الاثنين، 6 ديسمبر، 2010

هدنه مابين عريس وعريس


هدنه مابين عريس وعريس


بصراحه ماقدرشى أنكر إنى بتنفس الصعداء كل ما إنتهى موضوع جواز مش عشان الموضوع مش بيبقى عاجبنى بس وإنما عشان ساعات بحس إن جزء منى مش عايز يتجوز ونفسى أعيش فى حريه وكلمة حريه مش بعنى بيها إنى عايزه أمشى على حل شعرى لكن إنما مايبقاش عليا قيود يعنى أكيد لما أتجوز كل حاجه هاعملها أكيد هاتبقى وفقا لمزاج البيه.

,كل مابشوف أصحابى مخنوقين إزاى بحس إنى فى نعمه يعنى لما بشوف اللى جوزها بيحدد لها تتفرج على إيه فى التلفزيون وماتتفرجشى على إيه ولما بشوف اللى جوزها مانعها تخرج مع أصحابها نهائى واللى جوزها  قفلها الأكونت الخاص بيها على الفيس بوك واللى جوزها مانعها تمارس أنشطتها الطبيعيه اللى بتحبها واللى جوزها شارط عليها تلبس عبايات أو نقاب أو إسدال أو اللى جوزها مانعها تعمل حواجبها وغيرهم كتير لما بشوف ده كله بسأل نفسى لو ربنا وعدنى بجوز من النوعيه دى هاتبقى حياتى شكلها إيه وهاستحمل الخنقه دى إزاى وأنا بطبيعتى مش بستحمل الخنقه دى ومش بحب حد يجبرنى على حاجه يبقى الحياه هاتبقى شكلها إيه

صحيح هو مش كل الرجاله كده إنما دعونا لا نغفل أنا الرجل هو الطرف الأقوى فى العلاقه يعنى مهما إدعى إنه ديموقراطى فهو فى قمة الديكتاتوريه ومهما إدعى إنه متحضر فهو فى فى قمة التخلف وعلى فكره مش بعمم بس النماذج دى موجوده عشان كده خايفه على حريتى من الجواز أصل مش شرط شريك حياتى يكون رجل متفهم ومثقف ويحتوينى ويرفع منى ويخلينى أحسن ممكن أوى يكون عقد وكلاكيعو وبيدور على واحده يطلع عقده عليها يبقى ساعتها إيه الحل بصراحه بحس إن ربنا عالم بحالى وعارف إنى فى حاجات مش ممكن أستحملها وربنا بييدى كل واحد على قد طاقته وعلى حسب اللى يقدر يستحمله.

عموما كنت فاكره إنى هأقعد كتير لحد ماستنى العريس رقم 85 أصل الأيام اللى فاتت دى كان عندى فترة كساد بس الفتره دى عموما بتعدى على كل بنت إنما الفرق بين العريس رقم 57 والعريس رقم 85 ماكنشى كبير وهاشوفه بكره إن شاء الله.
هاااااااااااااااااا يا مسهل 
,يا إما هاجى أتكلم عن الكارثه رقم 85 ويبقى طبق الأصل العلقه الأولانيه وعلى نغمه واحده ماخدوش يا بابا ماخدوش يا بابا ماخدوش يا بابا.

أو هايطلع مناسب جدا ويبقى كفى المؤمنين شر القتال  وإتمخترى يا حلوه يا زينه ومبروك عليكى عريسك الخفه ماحلاه شوال وجنبه أوفه.

أو يطلع موضوع خنييييييييييييييييييييييييييييييييييييييييييييييييق من المواضيع التقيله اللى على قلبى اللى لازم أدى فيها لنفسى فرصه تانيه.

يالا تصبحوا على خير هاضطر أأقوم أنام بقى عشان أجهز للإنترفيو بتاع بكره

8 التعليقات:

P A S H A يقول...

احم احم
يا ساتر
ممكن أعلق ؟
أولا مبروك ع المدونة
ثانيا أسلوبك هايل بجد أحييكي عليه بسيط وعفوي ودمه خفيف مش متكلف حاسك بتكتبي بطبيعتك وده جميل جدا
ثالثا ٥٨ ؟
ده انتي غلبتيني يا بنتي ؟
ههههههههه طبعا قبل ما ارتبط والحمد لله
رابعا كله مكتوب كله بأوان دي جملة من بوست عندي اسمه قدر اتمنى يعجبك
خامسا ربنا ييسرلك الحال ويرزقك الزوج الصالح إن شاء الله آمين
سادسا ابقي عرفينا نتيجة كشف الهيئة
سابعا تشرفت بالمرور خالص تحياتي وعميق احترامي وتقديري
‏:) ‏

bombona يقول...

ميرسى أوى على تعليقك ومرورك الراقى يا باشا وعلى فكره انا دخلت على مدونتك الاول ومستغربه انت ليه مش فاتح التعليقات هو انا ماليش نفس اعلق يعنى ذيك؟ وعموما مدونتك جميله جدا وشعرك الساخر عجبنى وخصوصا

ماشيه بضهرك

معجبه إنك

ما بتقعيش !

خلليـــــــــكي

تايهه ما بين أحلامك

ولا تصحيش !
مش عارفه ليه حاساك بتكلمنى هههههههههههه
عموما اكيد هاتعرف نتيجه كشف الهبئه قريب

P A S H A يقول...

بمبونه
اتفسحت في مدونتك بعد إذنك حاضرني حاجة كانت دايما بتحيرني وانتي فكرتيني بيها هنا التعبير عن الذات كنت -قبل ما ارتبط- باتنشق يا بنتي على واحدة تكون (مدركة) وعارفه تعبر عن نفسها واحدة عارفه قيمتها وسقف حدودها وعارفه هي إيه وبالتالي تستاهل مين . بس عارفه ؟ أقوللك حاجة ... نصيحة لوجه الله تعالى ... عبري للراجل -بس اختاري الأسلوب - واضحكي ع الذكر فاهماني ؟
أي راجل جواه عيل صغير وأي بنت جواها أم الذكاء ... امتى البنت تصغر للراجل وامتى تضم العيل ؟
مش خداع ولا تمثيل سميه تقدير إنساني لشخص مفترض إنه يكون زوجك وصدقيني إحساس حلو قوي لما تحتوي كيان بشري اسمه راجل هاتشوفيه ساعتها على حقيقته وهاتشوفي كمية البراءة اللي جواه . الراجل للأسف لما بيفتكر إنه بيحتوي الست اللي قدامة بيبقى ف الغالب من منطلق ذكوري نادرا ما بيكون ناضج كفاية ليكون أب . كمان الحب عطاء لما تدي -للي يستحق-ما تستنيش مقابل لمشاعرك وهاتحسي بفرحة حقيقية لإنك تغلبتي على نفسك وأنانيتك وبقيتي كبيرة ... أم :)
صدعتك بس مدونتك فتحت شهيتي للرغي
التعليقات مفتوحه عندي ومتشكر لذوقك
سلام

bombona يقول...

طبعا كلامك مضبوط 100% ولو ان غريبه انك يكون ده رأيك وانت راجل وصدقنى انا اتعلمت اعرف اعبر كويس ومافيش حاجه تتاخد على كلامى واتعلمت كمان انى اسمع اكتر من انى اتكلم بس المشكله ان الرجل هو اللى لسه ماتعلمشى ازاى يبقى عنده الحد الادلى من النضوج ماهو كمان اكيد مش هاخد عيل خالص ونفسى تقرأ اخر جزء فى اول بوست بدقه وانت هاتفههم انا قصدى ايه وللحديث بقيه

شمس النهار يقول...

عجبني البوست جدا
وكمان عجبني الحوار الراقي الجميل بينك وبين باشا

وضحكت جدا علي كلمة عندي انتر فيو بكرة

ياما البنت بتشوف وبتتشاف علي مايجي ابن الحلال
اللي ربنا كاتبه

وانا معاكي ياتتجوزي اللي يستاهل يابلاش
بس دايما استخيري قبل اي شئ

هروح بقا اتمشي في المدونه بتاعتك شويه

bombona يقول...

شرفنى مرورك جدا واتفضلى اتفسحى زى مانتى عايزه دى مدونتك و مبرسى على تعليقك اللطيف وعلى فكره انا اللى بعمل الانترفيو مش هما ههههههههههه صدقينى احنا اللى بنختار و يا ريت تتابعينى

موناليزا يقول...

ان شاء الله نفرح بيكى قريب
على فكرة انتى بتقولى الكلام ده لان لسه ماجاش النصيب
اول ماالنصيب ييجى هتلاقى نفسك ساكتة تماما والموضوع ماشى بطريقة هتستغربيها بعدين:)

bombona يقول...

ميرسى اوى يا موناليزا وكلامك مضبوط طبعا وانا فاهماه كويس بس المشكله الناس التانيه هى اللى تفهم وعلى فكره انا متغاظه منك لانى عجبانى حاجات كتير فى مدونتك ونفسى اخدها واحتفظ بيها لكن انتى عامله احتياطات امنيه ماشى يا ستى

إرسال تعليق