الخميس، ١٢ أبريل ٢٠١٢

الكارثه رقم 70



جفلتهم 70 الحمد لله
 وبرضه على نغمه واحده
 ماخدوش يا بابا ,ماخدوش ياباب ,ماخدوش يا بابا 
وبالمناسبه الجديد بقى
 ماخودهاش يابابا, ماخودهاش يا بابا ,ماخودهاش يابابا 
الحكايه من الاول بقى
اكشن 70 مره 
كنت عند واحده صحبتى فى البيت وكان عندها واحده صحبتها بتاخد معاها الشاى وباختصار شديد عشان بقيت اتخنق من كلام الستات ده بتاع عندك كام سنه وليه ماتجوزتيش والهبل ده 
 هاجيب من الاخر
 قالت لى على الكارثه رقم 70
 شاب فى الاربعين من عمره مطلق كالعاده (حسب اخر موضه فى عرسانى) وعنده بنت ومدير فندق مشهور ومستواه المادى مرتفع جدا (وزى القمر) على حسب كلامها اللى اتأكدت بعد كده انه كله فشر
 المهم سبب الطلاق انه اتجوز واحده اصغر منه فى السن بكتير وكانت طمعانه فيه ده على حسب تعبيرها
 وكانت عايزه تعمل مشاريع وكل شويه تزن عليه انه يعمل مشاريع وهى اللى تديرها لانها كانت بتدير مشاريع لخالها قبل الجواز
 فلما زهق من زنها طلقها :)))
طبعا بالرغم من عدم اقتناعى ان مراته اصلا ماديه وطمعانه فيه ولكن وافقت انى اشوفه من منطلق (ادينى بتفرج ) 
ولما جه اليوم الموعود و حطيت احمر واخضر وروحت عشان اشوف البيه اكتشفت انه شخصيه عاديه جدا واقل من العادى ولا زى القمر ولا حاجه ده غير ان البيه قاعد بياكل لبانه وبيهزر هزار تقيييييييييييييييييييييييييييييييييييييييييييييييييييييل مووووووووووووووووووووووووووت وبيتكلم بتناكه غريبه كأنه فاكر نفسه لقطه مثلا ده غير انه ماكلفشى خاطره يطلب لنا حاجه طول القعده ناهيكم عن المكان الحقير اللى قال نتقابل فيه واكيد انا طبعا بعلق على الموضع ده مش عشان انا محرومه فيروز ولا بيبسى ولكن فيه حاجه اسمها ذوق البيه ماسمعشى عنها 
المهم انى بعد محادثات كتير حصلت بينا اكتشف البيه انى مشغوله جدا بدراستى وشغلى وتدريبى و رياضتى وانشطتى وعشان كده قالى انتى مشغوله جدا ومش عندك وقت وطبعا انا ماكنتش قاصده افهمه كده بس انا مجرد برد على اسئلتهم وتحقيقاتهم وكأنى انا مش من حقى اسأل انا كمان بس ابوس ايدى وش وضهر عشان هو اتقدملى 
واضح جدا انه متعقد من الست المشغوله اللى عندها مشاريع واللذيذ انه قال كده فعلا وعبر عن ده فى القعده وخد الشر وراح الحمد لله وكانت دى نهاية الكارثه رقم 70 

وبخصوص انى بقول عليه كارثه بغض النظر عن مميزاته اللى قلتها فوق
فهو اخطأ فهم مراته لما تخيل انها طمعانه فيه (بفرض ان ده سبب الطلاق) لان الست اللى بتتعود على الشغل مش بتعرف تبطل وهى مش قالت له هات فلوس فى ايدى عشان بقول عليها ماديه 
ولكن هى بس محتاجه تدير مشروع زى ماهى متعوده وعايزه تحقق من خلاله ذاتها 
وثانيا وهو الاهم انه اخطأ فهمى انا الأخرى لما عرف انى مشغوله جدا لانى لو ارتبطت بيه اكيد هايكون له وقت وهاتكون له الأولويه 
لكن ده طبعا فى حالة لو كان( رجل ) 
مش بيتشدق باللبانه وكان عنده ذوق وشياكه 
عموما انا مبسوطه جدا
 لانى قلت قبل كده اخف العرسان على قلبى اللى مواضيعهم مش بتاخد وقت وبتكون محسومه من الاول 
والى اللقاء مع العريس رقم 71 

6 التعليقات:

شمس النهار يقول...

ياله خد الشر وراح
بس انتي ماقلتيش اللبانه
كانت سمارة ولا نعناع :))
مانفسكيش في وزراة من اللي عندي
:)))

Baskouta يقول...

ربنا يراضي قلبك باللي تتمنيه ويفرحناا كلنا
آمين

مذكرات موززه عانس يقول...

شموسه :
ههههههههههههههههههه لا بصراحه نسيت اسأله
ماحنا اتفقنا بقى على وزارة العرسان

مذكرات موززه عانس يقول...

بسكوته
اميييييييييييين يارب

P A S H A يقول...

وصلوا سبعين ؟؟؟
باسم الله ما شاء الله .. باقترح تعملي احتفال في المدونة - إذا ما حصلش نصيب قبلها - برقم 75 باعتباره حدث :)
مش عارف بيسموه العيد البرونزي ولا البلاتيني ولا إيه !
المهم إنك تعزمينا على تورتة :)
تقبلي مروري وتحياتي

مذكرات موززه عانس يقول...

باشا :
ههههههههههههههههه اهخليكوا انتوا هزروا وانا يجيلى الضغط من اللى بشوفوه

إرسال تعليق