الخميس، ١٨ أكتوبر ٢٠١٢

الفقى لما يسعد

طبعا هى حصلت معايا اكتر من مره ان عريس يدخل على عريس
وفى الحقيقه انا مش باعتبر ده عيب او حرام 
اه 
الغايه تبرر الوسيله 
وطالما الغايه انى اتجوز واتستر يبقى 
ليييييه لأ ؟
وعموما ماحدش من الاتنين هاينجرح لو رفضته 
انا اصلى الرجاله مش بتصعب عليا اصلا 
اللى بينجرحوا ويتشحتفوا هما  البنات يا عينى   
 المهم ان العريس رقم 75 دخل على العريس رقم 74
 هاعمل ايه
 الامر لله 
ولو انى مش بعرف اركز فى حاجتين فى وقت واحد بس مضطره للاسف لسبب بسيط لان عقبال ما استنى موضوع العريس رقم 74 يخلص الاول وبعدين ابدأ فى غيره يبقى ربنا يدينى طول العم
ر ده احنا لسه اصلا محددناش ميعاد عشان نقدر نتقابل على النت وندردش
  هو قاعد فى امريكا وانا قاعده فى مصر وفرق التوقيت بين اكلاهوما ومصر 9 ساعات وعقبال مانظبط معاد يراعى فروق التوقيت هايكون جالى الضغط 
عموما هو مصر بضم الميم انه يتكلم انجليزى لحد دلوقتى مش عارفه ليه بس عموما بكره انا هاخليه بيتكلم عربى لبلب ولا بتوع بولاق 
اما بالنسبه للعريس رقم 75 هاقابله بكره:D
يتبع .....

7 التعليقات:

محمد سلامة يقول...

هزرنا كتير وضحكنا كتير نتكلم جد شوية :)
انا مش عاجبنى نظرتك للرجلة نهائى
حتتجوزى ازاى وانتى باصة لهم كلهم نفس النظرة
بإختصار شيفاهم مبيحسوش
أنا مش ضد إنك تشوفى التانى مع الأول
بس منطولش يعنى مينفعش أكلم ,اقعد خمس مرات مع ده وفى نفس الوقت خمسة مع ده ، دول بنى أدمين برضه ولو ربنا كتبلك واحد فيهم وعرف متبقاش حلوة
أه ولسة فى رجالة بتنجرح وبتحس مش كتير بس فيه :)

مذكرات موززه عانس يقول...

مسلم:

انا مبسوطه اوى انك بتنقدنى بمنتهى الادب والرقى ودى غريبه مع انك راجل :P
نتكلم جد بقى تفتكر انى بعد سلسلة الكوارث دى مش هايكون عندى خبره مع الرجاله وابقى فهماهم كويس ؟ :)

شمس النهار يقول...

ربنا معاكي
:))
عموما انا بحب رقم 75
يمكن تظبط معاكي:))

باحث عن حب يقول...

بصى بعد كل ده
نقول
وندعى
ان يسترك الله بمن هو اهل لكى وبمن تكونين انتى اهل له

momken يقول...

.....

يعنى خمسه ويبعين لقاء زواج ليكى لوحدك
ولا حد من اصحابك كمان؟؟

لو الخمسه وسبعين دول مكنوش عجبينك يبقى متتعبيش نفسك
لان سقف مطالبك هيعلى ومستوى اختيارك هيرتفع
كمان هيكون عندك اشكاليه انك متقدريش مثلا تقبلى رقم 75 وهو صوره طبق الاصل من رقم سته لانك هتندمى وقتها على الوقت الى مر والعمر الى ضاع
وتنازلاتك وقتها هتكون مستحيله

انا متابع ومنتظر

تحياتى

.....

غير معرف يقول...

أنت معندكيش أخوات صبيان ؟

Nehal Mohamed يقول...

أنا عاوزة أعرف إنتى إيه اخبارك دلوقتى

إتجوزتى ولا لســــــــة ؟؟؟

إرسال تعليق