السبت، ١٣ أكتوبر ٢٠١٢

تابع الكارثه رقم 73








احنا كنا وقفنا فييييييييييييييين ؟
اه سلمنا ومشينا واتفقنا على ميعاد
 جه بقى اليوم الموعود وروحت للنادى انا واختى وزميلتى فى الشغل 
( منها لله اللى مدحتلى فيه )
 اتفاجئت بحاجه غريبه اوى ماكنتش متوقعاها انه جه وجاب مامته واخته معاه وكأنه بيقولى هو ده مستوايا ودى اختى والست دى امى :D
المهم اتصدمت فى مظهرهم وطريقة لبسهم ولكن فى الاول والاخر ده مستواهم والفقر مش عيب 
ولو انه غنى وعنده عربيه اخر موديل ومع ذلك مش قادر يجيب لمامته لبس شيك تحضر بيه المقابله وجايه بعباية البيت !!!!!!!

حسيت للحظه وكأنه قاصد بس ليييييييييييييه
 مش قادره افسر
 ,المهم داريت صدمتى وسلمت بمنتهى الادب ماهو انا اصلى اتعلمت انى مهما اكون قرفانه من ام العريس لكن لازم برضه اعامله هو واهله بأدب بما انى اكيد اكيد مش هاشفهم تانى :D

المهم سبناهم بقى وقعدنا لوحدنا وقعدنا نتكلم انا وهو لحد ماحسيت انه صعب عليه انى امشى متردده وقالى يخلينى اخد قرار فورى برفضه :)

1- جواز متعه من (مغربيه) (يعنى حتى مش ايطاليه او كنديه مش عشان الجنسيه واكل العيش )


2- علاقات غير شرعيه ( وتبريره اصلى انا ماقدرتش امسك نفسى )


3- اخواته كلهم دبلوووووون يعنى (مضحاش عشانهم ولا حاجه دى الشهاده الاساسيه فى العيله )

4- لابس بنطلون مقطع مش مناسب لسن الاربعين مطلقا

5- بحب الست اللى مهتميه بنفسها على طول عشان منظرى قدام الناسوالكرير اللى بشتغل فيه (ديوس )

6- حبيتك اول ماشفتك وحسيت انك كتير عليا

انا فعلا كتير عليك :D

انتهت المقابله وسلمت بأدب ومشيت وانا متأكده انى مش موافقه نهائى 
لان مافيش اى سبب يخلى الجوازه تمشى غير انى زهقت من القعده
 وللاسف ده من نوعية العرسان اللى الواحد يفضل العنوسه عنهم 
لاادب و لا اخلاق و لا عيله ولا مستوى ولا ثقافه ولا تعليم ولا شخصيه 
يبقى ليييييييييييييييييييييييييه؟
الكارثه الكبيره بقى انه تانى يوم وقبل ما أرد عليه لقيت طنط منال بتكلمنى وبتقول انه اشتكى ليها من ان احنا اتمنظرنا عليهم ههههههههههههههههههههههههههههههههههههههههههههههههههههه
طبعا اسلوب مفهوم انه عايز يسبق لانه متأكد انى هارفضه
  وانا واخده على المبادره دى لما بيكون العريس متأكد من الرفض بس كرامته وارمه حبتين 
وعلى نغمه واحده ماخدوش يابابا ماخدوش يا بابا ماخدوش يا بابا
الى اللقاء مع العريس رقم 74

4 التعليقات:

محمد سلامة يقول...

اتعودت ع الصراحة معرفش اقول غيرها
اللبس بتاعه وامه واخته مش مهم لأن لكل أناس ثقافة معينة فده مش حاجة تعيبه !!
اللى مستغرب منه فعلا إزاى يقول على زواج المتعة والعلاقات على طول كدة وفى أول مقابلة ؟!!
عندك حق فعلا ده مش يترفض ده ينضرب :)
وكمان ديوث - واخدة بالك - رخم أنا معلش :)
تحياتى

شمس النهار يقول...

:))
معلش معلش

علي فكره
في ناس مابتعرفش تلبس حتي لو معاها فلوس

مذكرات موززه عانس يقول...

شموسه :
انا مش بختار رجل بس انا بختار تيته واخوال وعمات واعمام لولادى
وعموما المظهر كان نقطه من ضمن لو كان ده مظهر مامته وكل حاجه تانيه فيه كويسه صدقينى كنت هاقبل بدون مناقشه
ميرسى لمرورك الراقى :)

مذكرات موززه عانس يقول...

مسلم :
هاقولك زى ماقلت لشموسه
انا مش بختار رجل بس انا بختار تيته واخوال وعمات واعمام لولادى
وعموما المظهر كان نقطه من ضمن لو كان ده مظهر مامته وكل حاجه تانيه فيه كويسه صدقينى كنت هاقبل بدون مناقشه
اما بخصوص ديوث اخدت بالى :)
اللى ماتعرفوش انى من اعظم مفسدى اللغه العربيه
يمكن عشان كده معنسه ؟ :)

إرسال تعليق