العريس رقم 62

قبل مابدأ اتكلم عن العريس رقم 62 واخر انترفيو عملته لازم الاول انوه عن حاجتين اولا :ان الداهيه رقم 61 ظهر اخيرا وطلع مشكلته ان مامته كانت فى المستشفى وهو قال ايه محتاس بيها طبعا انا مش مصدقه الهجص ده بس عموما جوز صاحبتى الله يباركله ويكرمه قفل الموضوع بطريقه جامده جدا يمكن لو كنت انا مكانه ماكنتش عرفت اعمل كده

 لما الاستاذ بهاء المحترم (واعتذر عن لفظ بهاء طبعا ) قابله وقاله على ظروفه كانت ايه وبرر عدم اتصاله بيا طول المده دى كلها بإن مامته كانت فى المستشفى وهو كان مشغول معاها كان من المتوقع من جوز صاحبتى انه يرد عليه يقوله :

(معلشى خلاص الموضوع انتهى من عندها واعتبرت الموضوع كأنه لم يكن لأنك اتأخرت فى الاتصال ) 

زى مانا قلت له لأنى طبعا مش من المنطقى انى افضل مستنيه امه الى مالانهايه ولكن إتفاجئت ان صاحبتى بتتصل بيا تانى يوم وبتقولى ان جوزها قاله الاتى :

(عموما احسن انك ماتصلتش لأن هيا رجعت فى كلامها تانى وقالت ان مستقبل وظيفتك مش مضمون وايه اللى يجبرها تستحمل الظروف دى ؟وحتى مراتى قعدت تقنعها لكن هى رفضت تماما ) 

طبعا الاخ ده بيشتغل ظابط جيش صحيح لكن كان ناوى انه يطلع معاش السنه الجايه عشان عنده عيب خلقى قصدى طبى وهو قالى كده وانا طنشت قلت مش هاقف على الحاجات الصغيره دى واكبر دماغى لحد ماشوف اخرتها وبرضه عشان ماحدش يقول دى بتتأمر وبعد كل ده هو اللى إتأمر عليا بس بجد اهو خد فوق دماغه  وبقى شكله هو اللى عره تسلملى يا وليد يا جوز صحبتى

والحمد لله مش مضطره اتجوز عريس مش طايقاه 100%

ودى كانت نهاية الداهيه رقم 61 (صبرنى يارب)

ثانيا: اتقدملى 3 عرسان تيك اواى مابين العريس رقم 61 والعريس رقم 62 بس انا قلت بلاش اوجع دماغكم بيهم اصل واحد عنده 45 سنه وواحد 46 وواحد 48 وطبعا دول هاكون محتاجه اخد كارت ضمان ولازم اعرف صلاحيتهم هاتخلص امتى وعلى كل حال انا اللى مش بشوفه وبرفضه من بره بره مش بحسبه ولا ايه رأيكم ؟

المهم خلينا فى العريس رقم 62 طبعا مستغربين انى مش بشتم فيه اصله بصراحه من المواضيع الخفيفه على قلبى وكان بجد حد راقى جدا ومحترم بس برضه للضروره أحكام

عنده 39 سنه وبيشتغل مدرس كمبيوتر فى الكويت وعنده عربيه ومتيسر الحال ومنفصل وعنده بنتين من مراته طبعا ان اول ماشفته برضه قلت كالعاده بينى وبين نفسى ماخدوش يا بابا ماخدوش يا بابا ماخدوش يا بابا  وخصوصا انى وانا لابسه كعب هو جايلى عند كتفى بالضبط ولكن قلت معلشى يمكن لما اتكلم معاه يعجبنى ومش مشكله القصر دى شكليات فارغه (صبرنى يارب)

المهم ان احساسى ماتغيرشى وانا قاعده  معاه لكن سبحان الله لاحظت انه شخصيه صريحه جدا مش عارفه عشان هو انسان كويس ولا انا اللى ربنا بيحبنى ؟

المهم قالى ظروفه كلها من الالف للياء من غير مايكذب ولا يتجمل وطبعا اللى فهمته ان مراته ماضيه على ورقه انها فى حالة لو اتجوزت هايكون البنات من حقه وكمان وقت وصولهم لسن انتقال الحضانه هايكونوا برضه من حقه يعنى المهم انى هاتدبس فيهم فى كل الاحوال وبكده بقى قلب على العريس رقم 58 فاكرينه؟

والأدهى من كده انه ماعندوش شقه ولما بقوله طب ولما تتجوز ناوى تقيم فين قالى فى اى فندق والالذ انه مستعجل جدا عشان مسافر الكويت بعد العيد ويتمنى اننا نتجوز قبل مايسافر شفتوا الحلاوه مش عارفه جاب العشم ده منين اذا كنت انا محتاجه وقت عشان ابلعه هو شخصيا الاول وبعدين محتاجه وقت عشان ابلع حكاية بناته اللى هاربيهم دول ومحتاجه وقت عشان اقنع اهلى بحكاية الفندق دى دا اذا اقتنعت انا اصلا

كل ده وهو عايز كل حاجه بسرعه وبيقول ياريت نتجوز قبل مايسافر, فكر هو عايز ايه برضه مش انا عايزه ايه زيه زى كل الرجاله لكن ده مايمنعشى انه رجل محترم لأنه كان صريح من أول قعده

المهم روحت البيت والغريب انى مافكرتش فيه نهائى ولا فى كلامه ولا حاولت اخد قرار لكن برضه صليت استخاره ومش عارفه ليه مافكرتش بالرغم من انه كان مستنى رد منى وكأنى قرفت من التفكير او قرفت من العرسان مش عارفه دا انا حتى ماقلتش اى حاجه قالها ليا ليهم فى البيت وكل اللى كنت مركزه عليه انه شخصيه غير مقبوله بالنسبه لى ومعقوله هاتجوزه وهو مش مالى عينى ؟ وبدأت احمل الهم  وكأنى كنت بفكر أوافق من كتر اليأس ومر يوم والتانى واتصل الوسيط يسألهم عن رأى ولما سألونى لقيت نفسى بقول لهم هو مستعجل وانا عايزه وقت عشان ابلعه واقتنع بيه اذا كان عنده استعداد اننا نتكلم ونعمل قاعده تانيه وتالته لقيتهم بيقولوا لى:( انتى هاتعملى قاعده تانيه وتالته وبرضه مش هاوافق يبقى ملهاش لازمه انك تعطليه انه يشوف عروسه تانيه) وكمان لما عرفوا حكاية بناته وانه ماعندوش شقه هما اللى رفضوا والموضوع خلص فى لمح البصر وكمان ماتحملتش انا مسؤليته عشان مارجعشى اندم

تنفست ساعتها الصعداء بعد ماكنت حامله الهم  لأنى برضه  بقيت مش مضطره أتجوز واحد مش مالى عنيا ولا قلبى ولا حتى اندم عليه

والله ربنا كبير

 لكن كل اللى قلته(عموما انتم كده متحملين مسئولية العريس رقم 62) وكأنى بقولها لنفسى وبعفى نفسى من المسئوليه

وكفى المؤمنين شر القتال والى اللقاء مع العريس رقم 63 يارب تظبط المره دى فتكوا بعافيه:))) 

نهاية الداهيه رقم 61

لما انت مش هاتتصل بتاخد رقمى ليه يا متخلف؟؟

دى الجمله اللى قلتها بعد مانتهى موضوع العريس رقم 61 بلاش  ادخل فى تفاصيل ملهاش لازمه وخلينى اجيب من الأخر لأن بصراحه ماحصلتش حاجه تضايقنى زى كل مره فى ملابسات الموضوع يعنى صاحبتى اللى بلتنى بالعريس هى وجوزها كانوا فى منتهى الادب والرقى ماحدش قالى الكلام السم اياه ده اللى بيعفرتنى ويخلينى قاعده فى الانترفيو مش على بعضى ولا اى حاجه وده طبعا لان صاحبتى دى بصرف النظر عن انها محترمه فهى عارفانى كويس ودايما بحكيلها على مواضيعى واللى بيضايقنى منها وتصرفات الناس اللى بتجبلى العرسان عشان كده هى قالت اكيد فى نفسها مافيش داعى تخسرنى عشان جوازه 

المهم  نتكلم عنه شويه هو ظابط مهندس يبلغ من العمر 40 عاما وخطب مرتين قبل كده وفك خطوبته لأسباب غير معروفه شكله معقول شبه جون ترافولتا وعيونه ملونين ولبسه معقول صحيح هو ساعات بيبقى بلدى اوى يا حسين فى طريقته فى الكلام وكمان طريقة قعدته مش شيك بس انا قلت يا واد طنش خالص دى شكليات فارغه وخلاص بأه مش هانقف على دى بأه فى حاجات اهم الواحد يهتم بيها وعشان ماحدش يقول انى بتأمر والكلام الأهبل دا اللى انتوا عارفينه 

سابونا نتكلم لوحدنا شويه وطبعا كان مستغرب أوى انى بحفظ قراءن عشان مش باين عليا

  قلت لنفسى:اااااااااااااه ابتدت التفاهه اهيه

وكأنى كنت رايحه اشوفه وانا لابسه بدلة رقص او مثلا كأن اللى بيحفظ قرأن ده لازم يكون بلحيه او نقاب لا حول ولا قوة الا بالله

المهم انا والله كنت برد بذوق ودبلوماسيه على غير العاده وفهمته ان الواحد المفروض مايخدش بالمظاهر وبعدين تجاذبنا اطراف الحديث فى مواضيع عامه وبعدين استأذنت عشان الوقت كان إتأخر روحت البيت صليت استخاره وبعدين صحبتى كلمتنى وقالت لى إنه  قال لجوزها انى جميله ولذيذه وشكلى بنت ناس  بس هو محتاج رقم التليفون عشان يكلمنى لأن الانترفيو ماكنشى كفايه عشان يحدد وانه اتحايل على جوزها لأن جوزها ماكنشى راضى انه يديله الرقم وقاله انى احتمال مارضاش وده من باب إنه يعززنى يعنى

وكأنه هايعمللى بحث حاله وحياة امه

ومع ذلك قلت يا واد طنش خالص ورضيت انها تديله الرقم وعليها من يوم الجمعه اللى بعد المقابله لحد دلوقتى لا حس ولا خبر :))

ده معناه ايييييييييييييييييييييه ؟؟

عموما مش هاشغل دماغى بواحد تافه زى ده على كل حال انا بصيت لنص الكبايه المليان وفرحت انى مش مضطره اتجوز واحد بلدى زى ده

ودى كانت نهاية العريس رقم 61 والى اللقاء مع العريس رقم 62:) 

ملحوظه :العريس ده حاجه كويسه فى (cv) بتاعتى عشان يثبت انى مش بتأمر ولا بطلع القطط الفطسانه ولا حاجه وهو اللى مش لوحده من غير ماقرب له 

الكارثه رقم (60)

طبعا انا مش متعوده دايما انى اسمى العريس كارثه الا لما يبقى كارثه بجد

ليييييييييييه بقى هاقولكم حاااااااااااااااااااااااااالا.

شاب فى الثلاثينات  اسمه مازن معاه ماجستير مش عارفه في ايه كده المهم مقبول الشكل لسه جاى من استراليا طازه وبيدور على عروسه(وش واحده مكسوفه) للأسف طلع من نصيب أختكم بمبونه .

اتوسطت احدى زميلاتى فى العمل من منطلق انها مستخسره جمالى وثقافتى و......و....الى اخر النغمه اللى انتوا عارفينها وانا حافظاها ومن منطلق طبعا انها عايزه توفق راسين فى الحلال المهم بلتنى قصدى جابته ليا فى الشغل برضه 

ملحوظه:الست دى برضه هى اللى جبتلى العريس رقم59

المهم كان يوم ماطلعتلوش شمس انا كان مودى وحش قابلها بيوم وكنت نايمه معيطه وحالتى زفت اول ماشفته فضلت قاعده ساكته وبرد على اى حد يكلمنى لكن مش ببص له ولا بوجهله كلام وهو كمان ولا بصلى ولا مره ولا وجهلى كلام لحد ماخلصت القعده على خير ومشى وانا قلت فى قرارة نفسى الحمد لله شكله ماكنشى طايقنى وده فى نظرى احسن بدل ماتكلف عناء انى احتار انى اقول اه او لأ تبقى جت من عنده وكفى المؤمنين شر القتال .

انما الكارثه انى الاقى تانى يوم زميلتى جايه تقول ان البيه بيقول ان ماما عايزه تجوزه واحده تانيه وحتى انها قالت له التانيه بتشتغل فى بنك ومتعينه لكن أنا بالعقد فى مدرسه 

يا روح مااااماااا ولما انت ماما اللى بتختار لك تتجوز مين وانت ابن ماما كنت جاى ترمى بلاك عليا ليه وتقرفنى اكتر مانا مأروفه 

لما انت ماعندكشى شخصيه عامل فيها راجل ليه وبتدور لنفسك على عروسه يا نانوس عين ماما

ودى كانت نهاية الكارثه رقم 60 

ملحوظه :على فكره عارفين اللى ضايقنى فى الموضوع ده ايه ؟؟؟؟؟؟؟

 انى كنت فاكره ان العريس رقم 60 هايكون احسن من كده وهايطلع هو ده 

يالا اهوا خد الشر وراح ولا هانرفز نفسى ولا اضايق.
الى اللقاء مع العريس رقم 61 يوم الخميس الموافق30/6/2011فى تمام الساعه السابعه ونصف مساءا بتوقيت القاهره

هو أخر عريس كان رقم كام؟ أه 58:)

يبقى ده بقى العريس رقم 59 مش هاضيع وقت فيه أصله برضه كان زى النسمه وماحستشى بيه لدرجة انى بكتب البوست على المدونه عدل من غير ماكتبه بره الأول وبعدين أحطه هنا أصلى هأقول أيه يعنى جديد مانتوا عارفين تعددت الأسباب والعرسان هما هما

المهم روحت شغلى زى كل يوم ولما خرجت من مكتبى عشان اجيب حاجه ورجعت تانى لقيت حضرته مشرف ,بصراحه كانوا اتنين واحد موزز والتانى فوزز ههههههههههه قصدى مش حلو بس باللغه الحديثه المتطوره الخاصه بيا المهم قعدت على المكتب وتنحت شويه كده وأول ماعرفونى بيه عرفت على طول انه عريس ومش جاى فى شغل ماهو خلاص بقى بقيت خبره أومئت برأسى إيمائه خفيفه وإبتسمت إبتسامه بارده ه ه ه ه ه ه وسكتت وروحت قايمه بعد التعارف بتلات قايق بالظبط وخرجت بره ولما رجعت كان مشى حمدت ربنا وإستهبلت لحد ماجت زميلتى تكلمنى وأول ما نادتنى بره فهمت طبعا وعلى قد ماكنت متغاظه منها ومن مجايبها حمدت ربنا انها برضه مش قالتلى عشان مبقاش متوتره وطبعا على نغمه واحده ماخدوش يا بابا ماخدوش يابابا ماخدوش يا بابا

الى اللقاء مع العريس رقم60

15خطوة تؤهلك للقب "عانس"

15 خطوه تؤهلك للقب عانس

هو فى كده؟؟؟؟؟؟؟؟؟؟؟؟

فكرت أكتب كل اللى عايزه أقوله فى تعليق على البوست اللى فات لكن لقتنى مفروسه ومتغاظه جدا وأنا بأرد على مدام شمس النهار قلت لازم أكتب بوست كامل أعبر فيه عن غضبى.

 من زمان وأنا كنت عايزه أكتب بوست عن المشهد ده من الفيلم بس نسيت وإفتكرت دلوقتى لما دخلت وعلقت عليه  ولو إنى أصلا كنت حاطه الفيديو عشان العريس اللى فى الفيلم ده فى شبه كبير بينه وبين( الكارثه رقم 58) مش فى الشكل طبعا لكن فى المضمون لكن مايضرش أعلق عليه برضه أهم كلهم عاهات زى بعض .

المشهد ده بيقول حاجات كتير قوى يعنى فى الأول البيه ده أول مادخل البيت كان منمق  وراقى وبياكل بالشوكه والسكينه وبيمسح شفايفه بمنتهى الرقه ومافيش فيه غلطه وعزمها على العشاء وراح محل فخم كمان يعنى أكيد مش بخيل وبيتكلم بكل رقه ورومانسيه وبعد كده ظهر على حقيقته بصوته العالى وأفكاره المتخلفه  البعيده كل البعد عن الرقى زى النوعيه التيييييييييييت اللى بتورد عليا.

لكن على مين هى هنا كانت أذكى منه أوى من كتر الللى شافته وعدى عليها بقى عندها خبره زى حالاتى وعشان كده حاولت تستخدم البادى لانجوتش وتحط  إديها فوق إيده عشان تبقى إيديها هى اللى فوق وتكون هى اللى مسيطره عشان لو ماتضايقشى من ده يبقى ممكن يكون رجل بيثق فى نفسه ومش فارق معاه وهو متأكد إنه مسيطر حتى لو إيديه تحت إيديها وبقول ممكن لأن ده مش قاطع فما كان من الغبى غير إنه طلع إيديه هو فوق عشان يحس إن هو اللى مسيطر يعنى ماسمحلهاش إنها حتى تحط إيديها فوق إيده والحركه دى تدل على ان هو رجل مسيطر وديكتاتور وأظن ده بان بعد كده لما طلب منها انها تديه مرتبها بالكامل وتفرش الشقه بالكامل وانه لازم يعرف كل كبيره وصغيره فى البيت وتبيع عربيتها يعنى يحرمها من أى إستقلاليه.

أوعوا تقولوا ده هبل لأ كل حاجه مهما كانت صغيره بتدل على شخصية العريس زى مثلا لما يكون رايح يتقدم وهو لابس صندل ده يترفض من على الباب أنا مكلفشى خاطرى اصلا ادخل اقابله يعنى هاتقوله يعنى إيه صندل هو ده معناها إنه وحش هاقولكم أه أنا أعنس ولا أتجوز رجل لابس صندل ده بيدل على حاجات كتيييييييييير جدا فيه شخصيته

هى حركه صغيره بيعملوها بعض البنات اللى بقى عندهم خبره من كتر ما مر عليهم من عاهات زى مثلا لما بنت بتسأل رجل إذا كان معندوش مشكله إن مراته هى اللى تسوق وهو يقعد جنبها هو إمتحان صغير ومش هاتعرف منه حاجات كتير ونتايجه كمان مش هاتكون قاطعه وأكيد الجوازه مش هاتبوظ عشانه لكن ساعات بيدى إنطباعات معينه للبنت وأكيد بتتأكد منها بعدين. 

أنا شخصيا بحس إن الرجل اللى بيضايق إن الست هى اللى تسوق وهو يقعد جنبها بحس إنه مش بيثق فى نفسه كفايه وكأن سواقتها هاتنقص من إحساسه برجولته وإن الرجل لو ماكنش عنده مشكله إن مراته تسوق بحس إنه بيثق فى نفسه وممكن يكون شخصيه قويه كمان ومش فارق معاه إن مراته تسوق ومتأكد إن ده مش هاينقص من رجولته فى شىء ومش معنى إنها هاتسوق العربيه يبقى هى اللى هاتسوق الحياه كلها وهاتكون هى القائد.

عموما نرجع للفيلم تانى الأستاذ المحترم اللى بيقول يا حبيبتى وإسمحيلى أقولك يا حبيبتى أوففففففففففففففففففففففففففففففففففففففف جمله سخيفه بسمعها من عرسان كتير وأخرهم الكارثه رقم 58 وكل شويه يقول حبيبتى ويعتذر عنها حبيبتى ويعتذر حاجه تقرف بجد لما هو شايف إنه مايصحش يقولها بيقولها ليه وعموما هو بطل يعمل كده من ساعة ماطلبت منه إنه يإما يقولها ومايعتذرشى يإما مايقولهاش أصلا.

أوففففففففففففففففففففففففففف كلهم صنف واحد

ماعلينا

الأستاذ المحترم عايزها  تفرش الشقه بالكامل و تلتزم بالحجاب وتبيع عربيتها وتعمل شغل البيت لوحدها وياخد مرتبها كله وتخدم مامته لما تيجى تزورهم من غير مايفكر فى البهيمه اللى هايتجوزها وطلباتها وإحتياجاتها وده كله قصاد إنه هايكون جوزها وكأنه بيمن عليها إنه هايتجوزها وبيعتبر ده فى حد ذاته شرف هايمنحه ليها وكفايه عليها  تشيل إسمه بجد مش فاهمه الناس دى عايشه فى الدنيا إزاى وبتفكر إزاى معقوله فى ناس بالعقليه المتخلفه دى.

وطبعا هى لما حاولت تربيه طلعت سيجاره من شنطتها ومش كده وبس دى قامت عشان تولعها من (رجل) وهى متأكده فى قرارة نفسها إن الشخصيه دى بالعقليه دى ماينفعشى معاها التصرف ده وأكيد هايصدم لكن هى قالت لنفسها إن الجوازه كده كده بايظه والله بتفكرنى بالبنطلون الجينس الضيق اللى لبسته وأنا رايحه أقابل الكارثه رقم 58 للمره للتانيه مع علمى إنه بيحب الإلتزام  يوم ماكتبت بوست

 (وقعته سووووووووودا)كنت ساعتها برضه بايعه القضيه.

إلى اللقاء مع العريس رقم 59

فيلم إتفرسى يا شهرزاد قصدى (احكى يا شهرزاد)

نداء لكل المدونين

ياساده يا مدونين:

إيه بقى ولا كأنى كتبت بوست ولا حاجه ولا حد يعلق على بوست (نهاية العريس رقم 58 )ولا حد يحتفل معايا بإنه مشى فى ستين سلامه

ماحدش قراه ولا ايه؟

مانتوا كل شويه تدخلوا وتسألوا عملتى إيه ؟

دلوقتى خلاص الكل نفضلى معناه ايه السكوت ده كان عاجبكم ولا ايه ؟

لسه حاسين انى بتأمر ؟

ماهو حاجه من الاتنين يا ما قريتوا البوست ومالقتوش حاجه تقولوها غير مصمصة شفايفكم وطبعا دى مش هاتنفع تنكتب 

يا اما شايفين انى بتامر ومالكوش نفس تعلقوا لانكم زهقانين منى 

ناقشونى من فضلكم دى بقت قضية رأى عام