الاثنين، ٢٢ أكتوبر ٢٠١٢

أسوأ انواع الكوارث


ذات مومنت لما ييجى عريس زى مابيقول الكتاب ( لقطه) وكل اللى حواليا عاجبهم وانا مش قابله امه :D
بحس ان عندى (مس العشق) على رأى الشيخ مجدى  :)

 
 انا مش مبسوطه :(
 وزهقت بقى انى مش لاقيه اللى فى خيالى :(
مع انى طلباتى مش كتير ومش خياليه 
بس هى عامله زى السهل الممتنع 
يعنى لو كنت عايزه زكيبة فلوس 
كنت زمانى متجوزه ومعايا 10 
ولو كنت عايزه اتجوز موزز
 كان زمانى دلوقتى برضه متجوزه ومعايا 10 
ولو كنت بدور على مركز
 كان زمانى برضه متجوزه ومعايا 10
 ولو كنت بدور على مستوى اجتماعى 
كان زمانى دلوقتى برضه متجوزه ومعايا 10
 ولو كنت بدور على شهادات
 كان زمانى برضه متجوزه ومعايا 10
 لكن انا مش بدور على كل ده
 انا عايزه واحد يكون ببساطه
 زيى
 بالرغم من انى من حقى اتجوز واحد احسن منى كمان بس انا بقول يبقى زيى
 فى مستوايا المادى والاجتماعى والشكلى والموضوعى والثقافى
 واقبله 
بس
 ده كتير عليا ؟
 طب بلاش زيى يبقى اقل منى بس اكون قبلاه بكل عيوبه ونقاط ضعفه 
انما الكارثه رقم 75 هى اوسخ انواع الكوارث بالنسبه لى يا جدعان
 حد مش حاسمه قرارى بشأنه يعنى لا قادره اقول لأ ولا قادره اقول اه
 نفسى اقول لأ
 لانى اول ماشفته معجبنيش ومقبلتوش لا شكله ولا لبسه ولا كرشه ولا شخصيتهحد مالوش حضور نهائى
على فكره انا مش تافهه 
عشان بقول كرشه وشكله انا عمرى ماركزت على الشكل بس لو كنت قبلته كنت شفته اجمل رجل فى الدنيا وكنت قلت كرشه ده عز
 انما انا مقبلتوش
 هو كل حاجه فيه بعد كده كويسه
 ( باختصارمحاسب فى شركة بترول ومن عيله كويسه ووالده كان لواء طيار وامه مديره مش فاكره فين وعنده 34 سنه وعنده عربيه وعماره وارض وطيب ومؤدب ومحترم ) 
 وده اللى مخلينى متردده :(
وخايفه اندم 
 وده بقى اوسخ انواع العرسان
 واكيد هاخد لى كام يوم نكد وعياط ودعاء لربنا واستخاره انه يخلينى اخد قرار ماندمشى عليه
 ده غير مشنة اللمون اللى هافضل اعصرها على نفسى طبعا كل مايكلمنى فى التليفون لحد ماخد قرار 
الامر لله 
يتبع ..

3 التعليقات:

محمد سلامة يقول...

مش حقولك بدورى على إنسان كامل
إنتى بتقولى زيى أو أقل بس اكون متقبلاه
محدش ينكر إن الكفائة مهمة وفى الشرع
بس إنتى مبتديش نفسك فرصة إنك تقتنعى بيه وبعيوبه
وقلتى لو كنت عايزة كذا كان عندى عشرة
أنا شايف بقى انك عايزة دول كلهم ينضربوا فى خلاط ويطلع واحد وده مستحيل
شوفى واحد تفكيره زى تفكيرك وعنده خلق ودين وطبعا ماديا كويس لو تفرق معك يعنى واتوكلى على الله لانكم لازم تكملوا بعض ويبقى فيه بعض الحاجات المختلفة عشان جو المناوشات الحلوة اللى بتدى للحياة طعم
رغيت كتير أسف بس أنا بقولك ده عشان عارف أى حد حيخش عندك سواء ولد او بنت حينتقد وبغباء هههههه

شمس النهار يقول...

ياحبيبتي مافيش حد زي حد
وماينفعش رجل يبقا زي ست
الست ست والرجل رجل
والحياة مافيهاش كوبي بيست خالص
لكن في تكامل
اللي ناقص عندك هو يكمله واللي ناقص عنده انتي تكمليه
المهم الاول القبول وبعد كده التفاهم والاحترام
ودي اسس الحياة السليمه
وربنا معاكي
اه
ياريت تقابليه وانت مفضيه دماغك من زي دي ودوري علي نقاط تبتدي منها
سيبك من كرشه وشكله الا لو كان غير مقبول
الشكل مهم برضوا
يعني مايبقاش دميم
يبقا مقبول علشان ده رجل مش ست ورجل عادي مش موديل ولا ممثل سينما
وربنا يوفقك

مذكرات موززه عانس يقول...

ماهو انا لو قبلته من اول ماشفته اصلا يا شموسه ماكنتش التفت للحاجات التافهه دى :(

إرسال تعليق