الاثنين، ١٦ يناير ٢٠١٢

الكارثه رقم 67



أول عريس فى السنه الجديده بس بصراحه ماشفتوش وهأقولكم ليه؟
 نبتدى نحكى حكايته
  أول ما قريبتى كلمتنى فى التليفون وقالت لى إنها جايبالى عريس إكتئبت
 أصل سيرة العرسان بقت تجيبلى إكتئاب بعيد عنكوا وبالرغم من إنى أخر مره دعيت ربنا
يا إما أتجوز يا إما مايبعتليش عرسان تانى لكن برضه جالى العريس ده
 ده اكيد ابتلاء
عموما انا ماكنتش مهيئه اطلاقا بعد العريسين اللى فاتوا انى اشوف حد تانى حاليا ماهو مش كله ضرب ضرب كده عايزه اخد هدنه شويه المهم عرفت مواصفاته بس وطلبت منها انها ترحل الميعاد اللى هاشوفه فيه كمان اسبوعين عموما هى مواصفاته كالأتى:
( شاب يبلغ من العمر 37 عاما بيعمل محاسب فى النيابه والى جانب ذلك لديه تجاره يديرها, والده متوفى ووالدته كانت تعمل موجهه فى التربيه والتعليم ولكنها بالمعاش الأن وهو وحيد والدته )
بالرغم من انى لوهله توجست خيفه من( شىء معين) فى المواصفات دى  لكنى طنشت مؤقتا لحد ماشوف اخرتها المهم اقلت لقريبتى انى هاحدد لها ميعاد اشوف فيه البيه بعد اسبوعين ولكن قريبتى كلمتنى بعد يومين وقالت لى على المعلومه اللوذعيه اللى انا كنت خايفه منها أو بالأحرى عامله حسابها
هى ايييييييييييييه بقى ؟
إن مامته هاتعيش معانا بعد الجواز طبعا  
بالمناسبه الشىء بالشىء يذكر انا اتقدملى عريس بالظروف دى قبل كده  3 مرات وبرضه رفضته وكل مره كان بيتقدملى عن طريق حد شكل من اصحابى ومعارفى
كمان افتكر كويس انى فى واحد كان ناشر مشكلته فى  الجرنال وبيقول انه عايز يتجوز بس مشكلته ان ماحدش بيرضى بيه بسبب ان مامته هاتكون قاعده معاه
 هى مشكله فعلا ولكن المشكله المره دى مش فى العريس ولكن فى العروسه يعنى لو جينا طبقنا ده على تجربتى هنلاقى المشكله فيا انا مش فيه
اكيد هوعلى راسى انه بار بمامته كده وده يدل على انه رجل ومحترم فى زمن انعدمت فيه الرجوله وعلى عينى وعلى راس اللى خلفونى ماقلتش حاجه لكن انا اللى غير مناسبه لانى استحمل الظروف دى لانى مش شخصيه حموله ولا بنت بلد جدعه وتخدم
 اه مستغربين ليه انى بقول على نفسى كده ؟
رحم الله امروء  قد عرف قدر نفسه انا ماقدرشى اخدم ست كبيره فى السن
 حد هايقولى طب ماهى تقدر تخدم نفسها هاقوله طب وبعد كده لما تكبر فى السن وتبقى محتاجه رعايه زياده ؟
 واحده قالت لى قبل كده مين قال انك هاتخدميها ابنها اللى هايعمل كل حاجه ليها لانه هايكون ممتن ليكى انك على الاقل رضيتى بظروفه مش هايتعبك كمان فى خدمتها
  تخيلوا ههههههههههههههههههه
 طب بالذمه ده كلام ؟
طب اشهدوا يا رجاله ويا ستات ياللى بتقروا
هو فى رجل بيمتن ؟؟
 ههههههههههههه طب بلاش يمتن
هو فى رجل بيساعد ؟
 طبعا مش هايحصل
وانا اللى هاتدبس
طب حد ييجى يقولى : وايه يعنى ماترضى  على الاقل هاتخدى ثواب خدمتها
هارد عليكوا بسؤال معلشى استحملونى
هو انتوا لما جيتوا تتجوزوا كنتم عايزين تتجوزوا عشان تاخدوا ثواب ولا عشان تعيشوا سعداء و (بحريه ) ؟
ده غير انى من حقى اعيش فى حريه والبس اللى انا عايزاه  من غير مايكون فى رقيب عليا
 يبقى ارفض لانى انا اللى لا اصلح له ؟
ولا اقبل واشرط عليه انه يودى مامته دار مسنين؟
او اقبل واقصر فى خدمتها او ازهق و اخد ذنوب بدل ماخد ثواب؟

2 التعليقات:

P A S H A يقول...

طالما عارفه إنك مش هاتتقبلي الوضع ده من أوله يبقى خلاص ما فيش نصيب .. لأن م الآخر دي حياتك وانتي اللي هاتعيشيها وانتي الأدرى بيكي وباللي يناسبك .. بس هل ما فيش إحتمال ولو واحد في المية إنه يطلع شخص كويس فعلاً هو ووالدته وإنها تعاملك زي بنتها ؟؟ .. نفرض مثال تاني : اتجوزتي شخص ما في شقة لوحدكم وحصلت أي مشكلة والشقة طارت واضطرتكم الظروف تقعدوا مع أهله هل هاتطلبي الطلاق عشان عاوزه شقة لوحدك ؟ افرضي شقة أهلك هي اللي وقعت وجم يقعدوا معاكم هاتحبي أنه يطردهم ؟؟
أعرف واحد اتجوز مع والده ووالدته في شقتهم وحصلت مشكلة في مرة بينه وبين مراته والله العظيم أمه طردته من الشقة عشان خاطر زعل مراته وقالت له : دي أحن عليا منك !
أعتقد إن الموضوع لو اتحسب من أوله على أنه تضحية ما حدش هايوافق ، خاصة إن لسه ما فيش عشرة تخللي حد يقدر يحكم على الطرف التاني إذا كان يستاهل ولا لأ ؟؟

وصدقيني فيه (رجاله) كتير بتمتن وتقدر وتساعد ،، لأن ده المفروض .. مودة ورحمة :)

تحياتي

مذكرات موززه عانس يقول...

مع احترامى الشديد لرأيك يا سعادة الباشا ماهى المشكله مش فى انها تعاملنى كويس او وحش انا وضحت ان المكشله انى ماقدرشى على رعايتها
اما بالنسبه للمثال التانى عايزه اقولك ان فى الحاله دى نصيب يعنى قدر الله وماشاء فعل وهارضى بعد الجواز طبعا انما مش ابقى عارفه ان فى حاجه هاتنكد عليا بعد الجواز ومع ذلك امشى فيها واكملها فهمتنى ؟

إرسال تعليق