الخميس، 17 أبريل، 2014

الكارثة رقم 80

ايوه مش هبطل عد طول مابتجيلى العاهات دى
 وايوه عاهات
 ماهو لما واحد يفضل يتمسكن لحد مايتمكن عشان يطلع عين امى بعد كده يبقى عاهه وستين عاهه
 بيتعامل بذوق بس عشان الموضوع ماشى انما لما رفضت كشر عن انيابه وكأن الرفض والقبول مش من حقى
حاجه وسخه جدا جدا
رجاله كسر ووقيع وفرز تالت حقيقى وعشان كده احنا قاعدين من غير جواز 
البيه رقم 80 عنده 42 سنه ومحاسب ومن قها
  من اول مااتعرضت عليا صورته تنحت لانه طبعا واضح انه مش ستايلى خالص ومحدش بقى يقولى مش مهم الستايل اصلك بقى عندك 35 سنه ولازم تتنازلى
 لا مش هتنازل على فكره عشان اخد لقب مدام واللى مش عاجبه يولع
مفيش قبول اعمل ايه يعنى ؟؟
مش راجل هعاشره وهنام جنبه يعنى حتى الحد الادنى من القبول مش من حقى ؟؟ عموما انا بدافع ليه اصلا ياكشى يولع الكل 
المهم انى بعد ماشفت صورته كنت مقررة انى ارفض وبعدين قعدت اقول لنفسى بلاش احسن اندم خلينى اشوفه الاول يمكن يكون لبسه ومظهره كده بس لكن لما يتكلم يطلع مقبول ودمه خفيف
المهم رضيت اقابله وياريتنى مارضيت :/
حد دمه يلطش جدا وقاعد يقول نكت بايخه وبنت كلب وبعدين لما قالى اقولك شعر ؟؟
قلتله لو على نفس مستوى النكت بلاش :)
برضه مسمعش الكلام وفضل يقولى فى شعر سخيف ورخم جدا وميعرفش ان الشعر ده هو اللى هيجيب اجل الموضوع :/  
المهم ان القعده عدت وانا قمت روحت البيت وانا عارفه ان الانطباعات الاولى تدوم اكيد وانى اكيد مش هغير رأيى  وخصوصا بعد اللى شفته بس برضه مقدرتش اخد الخطوة دى واقول لأ للأسف :( 
ملحوظة :عارفه انى بحكى بسرعه لأن خلاص مبقاش عندى خلق للحكاوى الممله دى وزهقت الموضوع مبقاش يضحك خالص وزاد عن حده
معرفش الرجالة الكويسه راحت فين ؟؟؟ 
اكيد اتجوزوا الستات الوحشه وندموا وابتدوا يلعبوا علينا احنا البنات اللى فاتهم القطر دلوقتى بما ان فى حملة موسعه من الرجالة المتجوزين للاستفراد بالعوانس امثالنا ! :)
المهم نرجع لموضوعنا تانى  لما سألونى عن رأيى اضطريت انى اقولهم انى عايزة رقم تليفونه عشان نتكلم ونعرف بعض اكتر بالرغم انى عارفه انى هدفع تمن ده لانى هضطر اسمع نكته البايخه وشعره السخيف كل يوم :/ 
ملحوظة :ازاى واحده ممكن تتجوز واحد شايفاه دمه تقيل ؟؟؟ :) 
المهم انى فعلا فضلت اتكلم معاه لمدة اسبوع وكان اوسخ اسبوع الحقيقة كل يوم شعر ونكت ورسايل وغلطات املائية فى الرسايل لما اتقرفت من عيشتى
المهم انى كنت بتعامل بذوق اوى معاه وماحاولتش ابقى قليلة الذوق وخصوصا انى كنت حاسه انه شارينى واللى بلتنى بيه فهمتنى انه ممكن يجراله حاجه لو انا رفضت 
اضطريت انى ابقى لطيفه على غير العادة مع النوعيه دى
واتعامل كويس المهم ان واضح جدا ان الست اللى جابتهولى ماكنتش تعرفه كويس لانه اظهر الوش اللطيف بس :)
وجه اليوم الموعود انى هبعتله رساله واقوله انى بعتذرله ومضطره ارفض واحسس على كلامى بقدر الامكان عشان مضايقهوش وطبعا قلت النشيد بتاع كل مره
 (ممكن يكون انت حد كويس وانا حد كويس بس مش لايقين على بعض يعنى انت ممكن يكون عندك تشيرت شيك وبنطلون شيك بس مش لايقين على بعض نفس الحكاية انا وانت مش حاسه ان فى بينا انسجام خالص انا اسفه وربنا يوعدك باللى احسن منى ) 
وهنا حدثت الطامة الكبرى على رأى عادل امام فى مسرحية الواد سيد الشغال الزبيبة اللى وشه اختفت والنور اللى فى وشه انطفى !!!
لقيته بعتلى رساله فى منتهى قلة الذوق لا تتناسب نهائى مع ذوقه فى كلامه معايا ومع احترامه اللى الست فلقتنى بيه !!
وفضل يقولى انا عقلى اكبر من عقلك وحاجات كتير غريبه 
المهم انى على قد مااتنرفزت من كلامه واتغاظت لكن فرحت لانه اثبتلى بالدليل القاطع انه شخصيه زباله :)
انا فضلت ماسكة نفسى ومش عايزة اقل ادبى عليه عشان عامله حساب للست اللى جيباه
 بس خرجت عن شعورى لما كلمتنى وقالتلى انه قلها ان حصل بينا سوء تفاهم وقفلنا السكه بطريقه مش لطيفه مع بعض اضطريت انى اقولها لطيفه دى تبقى امه !!! :)
وقلتلها انه قل ادبه عليا وبعتلى رساله قليلة الذوق عشان قلتله كل شىء قسمة ونصيب وعرفتها انى مش عايزاه يكلمنى تانى نهاىئ وعملت لرقمه بلوك 
فوجئت بعد يومين انه بيكلمنى من رقم غريب وبيقولى انه اسف ومكنتش اقصد وانتى فهمتى انى بتمسكن لحد مااتمكن :)
الغريبه انى مصرحتش بكده بس هو طبعا فاهم ان ده طبعه وعشان كده فهم انى قفشته وطلب منى فرصه تانيه عشان يثبتلى فيها حسن نيته وطبعا انا مكنتش موافقه بس بعد اعتذارات ومحايلات رهيبه اضطريت انى اخده على قد عقله وخصوصا انه حلفنى برحمة ابويا وعرفته ان بعد اسبوع لو مكلمتكش يبقى اعتبر ان الموضوع منتهى لكن هو معجبهوش وقالى طيب ممكن اكلمك الاسبوع ده ؟؟ طبعا ايقنت ساعتها انى هقع فريسة للشعر الخزعبلى والنكت اللوذعيه من جديد وانا خلاص مرارتى الصغيرة لا تتحمل:) قمت رفضت وقلتله لأ انا هكلمك بعد اسبوع من غير ضغوط منك رد عليا وقالى يبقى مش هتتكلمى :/ طيب ولما انت عارف انى مش هتكلم اومال طالب منى فرصه ليه ؟؟؟ 
المهم بعد اخد ورد انتهينا على انى هكلمه بعد اسبوع ولو متصلتش يبقى كل شىء قسمة ونصيب بعد اسبوع بعتلى رساله قد شبر على الموبايل :)
برضه بيتحايل ويعرفنى انه فهمنى وعرف انا بحب ايه وبكره ايه وانه افضل حد ليا 
لو كان فهم كان عرف انى مش قابلاه طبعا !! 
وبكده خد الشر وراح :)
استمارة6 
الى اللقاء (قريبا جدا )مع الكارثة رقم  81 :)

4 التعليقات:

Nash يقول...

مش متخيل إزاي عندك القدرة على الاستمرار ومقابلة الكوارث من غير ما يجي في بالك إنك تتوقفي نهائية عن مقابلتهم أو تبدأي بالشك في ذاتك وصحة حكمك عليهم أو ممكن يتطور الضغط بيكي وتضطر للتقيلل من حدك الأدنى
المؤلم في الموضوع مش إستمرارك في الحياة بلا شريك
المؤلم الصراعات النفسية اللي ممكن تخوضيها للوصول للشخص المناسب
..

شمس النهار يقول...

ولا يهمك الاجمل جاي :)
انتي انسانه لطيفة وربنا هيبعتلك اللي يستهلك
بس عايزة اقولك انك وصلتي لمرحله الاختيار والاقتناع فيها صعب
البنت كل ماتكبر عقلها بيكون ارجح واستعبها للحياة بيكون اكبر
وفهمها للحياة بيبقا اوقع
فامش سهل تلاقي حد يحتل مخها وقلبها

غير معرف يقول...

انا بنوته عندي 21 سنه وعندي نغس المشكله متقدملي زميلي من الكليه. الموضوع ابتدا باهتمام شديد منه بعد كدة احر يوم في الامتحانات جه وقالي انه معجب بيا وبيحبني .معرفتش ارد عليه وﻻ اه وﻻ ﻻ ﻻن كﻻم الناس الكبار ليا بيقولولي ادي فرصه ومتقفليش الباب مش ممكن يتلع حد كويس. كان واخد رقمي قبلها بفتره بطريفه كدة وانا اتحرجت اقوله امسحه بعد اما قلي بحبك بئه فضل يكلمني 24ساعه في اليوم وحب ومشاعر واهتمام وكدة وانا لسه مش حاساه اصﻻ من زميل لحبيب وبسرعه كدة مستحملتوش وكمان حسيت ان دمه تقيل ومش بيعرف يتعامل مع الناس. وبيحفظ كﻻمي وطريقتي ويقولهالي الي قفلني اكتر انه عايز مشاعر وحب زي مبيديني وانا مش بسهوله هحس بحاجة من نحيتك ﻻزم اصلي وافكر واقرر مش بسهوله كدة وانا من الناس الي بتختاف اوي علي مشاعرها.بعد اما بصعوبه فهم اني مش حساه و مش عايزاه بس طبعا بطريقه متزوقه قعد شهر مكلمنيش ورجع تاني امبارح يتكلم معايا شات بدا هاي مردتش اعد يقولي احنا مش اعداء و الكﻻم دة رديت وقلتله نعم ايه المطلوب مس خﻻص قعد يقولي انا مش بنام ومش باكل وتعبان والكﻻم دة خلينا حتي نكلم بعد كاننا اخوات وبعد محايلات وافقت بس مش مرتاحه ﻻنه عمال بئه يقولي انا حصلي وجرالي ف بعدك والكلام و انت عملتي ايه طول الفتره دي ف بعدي والكلام دة مع العلم ان الفتره الي كلمني فيها بعد اما قالي بحبك كانت اسبوعين مش اكتر و هو زميلي وهشوفه السنه الجايه في الكليه وانا حاسه انه عايز يتمسكن عليا عشان يرجع تاني اعمل ايه معاه

مريومة يقول...

أخيرا لقيت واحدة فاهماني
ربنا يكفيكي شر الكوارث و يرزقك بالي يستاهلك :)

إرسال تعليق