الأحد، 1 يناير، 2012

فضفضه من القلب مباشرة


طبعا ماكتبتش عن العريس ال66 لأنى زهقت وطهقت من كتر الكلام وحتى ان الناس اللى بتقرأ الكلام نفسها زهقت منى وبتقول 
ايه البت دى هى فاكره نفسها إيه ؟
ماحدش عاجبها ؟ 
نجيبلها يعنى واحد من زحل ولا المريخ ؟ 
عموما انا مش هارد عليكم:(
بس عايزاكم تسألوا نفسكم سؤال واحد 
,لو العريس كويس وعدل هارفضه ليه ؟ 
وهاتريق عليه ليه ؟
غاويه اطلع القطط الفطسانه فى ولاد الناس ؟
ولا مش عايزه اتجوز ؟
والله عايزه اتجوز 
بس حد يملى عينى وقلبى مش حد سطحى وتافه او على طول فى صمت رهيب زى الأخ ال66 ؟ 
عايزه حد مامشيش معاه فى الشارع وانا مكسوفه منه او من شكله او من مظهره ,واحد ماعرفهوش بحد وانا حاطه ايدى على قلبى لاحسن يكسفنى بتافهته وعدم لباقته ,
عايزه واحد يحتوينى ويهتم بيا ويطبطب عليا
انا كده بتأمر ؟ 
أنا كده طلباتى كتير ؟ 
على فكره نسيت أقول لكم كل سنه وأنتم طيبين ويارب السنه الجايه إن شاء الله تشوفونى فى بيت العدل بكسر ال ع 

3 التعليقات:

شمس النهار يقول...

لو مستنية حد يحتويكي ويطبطب عليكي
تبقي مستنية السراب
حتي لو عمل كده في الاول
مش هيستمر
احنا في زمن لابقا حد يحتوي ولا يطبطب
دوري علي الانسان المعتدل الطيب الراااااااااجل
المتدين في غير تشدد
وان شاء الله خير

bombona يقول...

شموسه :
إيه الإحباط ده :(
يا ستى وايه يعنى لو عمل كده فى الاول وبعد كده يتغير بس على الاقل يبقى فالح فى التمثيل مش دهولل ؟؟
عموما كل سنه وانتى طيبه وادعيلى يا اما اتجوز يا اما اكملهم 70:)

Mohamed Amer يقول...

كل سنه وانتي طيبه
ان شاء الله قولي يارب وتبقي في البيت اللي انتي عايزاه

إرسال تعليق