الخميس، ١٥ سبتمبر ٢٠١١

العريس رقم 63

قابلته يوم الثلاثاء اللى فات هو رجل فى الأربعين من عمره طبعا هاتقولوا لى اتأخر ليه فى الجواز هاقولكم ماهو ماتأخرشى :)))

طبعا هو اتجوز وطلق وعنده بنت طولى فى ثانويه عامه وانا بصراحه كنت اعرفه من قبل كده وعارفه مراته وعارفه عيلته كلها فى صلة قرابه بينا من بعيد وده اللى شجعنى اخوض التجربه رغم احساسى انها هاتفشل عشان عندى فكره جيده عن طباع مراته او طليقته  يعنى.

المهم شكله اتغير جدا عن اخر مره شفته فيها فى حاجه زادت عليه وحاجه نقصت منه اللى نقص منه شعره واللى زاد عليه كرشه دا غير انه عملاق ومش عارفه ازاى مالاحظتش الحكايه دى قبل كده ماعلينا هاقول دى شكليات فارغه هو برضه مقبول شكلا يعنى ملون مش ابيض واسود وبالرغم من ان مش ده ذوقى فى الرجاله بس قلت يا بت طنشى خالص وخلينا نشوف اخرتها 
القعده كانت لطيفه جدا وهو حد لبق وكلامه مرتب وبالرغم من كده مش فيه اى حاجه من اللى اتمناها فى فارس احلامى ماعلينا المهم هو طلب رقم تليفونى عشان نتكلم مع بعض شويه وده ريحنى نوعا ما انه مش مستعجل بقى زى الباقى وهايقرفنى وحصلت بينا اول مكالمه امبارح بس ماتكلمشى النهارده تفتكروا طفش وريحنى من مرارة الاختيار ؟؟؟؟
تفتكروا ؟؟؟ هانعرف 
يتبع.....

7 التعليقات:

شمس النهار يقول...

حلوة عملاق دي عموما العمالقة بيبقوا طيبين

:))
وبعدين هو مااتكلمش عايز يشوف هتكلميه ولا ل
وكمان شكله بيخطت
:)))))

لا ماتخديش علي كلامي :))
وماتستعجليش الامور ومافيش حد بيهرب من النصيب
لما يجي النصيب لاهيبقا فيها فتي احلام ولا كوابيس

:))
انتي علي تويتر؟؟ اومال مالقيتكيش ليه

شمس النهار يقول...

hananfattah

ده انا علي تويتر بس ماتنشريش التعليق مش كتير يعرف انا مين علي تويتر الا المقربين
:))

P A S H A يقول...

الزغروطة خضتني :(

هو برضه مقبول شكلا يعنى ملون مش ابيض واسود .. ما فهمتش الجملة دي بصراحة ! .. شكلها تريقه صح ؟

:)

ابراهيم رزق يقول...

هههههههههههه
مش فاهم يعنى ملون مش ابيض و اسود هو تلفزيون

طبعا هذا يتوقف على مضمون المكالمة
ربنا يسهل

تحياتى

مذكرات موززه عانس يقول...

شمس النهار:
اكيد مش مستنى اكلمه عشان هو خد رقم تليفونى لكن مش سابلى رقم تليفونه
وطبعا انا اضطريت اروح لتويتر عشان الاكونت بتاعى على الفيس مش عارفه ادخل عليه وبعيط وكمان الاكونت الجديد مش عايز يضيف حد:(((
ومبسوطه جدا انى من المقربين واكيد هاضيفك :)

مذكرات موززه عانس يقول...

P A S H A:
تصدق بالله مش انا اللى حاطه الزغروته بس بتخضنى انا كمان
ملون مش ابيض واسود ده مصطلح خاص بيا كنايه عن انه عينيه خضرا وابيض
وبعدين تريقه؟؟؟؟
اخص عليك انا كده برضه؟انت عمرك سمعتنى بتريق على حد من كوارثى قصدى عرسانى؟
يا ظلومتى يانا :((

مذكرات موززه عانس يقول...

ابراهيم رزق :
ميرسى على مرورك اول مره تعلق عندى وان شاء الله ماتبقاش اخر مره ابيض واسود زى ماقلت للباشا فى قاموسى معناها عينيه خضرا وابيض وشعره اذا كان موجود يكون اصفر او بنى .ويارب يا مسهل

إرسال تعليق