الأحد، ٤ مارس ٢٠١٢

الكارثه بالقوى رقم 69


عارفين الحافظ مش فاهم ؟
 هو ده العريس رقم 69 :) 
حافظ مش فاهم
 خريج علوم وجايب مجموع كبير فى الثانويه العامه وعامل ماجستير وبيخلص فى االدكتوراه وبيشغل فى مركز البحوث
 لكن اجاركم الله طبق الاصل العلقه اللى فاتت
 دهولل جدا 
مش بيعرف يقول كلمتين على بعض واللى يضحك ان صاحبتى قبل ماتجيبه فهمته انى مش بحب الدهولات وحاول وهو قاعد معايا انه مايبقاش دهولل فا كانت النتيجه انه بقى دهولل اكترهههههههههههههههههههههههههههههه 
برضه بحكى الحكايه من قدام لورا
 نحكيها من الاول بقى
 الاستاذ ده يبلغ من العمر 34 عاما مطلق ولديه ولد وبنت وليس لديه شقه 
وعنده ام قنبله ذريه بشهادة الكل منفصله عن جوزها بعد ماطق منها ومن طبعها حكاية الاستاذ رقم 69 بقى انه كان قاعد مع مراته فى شقتها لانه مش عنده شقه وكان حماه وحماته جيرانهم هو طبعا بيقول انهم كانوا بيتدخلوا فى كل حاجه بينهم  لكن بقى صاحبتى حبيبتى قالت لى معلومات اكتر لما بلتنى بيه زى انه حماه فى خناقه من الخناقات ضربه بالقلم
 بصراحه كل ظروفه ماكنتشى فارقه معايا قد حكاية القلم اللى كلوا ده 
يعنى معقوله يكون هفأ للدرجه دى؟؟
 انه ينضرب من حماه ويسكت
؟؟
 وطبعا ده يتنافى مع مواصفات الغضنفر اللى انا عايزاه 
عموما انا شفته اول مره وحسيت انه تحت بند (مش منفر) ولكن ظروفه كلها وحشه زى ماعرفتهم والموضوع مافيهوش ميزه واحده المهم انا طنشت وقعدت قاعده كمان يمكن فى حاجات تظهر تشجعنى ولكن كلامه معايا صدمنى جدا انه مش عارف يقول كلمتين على بعض ومش فالح غير فى التسبيل لا واللذيذ انه طلع عضو فى حزب النور ولما بقوله طب يعنى انت ليه مش مربى دقنك وسألته اذا كان عايز مراته تلبس اسدال قالى لا اصلى مش سلفى اوى ؟؟؟!!!
مش عارفه يعنى مش سلفى اوى وسلفى نصن نص؟؟
  هايتخلى عن انتمائه السياسى والدينى عشان الجوازه تمشى ؟
وبعدين يطلع عين امى بعد كده بقى :)
المهم روحت البيت وعلى نغمه واحده ماخدوش يا بابا ماخدوش يا بابا ماخدوش يا بابا

5 التعليقات:

P A S H A يقول...

هو يقصد بـ مش سلفي أوي : إنه ما بيطولش سوالفة D:
كويس إنك حلقتيله :)

مذكرات موززه عانس يقول...

سعادة الباشا :
ههههههههههههههههههههههههههههههههه

شمس النهار يقول...

خيرها في غيرها
يمكن ربنا يكرمك في نمرة 70

وصف الاحساس يقول...

الحقيقه المره اني فكرت الموضوع جد
انتي كاتبه في التعريف انك مش هتقبلي اي حه اﻻ اما يكون زي ما تتمني
طب انتي بتضيعي وقت ولا بتتسلي ولا ايه
ليه تخلي اي حد يشوفك ولا يعاينك وتعاينيه
وليه في بيت صاحبتك
ليه ما تساليش عن ال جاي ده كويس وان ظروفه مناسبه واخلاقه وتدينه كويس تقبلي تقابليه غير كده لا
اما بقي انك بتدوري علي احسن الوحشين مش علي ال يرضيكي

مذكرات موززه عانس يقول...

شموسه

يارب


وصف الاحساس

ماهو انا بشوفهم عشان اتأكد ان فى حد فيهم اللى بتمناه ولا لأ :)
وبالمناسبه مش كل حاجه اقدر اعرفها بالسؤال قبل ماشوفه لأن ممكن يكون فيه عيوب بالسمع بس لما اشوفه اقبله حتى بعيوبه :)

إرسال تعليق