعنى إيه صندل هو ده معناها إنه وحش هاقولكم أه أنا أعنس ولا أتجوز رجل لابس صندل ده بيدل على حاجات كتيييييييييير جدا فيه شخصيته

هى حركه صغيره بيعملوها بعض البنات اللى بقى عندهم خبره من كتر ما مر عليهم من عاهات زى مثلا لما بنت بتسأل رجل إذا كان معندوش مشكله إن مراته هى اللى تسوق وهو يقعد جنبها هو إمتحان صغير ومش هاتعرف منه حاجات كتير ونتايجه كمان مش هاتكون قاطعه وأكيد الجوازه مش هاتبوظ عشانه لكن ساعات بيدى إنطباعات معينه للبنت وأكيد بتتأكد منها بعدين. 
أنا شخصيا بحس إن الرجل اللى بيضايق إن الست هى اللى تسوق وهو يقعد جنبها بحس إنه مش بيثق فى نفسه كفايه وكأن سواقتها هاتنقص من إحساسه برجولته وإن الرجل لو ماكنش عنده مشكله إن مراته تسوق بحس إنه بيثق فى نفسه وممكن يكون شخصيه قويه كمان ومش فارق معاه إن مراته تسوق ومتأكد إن ده مش هاينقص من رجولته فى شىء ومش معنى إنها هاتسوق العربيه يبقى هى اللى هاتسوق الحياه كلها وهاتكون هى القائد.

عموما نرجع للفيلم تانى الأستاذ المحترم اللى بيقول يا حبيبتى وإسمحيلى أقولك يا حبيبتى أوففففففففففففففففففففففففففففففففففففففف جمله سخيفه بسمعها من عرسان كتير وأخرهم الكارثه رقم 58 وكل شويه يقول حبيبتى ويعتذر عنها حبيبتى ويعتذر حاجه تقرف بجد لما هو شايف إنه مايصحش يقولها بيقولها ليه وعموما هو بطل يعمل كده من ساعة ماطلبت منه إنه يإما يقولها ومايعتذرشى يإما مايقولهاش أصلا.
أوففففففففففففففففففففففففففف كلهم صنف واحد
ماعلينا
الأستاذ المحترم عايزها  تفرش الشقه بالكامل و تلتزم بالحجاب وتبيع عربيتها وتعمل شغل البيت لوحدها وياخد مرتبها كله وتخدم مامته لما تيجى تزورهم من غير مايفكر فى البهيمه اللى هايتجوزها وطلباتها وإحتياجاتها وده كله قصاد إنه هايكون جوزها وكأنه بيمن عليها إنه هايتجوزها وبيعتبر ده فى حد ذاته شرف هايمنحه ليها وكفايه عليها  تشيل إسمه بجد مش فاهمه الناس دى عايشه فى الدنيا إزاى وبتفكر إزاى معقوله فى ناس بالعقليه المتخلفه دى.
وطبعا هى لما حاولت تربيه طلعت سيجاره من شنطتها ومش كده وبس دى قامت عشان تولعها من (رجل) وهى متأكده فى قرارة نفسها إن الشخصيه دى بالعقليه دى ماينفعشى معاها التصرف ده وأكيد هايصدم لكن هى قالت لنفسها إن الجوازه كده كده بايظه والله بتفكرنى بالبنطلون الجينس الضيق اللى لبسته وأنا رايحه أقابل الكارثه رقم 58 للمره للتانيه مع علمى إنه بيحب الإلتزام  يوم ماكتبت بوست
 (وقعته سووووووووودا)كنت ساعتها برضه بايعه القضيه.
إلى اللقاء مع العريس رقم 59

9 التعليقات:

المصوراتي يقول...

طلبك سهل

و ان شاء الله ارد عليكِ بس اصبري عليه كام يوم بس اخلص لاني ناسي اسم المدونة اللي جبت منها الاقلب و الكلام دا ايه

معلش بس انا مش حتأخر عليكِ ان شاء الله

المصوراتي يقول...

http://cairo-pro.blogspot.com
http://world-in-brief.blogspot.com/

ان شاء الله تلاقي طلبك فيهم :)

اي ُ خدمه

:)

bombona يقول...

thanks lek kteer hadkhol 3leh washof ely ana 3awzah

bombona يقول...

ولو انى افتكرتك جايبلى موقع فى عرسان عشان بتقولى هتلاقى طلبك فيهم هههههههههههههههههه

المصوراتي يقول...

هههههههههههههههههههههههههههههههههههه


لا لا لا لا لا

انا بخطب للرجالة بس

اجيب لبنت لا اجيب للولد

المصوراتي يقول...

صحيح

انا حطيت بوست جديد
مفاااجأه


يا رب يعجبك

مع انه مش متعلق بالزواج تماماً

bombona يقول...

مبرسى ليك على الموقع ولو انى مش عارفه اسلك فيه اوى واكيد هاشوف البوست بتاعك حالا اى حاجه مش متعلقه بالزواج اكيد هاتعجبنى

model يقول...

اول مرة امر يا بومبونة
اللي فهمته انك بتاخدي مشاهد من السينما اللي بتعالج مشكلة العتوسة و بتنفديها
كده و لا ايه
عموما انا قريت بوست واحد
بيتهيالي لازم اتابع عشان استوضح
تحياتي
موديل
مدونة جديدة نوفي
عاملة مدونة يا ستي اسمها
عايزة اخس
اه و الله نفسي
قولي امين
عشان ابقى بومبونة حلوة مثلك

موديل

bombona يقول...

لا خالص وحياتك دا انا اللى عايشه فى فيلم سينما على طول مع العرسان البوستات المكتوبه كلها تجارب شخصيه بس انا قلت شخصيه وعامه عشان التمويه بس انتى اتسلى فيها بالراحه وانتى تفهمى وعموما شرفتينى فى مدونتى واتمنى تعجبك واكيد هاتابع مدونتك انشاء الله ويارب تخسى وعلى فكره الدايت محتاج تلات حاجات بالضبط تقلبل فى الاكل ورياضه كل يوم واراده قويه وربنا معاكى امين

إرسال تعليق