الاثنين، 5 نوفمبر، 2012

تابع الكارثه رقم 75




 
بعد ماقفلت السكه معاه كنت متنرفزه اوى وقعدت اقول لنفسى هو منرفزنى دلوقتى وحاططنى فى مود مهبب اومال لما يتجوزنى هايعمل معايا ايه ؟
كمان عايز ياحد ضمانات لكل حاجه ومش عايز يدينى اى ضمانات لاى حاجه 
مع انى اصلا ماطلبتش ضمانات
 وساعتها ضحكت اوى لانى افتكرت الحته دى من الفيلم وحسيت انه هو عامل زى حسين الامام لما سألته سوسن بدر طب انت بقى هاتقدملى ايه ؟
قالها : هابقى جوزك !!!!! 

وكأنه بيمن عليا مثلا او ان ال74 واحد اللى قبله اتمسحوا بأستيكه وكنت انا بقى قاعده مستنيه حضرته ييجى يلمنى
المهم بعد ما اتفقنا تانى يوم انه هايتكلم ماتكلمشى فضلت ادعى ربنا انه هو اللى يقول لأ عشان الزن اللى على ودنى وعشان ماحدش يقولى انتى بتتأمرى
 وفعلا ماتكلمشى ولكن ليلا قلت اتصل واعمل اللى عليا لاحسن يكون زعل ماهو برضه لازم اكون زوق بالرغم من اى حاجه
قام ماردش عليا انبسطت زياده وقلت ياما انت كريم يارب :) معقوله يكون زعل وطهق وزهق وغار فى  داهيه ؟ 
المهم قلت بلاش اقاطع
 وتانى يوم جانى الخبر اليقين ان صاحبه كلم طنط منال الوسيطه بيننا وقالها ان كل شىء قسمه ونصيب ولحد كده كان قشطه
( بالرغم من انى اتضايقت انه فى كلامنا مع بعض وعدنى انه لما رأيه يبقى بالسلب او بالايجاب هايقولوا ليا انا فى وشى مش لحد تانى وانا وعدته بنفس الشىء) وكان الموضوع ممكن ينتهى ولكن اللى خلانى اكشر عن انيابى انه اتبلى عليا وقال انى قلت حاجات ماحصلشى انى قلتها زى انى سألته عن مرتبه ودى اخر حاجه ممكن اتكلم فيها وقال انه لما سألنى عن مرتبى مش رديت اقوله مع ان الجهه اللى بشتغل فيها معروف مرتباتها وكمان انا مش قليلة الذوق عشان اقوله وانت مالك
 ده غير انى ماعنديش مشاكل اقول مرتبى اصلا لأى حد 
وقال انى قلت له :فيه حد يتصل فى وقت زى ده ؟ وده ماحصلشى 
المهم ان عفاريتى طلعت وكل قلة الذوق اللى حوشتها طول الايام اللى فاتت  واظهرت بدلا منها ادبا واخلاقا عاليه
 ظهرت كلها مره واحده بس على هيئة قلة ادب :)

 ماحستشى غير وانا ببعتله رساله مكتوب فيها الاتى :
 (المفروض انك وعدتنى كا (راجل ) انك لما يكون ليك تعليق بالسلب او بالايجاب عليا تقولى فى وشى وانا كمان وعدتك تقوم برضه توصل ردك بل ونقدك ليا عن طريق صاحبك اللى كلم طنط منال ؟ 
عموما انا مش مستغربه نهائى من كده لأن الشخص اللى يبقى كداب وبيتبلى عليا ويقول كلام ماحصلشى من السهل عليه يقول اى حاجه وعموما انت اصلا معجبتنيش من الاول وماكنتش قبلاك وهما اللى ضغطوا عليا عشان اشوفك مره تانيه وكنت بطلبها من ربنا انك تقول انت لأ عشان اخلص منك وعموما انا الكسبانه انى مش مضطره اتجوز واحد عايز باصص لفلوسى ومرتبى من قبل مانتجوز) :D
يتبع .....

5 التعليقات:

P A S H A يقول...

ما كانش ليهم لازمة الكلمتين الأخرانيين دول طالما ما فيش نصيب .

Tamer Nabil Moussa يقول...

مدام طماع كدة بلاش منة

انا موجود ههههههههههه


ازيك اخبارك اية

مع خالص تحياتى

مذكرات موززه عانس يقول...
أزال المؤلف هذا التعليق.
مذكرات موززه عانس يقول...

سعادة الباشا :
وكان لزوم الكلمتين الفارغين اللى قالهم فى حقى ايه طالما مافيش نصيب :)
البادى اظلم

مذكرات موززه عانس يقول...

تامر :
الحمد لله انا كويسه
مهما امتدت ايدى الحاقدين بالأذى :)

إرسال تعليق