الاثنين، ١٩ سبتمبر ٢٠١١

حاولى تحبيه

عنوان البوست ده هو نفس الجمله اللى قالتهالى المدام اللى جابت لى العريس رقم 63 بعد ما حن عليا وكلمنى فى التليفون
بجد مش فاهمه يعنى ايه الواحد يحاول يحب ؟هو الواحد هايدوس على الزرار يقوم يحب؟
هو الحب بييجى بالمحاوله ؟
دى تبقى محاوله صعبه اوى ده كأنى بزوق فى حيطه

الغريبه انى حاسه انى مش حاسه بمعنى ان كل مره بكون يا اما قرفانه او عايزه ارجع او انى متقبله بس عندى شوية تحفزات لكن المره دى لا ده ولا ده
 لا مبالاه غريبه
 و اعتقد انها عندى من العريس رقم 62 لو تلاحظوا, ومكمله معايا لحد دلوقتى ولا يمكن يكون ده يأس او شيخوخه مبكره؟ هههههههههه بجد مش عارفه ,كلمنى مرتين  او تلاته وبقفل معاه وكأن المكالمه لم تكن والغريبه انى مش بفكر فى اى حاجه قالها فى المكالمه ولو ان اللى لفت نظرى انه حابب يستميلنى والحكايه دى بتغيظنى مووووووووووووووووووووووووت
 انه يتصنع او يتكلف عكس طبيعته عشان يعلقنى بيه وانا طبعا مش تلميذه فى ثانوى عشان يدخل عليا الكلام ده مانا مدوباهم 62 قبيه ,مش مقتنعه كمان ان فى واحد عنده اربعين سنه ومخلف بنتين طولى وبيكلم واحده عندها 33 سنه لسه متخيل انى هانبهر لما يقولى انه هايلف لى تحت البيت بالعربيه وقال عايزنى اقف عشان اشاور له لالالالالا مش انا خالص
اصل هى مش قصة حب بقالها 10 سنين يعنى وكمان مش حاسه كلامه نهائى
بضايق اوى من الرجل اللى يغازل البنت او يحاول يستميلها بكلام عشان بس ياخد بونط عندها مش عشان هو حاسس الكلام ده او طالع من قلبه
شايفاكوا ياللى قاعدين قدامى بتمصمصوا فى شفايفكم وتقولوا ايه( ياختى دلع البنات ده طالع من قلبه ايه وبتاع ايه وليه مايكونشى طالع من قلبه بجد)
 هاقولكم لأن الكلام اللى طالع من القلب بيدخل القلب وانا سمعت وماحستشى مع انى سايبه نفسى خالص ولاغيه عقلى وفاتحه قلبى
عموما كفايه كلام على احاسيسى وخلينا فى المهم هو دلوقتى طالب يقابلنى لوحدنا وانا لسه مش عارفه بالرغم من ان المقابله دى هاتفيدنى كتير وهاعرف منها حاجات كتير لكن فى نفس الوقت خايفه يطلع دهوول وينط الرجل الشرقى اللى جواه ويقول
 سمحت لنفسها تقابلنى عليها اللعنه
يتبع....

6 التعليقات:

شمس النهار يقول...

نعم نعم نعم
يقابلك لوحدوكوا ده ايه هو فاهم ان بنتي سايبة ولا ايه
:)))))
لالالالالالا
نونونو

ده اختباااااااااااااااار ياشابة
هيشوفك هتوافقي ولا لأ
عايز يقعد معاكي تاني ماشي ده حقه وحقك
يتفضل يرن الجرس علي باب بيتكم ويانفتح له يامانفتحش
:)))
لا لا لا بهزر
وهنفتح له ويتفضل يقعد علي رؤس الاشهاد
واااااااالا ايه
:))))))
حكمي عقلك يابيضة
:))))
وماتغبيش عايزة اعرف اخرتها ايه
العريس ده طول حبتين
والماية والنور غليوا
:))))))

P A S H A يقول...

نيجي معاكوا .. نيجي معاكوا D:

طب انتي ما قدرتيش تخمني طبيعة شخصيتة من كلامك معاه ؟
مع إني أعتقد إنه صعب يفكر بالطريقة دي !
عموماً .. صلي استخارة وسيبيها على المولى عز وجل
وربنا يكتبلك اللي فيه الخير إن شاء الله

مذكرات موززه عانس يقول...

شموسه:
تصدقى ولا فارقه معايا يقول ايه او يفتكر ايه حاسه انه لو افتكر ان بنتك سايبه زى مابتقولى ومشى هاكون مبسوطه اكتر ههههههه
على العموم هو بيتكلم كل يومين يعنى ميعاده بكره انا اتفقت مع المدام اللى جابتهولى وهى برضه صاحبة اختى ان احنا هانخرج كلنا تانى ويبقوا يقعدوا هما بعيد عننا شويه ويسبونا لوحدنا وافتكر ده حل وسط

مذكرات موززه عانس يقول...

pasha:
هههههههههههه اتفضل والله
انا عايزه اقولك انى مش بحاجه انى اخمن طبيعة شخصيته وعلى كل حال انت فكرتنى فعلا اصلى استخاره انا كنت ناسيه

عبدالحميد خطاب يقول...

هههههههه
الأخت مفيش منك رجا خالص ,ما تحنى عليه شوية

تعاملى معاه أكتر إن شاء الله يطلع بن حلال

وبعدين حرام عليكى 63 .. ولسه عندك نفس

ههههههههه

ربنا يكرمك بابن الحلال إللى يسعدك ويهنيكى ويخليكى مبسوطة


أتشرف بزيارتك لموقعى

http://mytadwen.blogspot.com/

مذكرات موززه عانس يقول...

ميرسى على مرورك يا حميد
وانت بتقولى اديله فرصه اومال انا بعمل ايه حضرتك مانا بديله فرصه وبعجوه كمان ههههههههههههه

إرسال تعليق