السبت، 3 نوفمبر، 2012

تابع الكارثه رقم 75






انا كنت وقفت لحد فييييييييييييييييين ؟ 
مممممممممم اه
 لحد مامشى واخد رقم التليفون 
فوت يوم مكلمنيش مش عارفه ليه
 وكلمنى تانى يوم ومكالمته كانت مفاجأه زى القضا المستعجل كده :(
مش قابلاه لدرجة انى ماكنتش قابله اسمع صوته فى التليفون
 بس والله كلمته بمنتهى الذوق 
اصل انا عندى ميزه مهما كنت متضايقه من العريس برضه بعامله بذوق
 المهم فضلنا نتكلم وبرضه بنتحاور فى نفس ال3 مواضيع اياهم
 1- الشغل
 2- النقاب
 3- مصروف البيت اللى هساهم فيه :((
المهم فضلنا نتكلم لحد ماجبتلوا من الاخر لانه زهأنى فى عيشتى ورديت عليه فى ال3 حاجات رد نهائى
 بخصوص الشغل قلت انى مش هاسيبه الا لما احس انه جاى على حساب بيتى وبخصوص النقاب مش هالبسه ابدا لانى بكرهه ومش مؤمنه بيه ثم انى مش شايفه انى رائعة الجمال لدرجة انى البسه وهو مش فرض اصلا 
وبخصوص مصروف البيت دى حريه شخصيه واعتقد ان من حقى اساهم او لأ 
ثم انا ملزمه منك والمفروض تصرف عليا واللى ليك عندى انى مش ارهقك بطلبات فوق مستوى الماديات بتاعتك
 ولو عايزه حاجه غاليه اجيبها انا من مرتبى
 الاقيه بيرد يقولى خلاص الست طالما مش هتساهم فى مصروف البيت تبقى تقعد من الشغل احسن !!!!
انا نفسى افهم كل حاجه فى الجوازه عايز يضمنها قبل مايتجوز ليه ؟!
 يضمن انه لو قالى سيبى الشغل هاسيبه وانى لو قالى البس النقاب هالبسه وانى هشارك فى مصروف البيت 
وانا فى عقل بالى كان نفسى اقوله وانت وحياة امك ايه ضمانتك ليا ؟
يعنى ممكن انت كمان تضمنلى ان كرشك ده تنزله بعد الجواز ؟ 
ولا انك تكون طموح ؟
ولا انك ماتشتمنيش او ماتزعقليش او ماتمدش ايدك عليا او ماتتجوزشى عليا؟ 
ومش طايقاك ومع ذلك ماحاولتش اخد منك اى ضمانات لاى حاجه وانت قاعد تتشرط عليا ؟
بقمارة ايه يا روح ستك؟
عموما كل ده كان فى بالى وماخرجشى منه ولكن بس اللى قلته 
انا كمان من حقى اعرف اذا كنت هاتنفذلى اللى انا عايزاه ولا لأ ؟
يقوم يقولى (انا الراجل انتى اللى لازم تسمعى كلامى واكون انا اللى مسيطر )
راجل شرقى مصرى بكل الاوبشن بتاعته ولسه بورقته بمخه المليس ههههههههههههههه
ودهولل لدرجة انه حتى مش بيحاول يخبى ده او يصطنع انه متحضر او حتى يمثل لحد مالجوازه تتم زى بعضهم
 بس عموما انا عرفت سبب كل ده ايه ؟      
المهم ان عند الحديث عن مصروف البيت  ابتدا صوتى يعلى وابقى حاده فى كلامى وهو قالى بمنتهى الفلح بكسر الفاء انتى بتزعقى كده ليه ؟
فكرت اجيب ضلفها واقوله اه بزعق لانك مستفز وبعدين قلت يابت عيب استنى شويه يمكن يزهأ هو لوحده ويغور وخلينى انا برضه مؤدبه :)
رديت عليه بمنتهى الادب  والرقى وقلت له مش بزعق ولا حاجه انا بعلى صوتى عشان انت حواليك زحمه ايه رأيك لو نقفل دلوقتى ونكمل بكره عشان انا شايفاك تنشنت يقوم يرد عليا الجلانف يقولى (انا لسه ماخلصتش كلامى )!
قلت له بمنتهى الادب والرقى برضه (على غير العاده) : طب اتفضل خلص كلامك يقوم يرد بقلة ذوق ويقولى ( يعنى ايه هاكلم نفسى ؟!
اتكيت على سنانى وقلت له بهدوء 
(طب انت مش عاجبك كده ولا عاجبك كده ؟ ايه الحل ؟
راح قالى خلاص نكمل كلام بكره حسيت من كلامه انه عايز يقفل بس مشكلته انه هو اللى ياخد القرار :)
عشان هو الرجل :)
 زى مافضل طول المكالمه يقولى انا الرجل ... انا الرجل ولازم اكون مسيطر 
(عينه من المجتمع الذكورى المتخلف اللى متخيل ان الراجل راجل بصوته العالى وسيطرته مش احتوائه ورقيه وتحمله المسؤليه 
وبكده خلصت المكالمه وفضل جوايا سؤالين 
ليه هو عايز يضمن كل حاجه كده وليه بيركز على حاجات مش وقتها خالص نتكلم فيها ؟!
عرفت الرد على السؤالين دول مش منه ولكن من اللى بلتنى بيه 
اصلها كانت المكالمه الاولى والاخيره الحمد لله :)
يتبع .....

3 التعليقات:

شمس النهار يقول...

كويس انك خلصتي منه :)

الست حشَرية يقول...

النوع المهبب دة عدى عليا كتير واخر واحد كان فى الصيف اللى فات .. بردو بيقوللى لازم تدفعى النص فى البيت او انك تسيبى الشغل ,, ومتروحيش تزورى اهلك اعتبرى نفسك فى السعودية ..( مع العلم ان بيت اهلى جنب شغلى تماما ) .. و لما لقيته كدة قولتله طيب شروطى هتكتب فى القايمة.. قال مش ماضى عليها و هحرجك .. ومش راضى يعمل فرح ولما قالوا نروح شرم الشيخ بدل الفرح قاللى يبقا باباكى يدفع فيها ,, والى يشوفه كدة يقول شايل الجهاز كله .. دة كان زبالة

مذكرات موززه عانس يقول...

الست الحشريه :
عريسك ده كمان بيفكرنى بالمشهد بتاع سوسن بدر فى احكى يا شهر زاد لما قالت له يا راجل يا عره هههههههههههههههه

إرسال تعليق